ޗައިނާގެ އެކި ކަންކޮޅުތަކުގައި ކޮވިޑް-19 ފެތުރެމުންދާ ހަލުވިމިނާ މެދު އެ ޤައުމުގެ ރައީސް ޝީ ޖިންޕިންގް ކަންބޮޑުވުން ފާޅުކުރައްވައިފިއެވެ. ބަލި ފެތުރުން ކޮންޓްރޯލް ކުރުމަށް އަޅާފައިވާ ހަރުކަށި ފިޔަވަޅުތައް ޗައިނާއިން ދޫކޮށްލާފައި ވަނީ 2022 ޑިސެންބަރު 7 ވަނަ ދުވަހުއެވެ.
އެއަށްފަހު، އެ ޤައުމުގެ އެކި ކަންކޮޅުތަކުގައި ހަލުވިކަމާ އެކު ބަލި ފެތުރެން ފެށިއެވެ. އަދި އެތަކެއް ހާސް ބަޔަކަށް ބަލި ޖެހެމުން ދިޔައެވެ. އެންމެ ގިނައީ އުމުރުން ދުވަސްވީ މީހުންނެވެ. އެންމެ ހަލުވިކަމާ އެކު ބަލި ފެތުރެމުން ދަނީ ވެރިރަށް ބެއިޖިންގްގެ އިތުރުން އާބާދީ ބޮޑު އެހެން ރަށްތަކުގައެވެ. އަދި، ޗައިނާގެ އައު އަހަރާ ދިމާކޮށް އެތަކެއް މިލިޔަން ރައްޔިތުންނެއް ރަށްފުށުގެ ސަރަޙައްދުތަކަށް ދަތުރުކުރަން ފަށާފައިވާއިރު، އެ ސަރަޙައްދުތަކަށް ބަލި ފެތުރިދާނެ ކަމުގެ ބިރު ވަނީ އިތުރުވެފައެވެ.
މި ދުވަސްވަރު، ރަށްފުށުގެ ސަރަޙައްދުތަކަށް ބަލި ފެތުރިދާނެތީ ޝީ ކަންބޮޑުވުން ފާޅުކުރައްވާފައިވާއިރު، އެ ސަރަޙައްދުތަކުގައި ޞިއްޙީ ފަރުވާގެ ނިޒާމު އިތުރަށް ހަރުދަނާކުރަން މަސައްކަތް ކުރަމުންދާ ކަން އޭނާ ވަނީ އިޢުލާނު ކުރައްވާފައެވެ. އަދި، ބަލި ފެތުރުން ކޮންޓްރޯލް ކުރަން ގިނަގުނަ މަސައްކަތްތަކެއް ކުރަން ޖެހިފައިވާ ކަމުގައި ވެސް އޭނާ ވަނީ ވިދާޅުވެފައެވެ.
ޖަނަވަރީއާއި ފެބުރުވަރީ މަހުގެ ތެރޭގައި ޗައިނާގެ އެކި ކަންކޮޅުތަކުގައި ދެ ބިލިޔަނަށްވުރެ ގިނަ ދަތުރު ކުރާނެ އެ ޤައުމުގެ ދަތުރުފަތުރާ ބެހޭ އިދާރާތަކުން އަންދާޒާ ކުރެއެވެ. މިއީ، ހުސްވި 2022 ވަނަ އަހަރާ އަޅައިބަލާއިރު ދެ ގުނަ އިތުރު ޢަދަދެކެވެ. އަދި، ކޮވިޑްގެ ބަލިމަޑުކަމުގެ ކުރިއާ އަޅައިބަލާއިރު، 70 އިންސައްތަ އިތުރު ޢަދަދެކެވެ.
ޖަނަވަރީ 18 ވަނަ ދުވަހު އެކަނިވެސް އެ ޤައުމުގައި 30.2 މިލިޔަން މީހުން އެއް ރަށުން އަނެއް ރަށަށް ދަތުރުކޮށްފައިވާ ކަމުގައި އެ ޤައުމުން ބުނެއެވެ. މީގެ ތެރޭގައި ގިނައީ، އައު އަހަރުގެ ޗުއްޓީއަށް، އަމިއްލަ ރަށަށް ދަތުރުކުރި މީހުންނެވެ. މިއާއެކު، ރަށްފުށުގެ ސަރަޙައްދުތަކަށް ބަލި ފެތުރި، ކޮވިޑްގެ ހާލަތު އިތުރަށް ގޯސްވާނެ ކަމަށް މަސްރަޙު ދިރާސާ ކުރާ ފަރާތްތަކުން އަންދާޒާ ކުރެއެވެ.
ބަލި ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތައް އުވައިލި ފަހުން އެ ޤައުމުން މި ބަލީގައި މަރުވެފައި ވަނީ އެންމެ 37 މީހުން ކަމަށް ކުރިން ރިޕޯޓުކުރިއެވެ. ނަމަވެސް، ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)ގެ ފިއްތުންތަކާ އެކު، ޗައިނާއިން ވަނީ ބަލީގައި މަރުވަމުންދާ މީހުންގެ ފުރިހަމަ ޢަދަދުތައް ހާމަކުރަން ފަށާފައެވެ.
ޖަނަވަރީ 20 ވަނަ ދުވަހު އެ ޤައުމުން ވަނީ، ފިޔަވަޅުތައް އުވައިލި ފަހުން ބަލީގައި މަރުވެފައިވާ މީހުންގެ ޢަދަދު 60,000 އިން މައްޗަށް އަރާފައިވާ ކަން ފުރަތަމަ ފަހަރަށް ހާމަކޮށްފައެވެ. މިއީ، ކަންބޮޑުވާން ޖެހޭ ފަދަ މަތީ ޢަދަދެކެވެ. ނަމަވެސް، އައު އަހަރާ ގުޅިގެން ދަތުރުތައް އިތުރުވެފައިވާ މި ދަނޑިވަޅުގައި އެ ޤައުމުގައި ދުވާލެއްގެ މައްޗަށް 35,000 އަށްވުރެ ގިނަ މީހުން މަރުވެދާނެ ކަމަށް މަސްރަޙު ދިރާސާ ކުރާ މާހިރުން އަންދާޒާ ކުރެއެވެ.
ކޮވިޑް ބަލީގައި މި އަހަރުގެ ތެރޭގައި ޗައިނާއިން އެއް މިލިޔަނަށް ވުރެ ގިނަ މީހުން މަރުވާނެ ކަމަށް ވެސް، މަސްރަޙު ދިރާސާ ކުރާ ފަރާތްތަކުން ދަނީ އަންޒާދާ ކުރަމުންނެވެ. އަދި، މި ޖަނަވަރީ މަސް ނިމުމުގެ ކުރިން އެ ޤައުމުގައި ބަލި ޖެހިފައިވާ މީހުންގެ ޢަދަދު 62 މިލިޔަނަށް އަރާނެ ކަމަށް ވެސް އެ ފަރާތްތަކުގެ ހިސާބުތަކުން ދައްކައެވެ.
ނަމަވެސް، ޗައިނާއިން ބުނީ، ކޮވިޑްގެ ހާލަތު ގޯސްވެ، ހޮސްޕިޓަލުގައި އެޑްމިޓްކޮށްގެން ފަރުވާދެމުންދާ މީހުންގެ ޢަދަދު 40 އިންސައްތައަށް ދަށްވެފައިވާ ކަމުގައެވެ. މި ޢަދަދު އެންމެ މައްޗަށް އުފުލިފައި ވަނީ ޖަނަވަރީ 5 ވަނަ ދުވަހު ކަމަށް އެ ޤައުމުން ބުނެއެވެ. ޗައިނާގެ ހާލަތު ގޯސްވެފައިވާތީ، ބައެއް ޤައުމުތަކުން ވަނީ ޗައިނާގެ ދަތުރުވެރިންގެ ފުށުން ބަލި ފެތުރުން ކޮންޓްރޯލް ކުރުމަށް ފިޔަވަޅުތަކެއް ވެސް އަޅާފައެވެ.