މާލޭގެ ގެއެއްގައި ރަޙުމްކުޑަގޮތަކަށް މަރާލާފައި އޮއްވާ ފެނުނު ޝިއާއު މުހައްމަދު ސައީދު މަރުގެ މައްސަލައިގެ އަޑުއެހުންތައް އަންނަ އާދިއްތަދުވަހު ފެށުމަށް ކްރިމިނަލްކޯޓުން ތާވަލުކޮށްފިއެވެ.
އުމުރުން 22 އަހަރުގެ ޝިއާއުގެ މަރާލާފައި އޮއްވާ ފެނުނީ މިދިޔަ އަހަރުގެ އޯގަސްޓު މަހުގެ 7 ވަނަ ދުވަހު ރެއެވެ. ހ. ޝީރީންވިލާއިން ޝިއާއުގެ ހަށިގަނޑު ފެނުނިއިރު ބޮޑެތި އަނިޔާތަކެއް ދީފައިވާކަމަށް ފުލުހުން ވަނީ ވިދާޅުވެފައެވެ
ޝިއާއުގެ މަރުގެ މައްސަލާގައި ދައުލަތުން ދައުވާ އުފުލާފައިވަނީ ފ. ނިލަންދޫ، ފިނިފެންމާގޭ، ޢުމުރުން 23 އަލީ ޝާހިލްގެ މައްޗަށެވެ. އޭނާގެ މައްޗަށް 5 ދައުވާއެއް ދައުލަތުން ވަނީ އުފުލާފައެވެ.
މި މައްސަލައިގެ އަޑުއެހުންތައް އަންނަ އާދިއްތަ ދުވަހު ފެށުމަށް ކްރިމިނަލްކޯޓުން ވަނީ ތާވަލުކޮށްފައެވެ. އެހެންނަމަވެސް ޝަރީއަތް ސިއްރުކޮށްގެން ކުރިއަށް ގެންދަން ދައުލަތުން އެދިފައިވާތީ ކޯޓުން ވަނީ އަޑުއެހުންތައް އާއްމުކޮށް ހުޅުވާ ނުލާ ސިއްރުކުރަން ނިންމާފައެވެ.
އަލީ ޝާހިލްގެ މައްޗަށްް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މަރާލުމުގެ ކުށޫގެ ދައުވާ އާއި އޮރިޔާން ކާޑު ގެންގުޅުމުގެ ކުށުގެ ދައުވާއާއި ކެނަބިސް ބޭނުންކުރުމުގެ ދައުވާއެވެ. މީގެއިތުރުންވެސް ދެ ދައުވާއެއް އުފުލާފައިވެއެވެ. އެހެންނަމަވެސް އެ ދައުވާތައް ޕީޖީ އޮފީހުން ސިއްރުކޮށްުފައިވާތީ ކޯޓުންވެސް އެކަން ހާމަކޮށްފައެއްނުވެއެވެ.
ޝިއާއުގެ މަރުގެ މައްސަލައަށް ޝާހިލްގެ އެއްބާރުލުން އެކަށީގެންވާ ވަރަށް ލިބިފައި ނުވާކަމަށް ފުލުހުންވަނީ ވިދާޅުވެފައެވެ. އެހެންނަމަވެސް އޭނާގެ ފޯނު ހުޅުވާ، އޭގެ ޑާޓާތައް ފުލުހުންް ނަގާފައިވާކަންވެސް ފުލުހުން ކުރިންވަނީ ހާމަކޮށްފައެވެ.
މި މައްސަލާގައި ފުލުހުން ބެލި ބެލުމުން މިކަމުގައި އިތުރު އެއްވެސް މީހެއްގެ ބައިވެރިވުމެއް އޮތްކަން ތަހުގީގަށް އެނގިފައި ނުވާކަމަށާ، މިއީ ކުރިން ރޭވިގެން ހިންގާފައިވާ އަމަލެއްކަމަށް ނުބެލެވޭ ކަމަށްވެސް ފުލުހުން ވަނީ ވިދާޅުވެފައެވެ.
މި މައްސަލާގައި 45 މީހުންނަށްްވުރެ ގިނަ މީހުންނާ ސުވާލުކޮށް، މައްސަލައާއި ގުޅުންހުރި އެކިއެކި ތަންތަނުގެ ސީސީޓީވީ ފުޓޭޖު ބަލައި ދިރާސާކޮށްފައިވާ ކަމަށްވެސް ފުލުހުން ވަނީ ވިދާޅުވެފައެވެ.
އަނިޔާވެރިގޮތަކަށް ޝިއާއު މަރާލާފައި އޮއްވާ ފެނުނީ އޭރު ޝާހިލް ދިރިއުޅެމުން ދިޔަ ގޭ ތެރެއިންނެވެ. ފުލުހުން ވިދާޅުވީ ޝިއާއުއަށް ދީފައިވާ ބައެއް އަނިޔާތަކަކީ އޭނާ މަރުވިފަހުން ދީފައިވާ އަނިޔާތައްކަމަށެވެ.