ކޯވިޑްގެ ދުވަސްވަރު އެކަމުން ދިވެހިން އެބަލިން ސަލާމަތްކޮށް ޤައުމުކުރިޔަށް ގެންދިޔުމަށް ސަރުކާރުން ކުރި ބުރަ މަސައްކަތް އެންމެ ކައިރިން ފެނުނު އެކަކީ މުހައްމަދު މަބްރޫކް އަޒީޒެވެ، ނޭޝަނަލް އިމަޖެންސީގެ އޮޕަރޭޝަން ސެންޓަރުގެ ތަރުޖަމާނަކަށް ހުންނަވާ ކޮންމެ ރެއަކު މީޑިއާތަކަށް އަރުއްވާ ބަލީގެ އެންމެ ފަހުގެ މައުލޫމާތާއި ސަރުކާރުގެ ޕްލޭންތަަކުގެ މައުލޫމާތުތައް އާއްމުކުރައްވަމުން ގެންދެވީ މަބްރޫކެވެ. އޭގެފަހުން ރައީސް އޮފީހުގެ ތަރުޖަނާމުގެ މަޤާމުވެސް ފުރުއްވި މަބްރޫކް، ރައީސް އިބްރާހީމް މުޙައްމަދު ޞާލިޙް ސިފަކުރެއްވީ ރޭވުންތެރި އެކުގައި މަސައްކަތް ކުރައްވަން ކުޅަދާނެ ބޭފުޅެއްގެ ގޮތުގައެވެ.
ރައީސް އޮފީހުގެ ތަރުޖަމާނުކަމުން މިދިޔަ އަހަރު އޮގަސްޓްމަހު ފަހުކޮޅު އިސްތިއުފާދެއްވުމަށްފަހު މަބްރޫކް ސިޔާސީ ޕޯޑިއަމަކުން ފެނިފައެއް ނުވެއެވެ. އެހެންނަމަވެސް ރޭ މިވަނީ އަނެއްކާވެސް މަބްރޫކް މިކަހަލަ ޕޯޑިއަމަކަށް އަރުއްވާފައެވެ. އެމްޑީޕީގެ ރިޔާސީ ޕްރައިމެރީގެ ފޯރިގަދަ ކެމްޕެއިންގެ ތެރެއިން އިބްރާހީމް މުޙައްމަދު ޞާލިޙް އެމަނިކުފާނަށް ތާއިދުކުރާ އެތައް ސަތޭކަ ބަޔަކާއި އެކު ރޭ ބޭއްވި ޖަލްސާއިންނެވެ.
ރޭގެ ޖަލްސާގައި މަބްރޫކް މައިގަނޑު ގޮތެއްގައި ވާހަކަދެއްކެވީ ކޮވިޑްގެ ދުވަސްވަރު އެކަމުގެ ޕްލޭންތަކާއި އެކަމުން ސަލާމަތްވުމަށް ރައީސް ގެންގުޅުވި ސިޔާސަތުތަކާއި އަމަލުކުރެއްވި ގޮތުގެ ވާހަކައެވެ. އަދި ސަރުކާރުން ރައްޔިތުންނަށް ކަންކަން ކޮށްދެއްވުމުގައި އެކި މީހުން ބައިވެރިކޮށް ތަފާތު ހިޔާލުތައް އަޑުއައްސަވާ ރައީސް ކުރެއްވި ބުރަ މަސައްކަތްޕުޅުގެ ވާހަކައެވެ.
މަބްރޫކް ވިދާޅުވީ ދުނިޔޭގެ އެންމެ ތަރައްޤީ ޤައުމުތަކުގައި މީހުންތައް މަރުވެ، މުޅި ދުނިޔެ ހާސްވެ ބިރުވެރިކަމުގައި އޮތް ދުވަސްވަރު ރައީސް ދެއްވި ހިތްވަރު ދުވަހަކުވެސް ހިތުން ފިލައިގެން ނުދާނެކަމަށެވެ. މިއަދު ރާއްޖޭގެ އިގްތިސާދު އަލުން އިޔާދަވާން ފަށާ ޓްއަރިސްޓުން ރާއްޖެ އަންނަން ފަށާ ކޮވިޑުން ރާއްޖޭގެ ސަލާމަތްވީ އިއްތިފާގަކުން ނޫންކަން މަބްރޫކް ފާހަގަކުރެއްވިއެވެ. މަބްރޫކް ވިދާޅުވީ ކޮވިޑްގެ ދުވަސްވަރު ރައީސްގެ ފަރާތްޕުުން އެގިވަޑައިގެންނެވި ކަމަކީ ރައީސަކީ ޓިމު ކެޕަޓަނެއް އަދި ލީޑަރެއްކަމެވެ. ޓީމުން ކުރި ކޮންމެ ކަމެއްގައި ބައިވެރިވެޑައިގެން އެކުގައި މަސައްކަތް ކުރެއްވާކަމަށާއި ދިމާވި ކޮންމެ ދައްޗެއްގައި ޓީމަށް ހިތްވަރުދެއްވިކަމަށް މަބްރޫކް ވިދަޅުވިއެވެ. އަދި އެންމެ ދައްކާ ވާހަކަތައް ބަރާބަރަށް ރައީސް އަޑު އައްސަވާކަންވެސް މަބްރޫކް ފާހަގަކުރެއްވިއެވެ.
" އަޅުގަނޑު އަދިވެސް ހަނދާން ހުރޭ ގާތްގަޑަކަށް ދެ އަހަރު އަޅުގަނޑުމެން ހޭދަކުރިން އެންމެ ރެއެއްވެސް ވައްޓާނުލާ، ފުރަތަމަ މުލިއާގޭގައި ބައްދަލުކުރާނީ. ކޯވިޑާއި ހެދި ޤައުމުން ބަންދުވެގެން ދެން އެކަން ކުރަންޖެހުނީ ވާޗުއަލްކޮށް ވެބްކެމެއް އަޅުވައިގެން. އެއީ ހުކުރު ދުވަހަކަސް، ހޮނިހިރު ދުވަހަކަސް، ރައީސް ކޮވިޑް ޖެހިވަޑައިގެން ހުންނެވި ދުވަހަކަސް އެހެން ދުވަހަކަސް ކޮންމެ ރެއަކު ހަމަކޮންމެ ރެއަކު 2 ގަޑިއިރު 3 ގަޑިއިރު ރައީސް ހޭދަކުރެއްވީ މުޅި ޓީމާއި އެކު ރާއްޖޭގައި ހިގަމުންދާ ކަންކަން ބެއްލެވުމަށް. " މަބްރޫކް ވިދާޅުވިއެވެ.
މަބްރޫކް ވިދާޅުވީ މިއަދާއި ހަމައަށް މިއާދެވުނީ އެދުވަހު ކުރި މަސައްކަތުކަމަށް ގަބޫޅުކުރައްވާކަމެށެވެ. މުޅި ދުނިޔެ ބަންދުގައި އޮތް އިރު ރޭވުންތެރިކަމާއި އެކު ކުރެވުނު މަސައްކަތްތަކާއި އެކު ނޫނީ މި ދުވަސް ހޯދުނުކަމަށް ގަބޫލުނުކުރައްވާކަން މަބްރޫކް ތަކުރާރުކޮށް ވިދާޅުވިއެވެ. ރައީސް ކޮންމެކަމެއްވެސް ކުރެއްވީ ރޭވުންތެރިކަމާއިއެކު ވިސްނަވައިގެންޖަން ފާހަގަކުރައްވަމުން މަބްރޫކް ވިދާޅުވީ ރައީސް އޭރު ކޯވިޑްގެ ވާހަކަ ދައްކަވަމުން ދިޔުމުން ބައެއް ސިޔާސީ ވެރިން އެކަމަށް ޖޯކު ޖެއްސިވިކަމަށެވެ.
" އަޅުގަނޑަށް ފެނުނު ތަފާތަކީ ރައީސް އޭރު ދިޔައީ ރާއްވަވަމުން. އަޅުގަނޑު ވަރަށް ސާފުކޮށް ހަދާން ހުރޭ ރާއްޖޭގައި ވާންޖެހޭ ގޮތުގެ ވާހަކަ ދެއްކެވިއިރު ރައީސް އެދުވަހު ވިދާޅުވީ ރާއްޖޭގެ އެއްވެސް މީހަކަށް އެނދެއް ނެތި ފަރުވާ ނުދެވިގެން ގޮސްގެން ނުވާނެއޭ. ރައީސް ވިދާޅުވީ ރާއްޖޭގެ އެއްވެސް ރަށެއްގައި ކާބޯތަކެއްޗަށްޖެހިގެން ނުވާނެއޭ. ރައީސް ވިދާޅުވީ ރާއްޖެ ބަންދުކުރަންޖެހޭ ދުވަހު އަޅުގަނޑުމެން ޖެހޭނީ ބަންދުކުރާށޭ. އެކަމު އެކަން ކުރަންވާނީ ހުޅުވާނެ ގޮތެ އެނގިތިބެގެން ކަމަށް. އެކަން ކުރާނެ ގޮތާ އެމަސައްކަތް ކުރާނެ ގޮތުގެ ފުރިހަމަ ތަފްސީލު އޮތީ ލިޔެވިފައި. ރާއްޖެެއަކީ ދުނިޔޭގައި އެންމެ ފުރަތަމަ ބަންކުރި އެއް ގައުމު އެކަމު އެންމެ ފުރަތަމަ ހުޅުވިވެސް އެއް ޤައުމު." މަބްރޫކް ވިދާޅުވިއެވެ.
މަބްރޫކްގެ ވާހަކައިގައި އޭނާ ހިއްސާކުރެއްވީ ހަމައެކަނި ކޯވިޑްގެ ދުވަސްވަރު އެކަމުން އަރައިގަތުމަށް ރައީސް ކުރެއްވި ފުރިހަމަ ހަރުދަނާ މަސައްކަތްތަކުގެ ވާހަކަތައް އެކަންޏެއް ނޫނެވެ. ރައީސް އޮފީހުގައި މަސައްކަތް ކުރެއްވިއިރު ސަރުކާރު ހިންގެވުމަށް ރައީސް ގެންގުޅުއްވި ހަރުދަނާ އުސޫލަތައްވެސް ފެނި އެ ތަޖުރިބާވެސް މަބްރޫކްވަނީ ހިއްސާކުރައްވާފައެވެ. މަބްރޫކް ވިދާޅުވީ ރައީސް އިބްރާހީމް މުޙައްމަދު ޞާލިޙަކީ އެންމެންގެ ހިޔާލު ހޯއްދަވާ އަޑު އައްސަވާ ކަންކަން ރާއްވަވާ ބޭފުޅެއްކަމަށެވެ.
" ރައީސްގެ ކެބިނެޓާއި އެކީ ރައީސް މަސައްކަތް ކުރައްވާ ގޮތް، ކޮންމެ މީހެއްގެ ހިޔާލުވިޔަސް ހޯއްދަވާ. އަދި ރާއްޖޭގައި މިހާތަނަށް އައި ރައީސުންގެ ތެރެއިން އަތޮޅުތަކުގެ ކައުންސިލްތަކާއި އެންމެ ގިނައިން ބައްދަލުކުރެއްވި ރައީސަކަށް އިބްރާހީމް މުޙައްމަދު ޞާލިޙް ވެގެން ދާނެ. ހިޔާލު ތަފާތަސް ހިޔާލު އެއްގޮތަސް އަޑު އައްސަވާނެ. އަދި ހުރިހާ ހިޔާލެއްގެ ތެރެއިން ޤައުމަށް އެންމެ ރަނގަޅު ގޮތް ހޯއްދަވާނެކަމުގެ ފުރިހަމަ ޔަޤީންކަށް އަޅުނގަޑަށް އެބައޮތް" މަބްރޫކް ވިދާޅުވިއެވެ.
މަބްރޫކް ވިދާޅުވީ ކޮވިޑަށްފަހު އެ އައި ބަދަލުތަކާއި އެކު އެެމްޑީޕީގެ މެނިފެސްޓޯ އަލުން ތަރުތީބުކުރެވި ދެން އެންމެ ރަނގަޅަށް ކުރަންޖެހޭ ކަންތައްތަކަކީ ކޮބައިކަމާއި ކޮށްނިމުނު ކަންތައްތައްކަކީ ކޮބައިކަންވެސް ލިޔެވި މިހާރުވެސް ފެންނަން ހުންނާނެކަމަށެވެ. އެކުރެވުނު ތަރުތީބުން ފެނުނު ނަތީޖާ މިއަދު އެންމެނަށްވެސް ފެންނަމުން އަންނަކަންވެސް މަބްރޫކް ފާހަގަކުރެއްވިއެވެ.
" ކުއްލި ކުއްލިއަށް މަގު އެޅެނީކީ ނޫން، ކުއްލި ކުއްލިއަށް ކަންކަން ވަނީ ކީ ނޫން. ރޭވިގެން ތަރުތީބު ކުރެވިގެން އަންނަ ތަރައްޤީ އެހެރަގެން އެހެރީ ފެންނަން. މިހާރު އެހެރަ ދަނީ މަޝްރޫއުތައް ނިމެމުން. ނަރުދާމަތައް ނިމިއްޖެ، ރާއްޖޭގެ އެހެން އެއްވެސް ރައީސަކު ނުނިންމާ އަދަދަށް. މަގުތައް އެޅިއްޖެ، ސްކޫލްތައް އެޅިއްޖެ، ހޮސްޕިޓާތައް އެޅިއްޖެ. ބޮޑު ރަށެއް ކުޑަރަށެއް ތަފާތުކުރުމެއް ނެތި އެެ އަންނަނީ ބަނދަރުތައް އެޅެމުން، ފުޓްސެލް ދަނޑުތައް އެޅެމުން، ހެލްތް ކުލިނިކްތައް އެޅެމުން. އެހެން ހުރިހާ ހިދުމަތްތަކެއް މަޑުމަޑުން މަޑުމަޑުން އެހެރަ އަންނަނީ ލިބެމުން." މަބްރޫކް ވިދާޅުވިއެވެ.
ކޮވިޑް މެނޭޖްކުރުމާއި ސަރުކާރުގެ ސިޔާސަތުތައް ރައްޔިތުންނަށް ހާމަކޮށްދިނުމުގައި އިސް ދައުރެއް އަދާކުރެއްވި މަބްރޫކް، ކޮވިޑާއި ސަރުކާރު ކަންކަމުގައި ރައީސް އަދާކުރެއްވި ދައުރުގެ ވާހަކަތައް މިހާ ތިލަކޮށް މީގެ ކުރިން ދައްކަވާފައެއް ނުވެއެވެ. މަބްރުކް ވިދާޅުވީ އެ ވާހަކަތައް މި ދެއްކީ ސަރުކާރުގެ ވަޒީފާއެއް އޮވެގެން ނޫނީ ބޭނުންވެގެން ނޫންކަމަށެވެ. އެކުގައި ކުރެވުނު މަސައްކަތުން ލިބުނު ހިއްވަރާއި ކުރެވުނު އިތުބާރުގެ ސަބަބުންކަމަށެވެ.