އިދިކޮޅު ކޯލިޝަންގެ ލީޑަރ އަދި ޕީޕީއެމްގެ ރިޔާސީ ކެނޑިޑޭޓް، ކުރީގެ ރައީސް އަބްދުﷲ ޔާމީންގެ ކެޕްމެއިން ރަސްމީކޮށް ފެށުމަށް ބާއްވާ ކޮންފަރެންސްގައި 1200އެއްހާ މެންބަރުން ބައިވެރިވާނެކަމަށް ޕީޕީއެމް އިން ބުނެފިއެވެ.
ޕީޕީއެމުން މިއަދު ބޭއްވި ޕްރެސްކޮންފަރެންސްގައި އެޕާޓީގެ ސެނެޓަރ މުޙައްމަދު ޢަބްދުލް ކަރީމް ވިދާޅުވީ، ރިޔާސީ ކެމްޕެއިން ރަސްމީކޮށް ފެށުމަށް ބާއްވާ ކޮންފަރެންސް އޮންނާނީ އަންނަ މަހުގެ 2އިން 4އަކަށް ދަރުބާރުގޭގައިކަމަށެވެ. މި ކޮންފްރެންސްގައި 1200އެއްހާ މެންބަރުން ބައިވެރިވާނެކަމަށާއި، ކޮންފަރެންސް ކުރިއަށްދާނީ ދެ ދަންފަޅިޔަކަށް ބަހާއިލައިގެންކަމަށް ކަރީމް ވިދާޅުވިއެވެ. މި ކޮންފަރެންސްގައި ޕީޕީއެމް، ޕީއެންސީގެ ލީޑަރޝިޕާއި، އެ ކޯލިޝަންގެ ރައްޔިތުންގެ މަޖިލިސް މެމްބަރުންނާއި، ސެނެޓްގެ މެމްބަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ އިތުރުން، ދާއިރާތަކުން މެމްބަރުންވެސް ބައިވެރިވާނެކަމަށެވެ.
"ދަރުބާރުގޭ ސީޓިންއަށް ބަލާފަ ޖުމްލަ 1200އެއްހާ ޑެލިގޭޓްސް އެކިއެކި ސެޝަންތަކަށް ބަހަލައިގެން ކޮންފަރެންސްގައި ބައިވެރިވަމުންދާނެ. ދެން ދަރުބާރުގޭގެ ސީޓިންގްއަށް ބަލަފަ ދެ ސެޝަންއަށް ބަހާލުމުގެ މަޝްވަރަތައް މިހާރުވެސް ކުރިއަށް އެބަގެންދޭ." ޕީޕީއެމްގެ ސެނެޓަރ މުޙައްމަދު ޢަބްދުލް ކަރީމް ވިދާޅުވިއެވެ.
ރައީސް ޔާމީންގެ ކެމްޕެއިން ރަސްމީކޮށް ފެށުމަށް ކޮންފަރެންސެއް ބޭއްވުމަށް ނިންމާފައިވާއިރު، އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށްދިނުމުގައި ރިޝްވަތު ނަންގަވާއި އެ ފައިސާ ލޯންޑަރކުރި ކުށް ސާބިތުވެ އަބްދުﷲ ޔާމީން އަބްދުލްގައްޔޫމް ގެންދަވަނީ ޖަލު ހުކުމެއް ތަންފީޒްކުރަމުންނެވެ. ރައީސް ޔާމީންގެ މައްޗަށް ކުށް ސާބިތުވެ 5 މިލިއަން ޑޮލަރުން ޖޫރިމަނާކޮށް 11 އަހަރުގެ ޖަލު ހުކުމެއް އިއްވީ މިދިޔަ ޑިސެމްބަރު މަހުގެތެރޭގައެވެ. މި ހުކުމުގެ ސަބަބުން ކުރިޔަށް އޮތް ރިޔާސީ އިންތިޚާބުގައި ވާދަކުރެެއްވުމުގެ ފުރުސަތު ރައިސް ޔާމީނަށް ވަނީ ހަނިވެފައެވެ.
އަންނަ ރިޔާސީ އިންތިޙާބުގައި ޕީޕީއެމް ރިޔާސީ ކެނޑިޑޭޓް ކުރީގެ ރައީސް އަބްދުﷲ ޔާމީނަަށް ވާދަނުކުރެވޭނެ އެއްވެސް ހާލަތެއް ނެތްކަމަށް އެޕާޓިން އަންނަނީ ބުނަމުންނެވެ. އަދި ޔާމީންނަށް ވާދަނުކުރެވޭ އިންތިޙާބެއް ޤަބޫލުނުކުރާނެކަމަށްވެސް އިދިކޮޅު ކޯލިޝަނުން ވަނީ ބުނެފައެވެ.
މިއަހަރުގެ ރިޔާސީ އިންތިހާބު އޮންނާނީ އަންނަ ސެޕްޓްމެބަރު މަހުގެ 9 ވަނަދުވަހުކަން އިލެކްޝަންސް ކޮމިޝަނުން ވަނީ އިއުލާންކޮށްފައެވެ. އަދި އިންތިޚާބަށް ނަން ހުށައެޅުމުގެ ފުރުސަތު ޖުލައި 23ގައި ހުޅުވާލާނެންވެސް އެ ކޮމިޝަނުން ވަނީ ހާމަކޮށްފައެވެ.