ދައުރެއްގެ ތެރޭގައި އެޅި ބިންގަލެއްގައި ފެށި ފްލެޓްތައް ނިންމާ ހަވާލުކުރާނީ އަޅުގަނޑު: ރައީސް

ރިޔާސީ ދައުރެއްގެ ތެރޭގައި އެޅި ބިންގަލެއްގައި، ފުރަތަމަ ފަހަރަށް ނިންމާ ފްލެޓްގެ ތަޅުދަނޑި ރައްޔިތުންނަށް ދެއްވާނީ އެމަނިކުފާނުކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އާރޓިފިޝަލް ބީޗް ސަރަަހއްދުގައި ބޭއްވި ކެމްޕެއިން އެއްވުމެއްގައި ވާހަކަފުޅު ދައްކަވަމުން ރައީސުލްޖުމްހޫރިޔާ އިބްރާހީމް މުޙައްމަދު ޞާލިޙް ވަނީ އެމަނިކުފާނުގެ ސަރުކާރުގެ 4 އަހަރުގެ ތެރޭގައި ކުރައްވާފައިވާ ބައެއް މަސައްކަތްތަކަށް އަލިއަޅުއްވާލައްވާފައެވެ.

މިސަރުކާރުން ތަރައްޤީއަށް ކުރައްވާ މަސައްކަތްތައް ނުނިމޭކަމަށް ބުނެ ބައެއް ފަރާތްތަކުން އަމާޒުކުރައްވާ ފާޑުކިޔުއްމަށް ރައްދު ދެއްވައި ރައީސް ވަނީ ނުނިމެނީ ކޮންކަމެއްތޯ ސުވާލުކުރައްވާފައެވެ. އަދި ތަރައްޤީގެ މަގުން ކުރިއަށް ދާނީތޯ ނުވަތަ މަގުމަތިވާނީތޯ ރައީސް ސުވާލުކުރެއްވިއެވެ. ރައީސް ވިދާޅުވީ ކުރިއަށް އޮތް ރިޔާސީ އިންތިޚާބަކީ ދައުލަތުގެ ބަޖެޓުން ޚަރަދުކުރާނީ ތަރައްޤީގެ މަޝްރޫޢުތަކަށްތޯ ނުވަތަ ޚަރަދުކުރާނީ ޕެޕަރސްޕްރޭއާއި މުގުރާއި އަސޭމިރުން ސްޕްރޭއަށްތޯ ނިންމާނެ އިންތިޚާބުކަމަށެވެ.

ރައީސް ވިދަޅުވީ 5 އަހަރުގެ ތެރޭގައި އެންމެ ގިނަ ތަފާތު މަޝްރޫޢުތައް ހިންގީ މިދައުރުގައިކަމަށެވެ.

ރައީސް ޖެއްސެވި ބައެއް ތަފާސް ހިސާބުތައް:

* ފެނާ ނަރުދަމާގެ 141 މަޝްރޫޢު ކުރިއަށްދޭ
* ލަފާފުރުމުގެ 47 މަޝްރޫޢު ނިމިފައި
* ތަޢޫލީމީ ދާއިރާއިން 1578 ކްލާސް ރޫމް ނިމިފައި
* 17 މިސްކިތް ބިނާކޮށް ނިންމުން
* 57 ފުޓްބޯޅަ ދަނޑު ތަރައްޤީކުރުން
* 61 ފުޓްސަލް ދަނޑު ތަރައްޤީކުރުން
* 47 ޖިމް ޤާއިމްކުރުން
* 144 ރަށަކަށް 313 ޖަނަރޭޓަރު ސެޓް ފޯރުކޮށްދިނުން

ރައީސް ވިދާޅުވީ ކުރިއަށް އޮތް ރިޔާސީ އިންތިޚާބަކީ އެމްޑީޕީއަށް ދެވަނަ ދައުރެއް ޔަޤީންކުރުމަށް ލިބޭނެ ފުރަތަމަ ފުރުޞަތުކަމަށެވެ. އެމަނިކުފާނުގެ ވާހަކަފުޅުގައި ޑިމޮކްރަސީއާއި، ރާއްޖެ ހަމަމަގުން ހިންގުމަށްޓަކައި، ކުރަންޖެހޭނެ ކަންކަމާއި ކުރަން ހެޔޮނުވާނެ ކަންކަން ހުންނާނެކަމަށެވެ. އެގޮތުން ވޭތުވެދިޔަ ތަނުގައި ރައްޔިތުންނަށް ކުރި އަނިޔާއާއި ދެއްކި ބިރާ އޭގެ ފަހަތުގައި ތިމި މީހުންނަށް އެމަނިކުފާނު "އޯކޭ" ނޫންކަމަށް ރައީސް ވިދާޅުވިއެވެ.

ރައީސްގެ ވާހަކަފުޅުގައި ވަނީ ހުރިހާ ރައްޔިތުންނަށް ހަމަޖެހިލައިގެން ދިރިއުޅުން ހައްގުކަމަށް ވިދާޅުވެފައެވެ. އަދި އެ ރައްޔިތުންނަށް ރަނގަޅު އާމްދަނީއާއި ރަނގަޅު ބޯހިޔާވަހިކަމާއި އުފާވެރި ދިރިއުޅުމެއް ބޭނުންވާކަމަށް ރައީސް ވިދާޅުވިއެވެ.

ރައީސް ޖެއްސެވި ތަފާސް ހިސާބުގެ ބައެއް:

* 16،127 ކުދިންނަށް ހިލޭ ޑިގްރީގެ ފުރުޞަތު
* 6529 ހިލޭ ޑިގްރީގައި ކިޔަވާ ނިމިއްޖެ
* ހުރިހާ އަތޮޅެއްގައި މަތީ ތައުލީމަށް ކިޔަވައިދޭން ފެށުން
* ތައުލީމީ ދާއިރާގެ 10 ހާހަށްވުރެ ގިނަ މުވައްޒަފުންގެ މުސާރައަށް ހެޔޮ ބަދަލެއް
* 5 ސަރަހައްދުގައި ސީޓީ ސްކޭންގެ ޚިދުމަތް ފެށުން
* 5 ޓާޝަރީ ހޮސްޕީތަލްގެ މަސައްކަތް ފެށި ކުރިއަށް ދިއުން
* 137 ރަށަކަށް އެމްބިއުލާންސް ފޯރުކޮށްދިނުން
* ފަތުރުވެރިކަމުގެ ސިނާޢަތުގެ 13000 ގިނަ މުވައްޒަފުންނަށް މިނިމަމް ވޭޖުގެ ފައިދާ
* 16000 ވުރެ ގިނަ ފްލެޓާއި ރޯ ހައުސްގެ މަސައްކަތް ފެށި ކުރިއަށް
* މާލެ ސަރަހައްދުގައި އެކަނި 7590 ހައުސިންގ ޔުނިޓްގެ މަސައްކަތް

މި ތަފާސް ހިސާބުތަކާއެކު ރައީސް ދެއްވި ޔަޤީންކަމަކީ މާލެ ތޮއްޖެހުން ކުޑަކޮށް މުޅި މާލެއަށް ހަމަ ނޭވާއެއް ލުމަށް ކުރެވެންހުރި ހުރިހާ ކަމެއް ކުރައްވާނެކަމުގެ ޔަޤީންކަމެވެ.

"ކުޑަ ޝައްކެވިޔަސް ނުކުރައްވާ. މާލެ ތޮއްޖެހި، މާލެ ހަމަނޭވާލުމަށް ކުރަންޖެހޭ ހުރިހާ ކަމެއް އަޅުގަނޑު ކުރާނަން. އަނެއްކާވެސް ސާފު ބަހުން ދަންނަވަން. މާލޭގެ ރައްޔިތުންނަށް ބިންކަނޑާ އިން ވަކިކޮށް ގޯތި ދޭނީ އަޅުގަނޑު." ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.

ރައީސް ވިދާޅުވީ މާލެ ސަރަހައްދުގައި މިސަރުކާރުން އަޅާ ފްލެޓްތަކުގެ ތެރެއިން ބައެއް ފްލެޓްތަކުގައި އެމަނިކުފާނުގެ މި ދައުރު ނިމުމުގެ ކުރިން މީހުން ދިރިއުޅެން ފަށާނެކަމަށެވެ. ރައީސް ވިދާޅުވީ ދައުރެއްގެ ތެރޭގައި ފްލެޓް އަޅައި ފުރަތަމަ ފަހަރަށް ތަޅުދަނޑި ހަވާލުކުރައްވާނީ އެމަނިކުފާނުކަމަށެވެ.

"ދައުރެއްގެ ތެރޭގައި ފުރަތަމަ ފަހަރަށް ބިންގަލެއްގެ ތެރޭގައި ފަށާ ނިންމާ ފްލެޓްގެ ތަޅުދަނޑި ދޭނީ އަޅުގަނޑު." ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.

ރައީސް ވިދާޅުވީ ރާއްޖޭގެ ހުރިހާ ރަށެއްގައި ފެނާއި ނަރުދަމާއާއި، ލަފާފުރުމުގެ ދަތިކަން ހައްލުކުރުމަށް މަސައްކަތް ކުރައްވަމުން ގެންދަވާކަމަށާއި، މުޅި ރާއްޖޭޣެ ހުރިހާ ރަށެއް އާރުޓީއެލް ފެރީގެ ޚިދުމަތުން ގުޅުވާލާނެކަމަށެވެ. އަދި ކޮންމެ ރަށަކުންވެސް 20 ނުވަތަ 30 މިނެޓުން ވާސިލުވާނެ އެއަރޕޯޓްތައްވެސް ތަރައްޤީކުރައްވާކަމަށް ރައީސް ވިދާޅުވިއެވެ.

ރައީސް ވިދާޅުވީ ހަނިމާދޫ އިންޓަރނޭޝަލް އެއަރޕޯޓް ތަރައްޤީކުރުމުގެ މަޝްރޫޢުފަދައިން ރާއްޖޭގެ ދެކުނުގައި ގަން އިންޓަރނޭޝަނަލް އެއަރޕޯޓްވެސް ފުރިހަމަ ބައިނަލްއްޤްވާމީ އެއަރޕޯޓަކަށް ހައްދަވާނެކަމަށެވެ. އެގޮތުން އަހަރަކު 1.5 މިލިއަން ފަސިންޖަރުންނަށް ޚިދުމަތްދެވޭ މިންވަރަށް އެ އެއަރޕޯޓް ތަރައްޤީކުރައްވާނެކަމަށް ރައީސް ވިދާޅުވިއެވެ.

ސަރުކާރުން ކުރިއަށްގެންދާ އެއަރޕޯޓްގެ މަޝްރޫޢުތައް

* ހޯރަފުށި އެއަރޕޯޓް ނިމިއްޖެ
* ފަރެސްމާތޯޑާ ނިމިއްޖެ
* މ.މުލީ، ފ،މަގޫދޫގެ އެއަރޕޯޓް މަސައްކަތް ފެށިއްޖެ
* މާފަރު ބައިނަލްއޤްވާމީ އެއަރޕޯޓް އެކްސްޓެންޝަނަށް މޮބިލައިޒްކުރެވިއްޖެ
* ހދ.މަކުނުދޫ، ށ.ބިލެތްފަހި، ބ.ތުޅާދޫ، ތ.ވިލުފުށި އެއަރޕޯޓް ބީލަން ކުރެވިއްޖެ

ރައީސް ވިދާޅުވީ އެ މަސައްކަތްތައް ނުކޮށް ކުޑަ ދުލެއް ދެއްވިނަމަވެސް އެކަންކަން ހުއްޓޭނެކަމަށެވެ. ރައީސް ވިދާޅުވީ، ކުރިއަށް އޮތް ރިޔާސީ ދައުރަކީ ނުނިމި ހުރި ހުރިހާ ކަމެއް ނިންމަން އެމްޑީޕީއަށް ލިބޭ ފަހު ފުރުޞަތުކަމަށެވެ. އެއީ އަތޮޅުތަކުގެ ތަރައްޤީ ވަށާޖެހި، އޭގެ ލުއި މާލެއަށް ލިބުންކަމަށާއި، ހާސްކަމުން ނެއްޓި ހަމަޖެހޭ ދިރިއުޅުން މުޅި ރާއްޖެއަށް ލިބުންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.