ވިލާ ކޮލެޖުން އަހަރަކު އެއްފަހަރު ބާއްވަމުން އަންނަ އިންޓަރނޭޝަނަލް ކޮންފަރެންސް އޮން ސޯޝަލް ރިސަރޗް އެންޑް އިނޮވޭޝަންގެ މިއަހަރުގެ ކޮންފަރެންސްގައި ބައިވެރިވުމުގެ ފުރުޞަތު ހުޅުވާލައިފިއެވެ. މިކޮންފަރެންސަކީ، ދިރާސާ ކުރުމަށް ބާރުއަޅާ، އަދި ދަރިވަރުން ހަދާ ދިރާސާތައް، ކަމާގުޅުންހުރި ފަރާތްތަކާއި ހަމައަށް ގެނެސްދިނުމަށް ބާއްވާ ކޮންފަރެންސެކެވެ.
ވިލާ ކޮލެޖުގެ މިއަހަރުގެ އިންޓަރނޭޝަނަލް ރިސަރޗް ކޮންފަރެންސް ބޭއްވުމަށް ހަމަޖެހިފައިވަނީ ޖޫން 17 އަދި 18ވަނަ ދުވަހުއެވެ. މިކޮންފަރެންސްގައި ބައިވެރިވުމުގެ ފުރުޞަތު ވިލާ ކޮލެޖުގެ ދަރިވަރުންނާއި، ރާއްޖެ އާއި ރާއްޖެއިން ބޭރުގެ ފަރާތްތަކަށް ވަނީ ހުޅުވާލާފައެވެ.
މި ކޮންފަރެންސްގައި، ދިރާސާ ކަރުދާސްތައް ހުށައެޅުމާއި، ޕެނަލް ޑިސްކަޝަންއާއި، ކީނޯޓް ސްޕީކަރުންގެ ވާހަކަތަކާއި އަދި އެކި ދާއިރާތަކުގެ ތަޖުރިބާކާރުންނާ ބައްދަލުވެ މުހިންމު ދާއިރާތަކުން މަޝްވަރާކުރުމުގެ ފުރުޞަތު ލިބިގެންދާނެއެވެ. މިފަދަ ކޮންފަރެންސެއް ބޭއްވުމުގެ އެންމެ ބޮޑު ބޭނުމަކީވެސް ކަމާގުޅުންހުރި ފަރާތްތައް އެއްތަނަކުން ބައްދަލުވެ، އެމީހުންގެ އިލްމާއި ހުނަރު އެހެން މީހުންނާ ޙިއްސާކުރުމުގެ ފުރުޞަތު ދިނުން ކަމަށް ވިލާ ކޮލެޖުން ބުނެއެވެ.
ކޮންފަރެންސް ބާއްވާ ތާރީޚު އިޢުލާންކުރުމާއެކު، ކޮންފަރެންސްގައި ބައިވެރިވުމުގެ ފުރުޞަތުވެސް މިވަނީ ހުޅުވާލާފައެވެ. އެގޮތުން ކޮންފަރެންސްގައި ބައިވެރިވާ ފަރާތްތަކަށް އެބްސްޓްރެކްޓްސް ހުށައެޅުމުގެ ފުރުޞަތުު އަންނަ އޭޕްރިލް 3ވަނަ ދުވަހުގެ ނިޔަލަށް ވަނީ ހުޅުވާލާފައެވެ.
މިފަހަރުގެ ކޮންފަރެންސްއަށްވެސް މައިގަނޑު 8 ދާއިރާއަކުން ރިސަރޗް ޕޭޕަރު ހުށައެޅޭނެއެވެ. އޭގެތެރޭގައި ޝަރުޢީ ދާއިރާ، ވިޔަފާރި، ސިއްޙީ، ތަޢުލީމީ، ތިމާވެށި، ޖެންޑަރ އެންޑް ސޮސައިޓީ އަދި އިންޖިނިއަރިން އެންޑް ޓެކްނޮލޮޖީއާއި ގުޅުންހުރި ދާއިރާތައް ހިމެނެއެވެ.
މިއީ ވިލާ ކޮލެޖުން މިކޮންފަރެންސް ބާއްވާ 7ވަނަ ފަހަރެވެ. މި ކޮންފަރެންސްގައި ވީހާވެސް ގިނަ މީހުންނަށް ބައިވެރިވުމުގެ ފުރުޞަތު ދިނުމަށް، އޮންލައިންކޮށްވެސް ބައިތަކެއް ކުރިއަށްގެންދާނެއެވެ.