ޔަހޫދީންގެ ޖައްބާރު ދަޢުލަތް އިސްރާޢީލުގެ ބޮޑުވަޒީރު ބެންޖަމިން ނަތަންޔާހޫގެ ސަރުކާރުގެ އިސް ވަޒީރެއް، މަޤާމުން ދުރުކުރަން އެ ޤައުމުގެ ސުޕްރީމް ކޯޓުން އަމުރުކޮށްފިއެވެ. ޞިއްޙަތާއި ދާޚިލީ ކަންކަމާ ބެހޭ ވަޒީރު ކަމުގެ މަޤާމަށް ނަތަންޔާހޫ ޢައްޔަންކޮށްފައި ވަނީ އާރްޔޭ ޑޭރީއެވެ. އޭނާއަކީ ޔަހޫދީންގެ ހަރުކަށި ފިކުރަށް ތާޢީދުކުރާ ޕާޓީއަކަށް ނިސްބަތްވާ ވަޒީރެކެވެ.
އިސްރާޢީލުގެ ސުޕްރީމް ކޯޓުން ބުނީ، ޑޭރީއަކީ ޓެކުހަށް އޮޅުވައިލުމުގެ ކުށް ސާބިތުވެފައިވާ ވަޒީރެއް ކަމުގައެވެ. އަދި، އޭނާ ވަޒީރުކަމުން ވަކިކުރަން އެ ކޯޓުން ވަނީ ނަތަންޔާހޫގެ ސަރުކާރަށް އަމުރުކޮށްފައެވެ. އަދި، އެ ފަދަ ކުށެއް ސާބިތުވެފައިވާ މީހަކު ވަޒީރު ކަމުގެ މަޤާމަށް ޢައްޔަންކުރުމަކީ ބަލައިގަނެވޭނެ ކަމެއް ނޫން ކަމުގައި ވެސް ސުޕްރީމް ކޯޓުން ވަނީ ނިންމާފައެވެ. އެ ކޯޓުގެ ބެންޗުގައި ހިމެނޭ 11 މެންބަރުންގެ ތެރެއިން 10 މެންބަރުން ޑޭރީ ވަކިކުރުމުގެ އަމުރަށް ތާޢީދުކުރިއެވެ.
ޑޭރީއަކީ ޔަހޫދީންގެ ހަރުކަށި ފިކުރަށް ތާޢީދުކުރާ ޝާޒް ޕާޓީގެ އިސްލީޑަރެވެ. އޭނާ ވަނީ، ޓެކުހަށް އޮޅުވައިލި ކަމުގެ ކުށަށް 2022 ވަނަ އިޢުތިރާފުވެފައެވެ. އަދި، އެ ކުށުގެ އަދަބެއްގެ ގޮތުން، 50,000 އެމެރިކާ ޑޮލަރުގެ ޖޫރިމަނާއެއް އޭނާގެ މައްޗަށް ވަނީ ކޮށްފައެވެ. އަދި، ޤާނޫނު ހަދާ މަޖިލީހުގެ މެންބަރުކަން އޭނާއަށް ދޫކޮށްލަން ޖެހުނެވެ.
ނަތަންޔާހޫގެ ސަރުކާރުން ވަނީ ޑޭރީ ވަކިކުރަން ސުޕްރީމް ކޯޓުން ނެރުނު އަމުރަށް ފާޑުކިޔައި، އެއަށް ރައްދުދީފައެވެ. އަދި، ސުޕްރީމް ކޯޓަށް ފިއްތުންތައް ކުރިމަތިކޮށް، އެ ކޯޓުގެ ބާރުތައް ހަނިކުރާނެ ކަމުގެ އިންޒާރު ދީފައެވެ. އަދި، ކޯޓުގެ ބާރުތައް ހަނިކުރަން ފަށާފައިވާ މަސައްކަތްތައް އިތުރު ހިތްވަރަކާ އެކު ކުރިއަށްގެންދާނެ ކަމުގައި ވެސް ނަތަންޔާހޫގެ ސަރުކާރުން ބުންޏެވެ.
2022 ނޮވެންބަރު 1 ވަނަ ދުވަހު ބޭއްވި އިންތިޚާބު ކާމިޔާބުކޮށް، ނަތަންޔާހޫ ވެރިކަމާ ހަވާލުވީ ހަރުކަށި ފިކުރުގެ ޕާޓީތަކުގެ ތާޢީދާއެކުގައެވެ. އަދި، އެ ޕާޓީތަކުގެ އިސްވެރިން މިހާރު ތިބީ އައު ސަރުކާރުގައި ވަޒީރުންގެ މަޤާމުތަކުގައެވެ. ޑޭރީގެ އިތުރުން އެ ސަރުކާރުގެ ހިމެނޭ އެނެއް ބޭފުޅަކީ އިތަމާރް ބެން-ގުވީރެވެ. އޭނާއަކީ ޤައުމީ ސަލާމަތާ ބެހޭ ވަޒީރެވެ.
ދާދި ފަހުން ބެން-ގުވީރު ވަނީ މުސްލިމުންގެ މުޤައްދަޞް ބިމުގައިވާ މަސްޖިދުލް އަޤްޞާއަށް ގޮސް، މުސްލިމުންނަށް ފުރައްސާރަކޮށްފައެވެ. މަސްޖިދުލް އަޤްޞާ ހުންނަ ޓެމްޕްލް މައުންޓަކީ ޔަހޫދީންނަށް ވެސް މުހިންމު ތަނެއްގެ ގޮތުގައި ސިފަކޮށް ބެން-ގުވީރު ބުނީ، އެ ތަނަށް ޔަހޫދީންނަށް ވަނުމުގެ ފުރުޞަތު ދިނުން ހުއްޓައި ނުލެވޭނެ ކަމުގައެވެ. އަދި، އެ ތަނަށް ވަންނަ ޔަހޫދީންނަށް އިންޒާރުދޭ ފަރާތްތަކާ ދެކޮޅަށް ހަރުކަށި ފިޔަވަޅުތައް އަޅާނެ ކަމަށް ވެސް އޭނާ ބުންޏެވެ.
73 އަހަރުގެ ނަތަންޔާހޫގެ މައްޗަށް ވެސް ކޮރަޕްޝަންގެ ތުހުމަތުތައް ހުށަހެޅި، މިހާރު ވެސް ދަނީ ޝަރިޢަތް ކުރަމުންނެވެ. އޭނާއަކީ ޔަހުދީންގެ ދަޢުލަތުގެ ބޮޑުވަޒީރުކަމުގެ މަޤާމު އެންމެ ގިނަ ދުވަހު ފުރުއްވާފައިވާ ބޭފުޅާއެވެ. 1996 އިން 1999 އަށް، އަދި 2009 އިން 2021 ވަނަ އަހަރާ ހަމައަށް އޭނާ ވަނީ އެ މަޤާމު ފުރުއްވާފައެވެ.
އޭނާގެ ސަރުކާރުތަކަކީ، ފަލަސްޠީނުގެ އެތަކެއް ސަތޭކަ މުސްލިމުންނެއްގެ ލޭއޮހޮރުވައިލުމުގެ ފަހަތުގައިވާ ސަރުކާރުތަކެކެވެ. އޭނާގެ އައު ސަރުކާރަކީ ވެސް، ފަލަސްޠީނުގެ ރައްޔިތުންނަށް އިތުރު ބިރުވެރިކަމެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ސިފަ ކުރެއެވެ. ޖައްބާރު ނަތަންޔާހޫ މިހާރު ވެސް ވަނީ، ޔަހޫދީން އަތްގަދަކޮށްފައިވާ ފަލަސްޠީނުގެ ބިންތަކުގައި ޔަހޫދީން އާބާދުކުރަން މަސައްކަތް ކުރައްވާނެ ކަމުގައި ވިދާޅުވެފައެވެ.
އަދި، ފަލަސްޠީނަށް އާމްދަނީގެ ގޮތުގައި ލިބޭ ފައިސާތައް ހިފަހައްޓާނެ ކަމުގެ އިންޒާރު އޭނާ މިހާރު ވެސް ވަނީ ދެއްވާފައެވެ. އަދި، ފަލަސްޠީނުގެ ރައްޔިތުން ބަނޑަށް ޖައްސައި، ނިކަމެތި ކޮށްލާނެ ކަމަށް އޭނާ ގެންދަވަނީ ފާޅުގައި ވިދާޅުވަމުންނެވެ. މި ކަމާ ދެކޮޅަށް އ.ދ.ގެ ޢާންމު މަޖިލީހުން ތެދުވުމުން، އެ މަޖިލީހުގެ އެންގުންތަކަށް ބޯނުލަނބާނެ ކަމަށް ވިދާޅުވެ، އޭނާ ގެންދަވަނީ ބައިނަލްއަޤުވާމީ ޤާނޫނުތަކަށް ގޮންޖައްސަވަމުންނެވެ.