ޔޫކްރެއިންގެ ދިފާޢުގައި ކުރަމުންދާ ހަނގުރާމައިގައި އެހީތެރިވުމުގެ ގޮތުން އެ ޤައުމުގެ އަސްކަރިއްޔާއަށް އިތުރު ބަރުހަތިޔާރު ފޯރުކޮށްދޭން ނިންމާފައިވާ ކަމުގައި ނޭޓޯގެ އިސްވެރިޔާ ޔެންސް ސްޓޮލްޓެންބަރގް ވިދާޅުވެއްޖެއެވެ. މި ކަމާ ގުޅޭ ގޮތުން މަޝްވަރާ ކުރުމަށް ޖަރުމަނު ވިލާތުގައި ހުންނަ އެމެރިކާގެ ރެމްސެޓެއިން އަސްކަރީ މަރުކަޒުގައި ސަރަޙައްދީ ބައްދަލުވުމެއްގެ ވަނީ ބާއްވާފައެވެ.
50 އަށްވުރެ ގިނަ ޤައުމުގެ ދިފާޢީ ދާއިރާގެ މަންދޫބުން ބައިވެރިވި މި ބައްދަލުވުމުގެ ބައިވެރިންގެ ތެރޭގައި އެމެރިކާގެ ދިފާޢީ ވަޒީރު ލޮއިޑް އޮސްޓިން ވެސް ހިމެނެއެވެ. އަދި ނޭޓޯގެ މެންބަރު ޤައުމުތަކުގެ ތެރޭގައި ހިމެނޭ 30 ޤައުމުގެ އޮފިޝަލުން ބައިވެރިވިއެވެ. މި ކަމާ މެދު މަޝްވަރާތައް ބާއްވާފައި މި ވަނީ، ނޭޓޯގެ ނިންމުންތައް އަވަސްކުރުމަށް ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ގޮވައިލައްވާފައިވާ ދަނޑިވަޅެއްގައެވެ.
"ބައްދަލުވުމުގެ މައިގަނޑު ބޭނުމަކީ ޔޫކްރެއިނުގެ އަސްކަރިއްޔާއަށް އެންމެ ޒަމާނީ ބަރު ހަތިޔާރު ފޯރުކޮށްދިނުމާ ގުޅޭ ގޮތުން މަޝްވަރާކުރުން. ޔޫކްރެއިނުގެ ދިފާޢުގައި ކުރަމުންދާ ހަނގުރާމައިގެ ނަތީޖާގެ އަސަރު ނޭޓޯގެ ހުރިހާ ޤައުމަކަށް ކުރާނެ. އަދި، އެއީ ނޭޓޯއިން ޤަބޫލުކުރާ އަސާސްތަކަށް އަސަރު ކުރުވާނެ ހަނގުރާމައެއް،" ސްޓޮލްޓެންބަރގް ވިދާޅުވިއެވެ.
މި ބައްދަލުވުމަށް ފަހު، ނޭޓޯގެ ޤައުމުތަކުން ޔޫކްރެއިނަށް ބަރުހަތިޔާރު ފޯރުކޮށްދޭނެ ކަން އިޢުލާނު ކުރަން ހަމަޖެހިފައިވާއިރު، އިނގިރޭސިވިލާތުން މިހާރު ވެސް ވަނީ އެ ޤައުމަށް އެންމެ ފަހުގެ ޓޭންކުތައް ފޮނުވާނެ ކަން އިޢުލާނުކޮށްފައެވެ. އިނގިރޭސިވިލާތަކީ، "ޗެލެންޖަރ 2" މަރުކާގެ ޒަމާނީ ޓޭންކު ފަދަ ހަތިޔާރު ޔޫކްރެއިނަށް ފޯރުކޮށްދޭނެ ކަމަށް ބުނި ހުޅަނގުގެ ފުރަތަމަ ޤައުމެވެ.
އެމެރިކާއިން ވެސް ވަނީ "ބްރެޑްލީ" މަރުކާގެ އަސްކަރީ އުޅަނދު ޔޫކްރެއިނަށް ފޮނުވާނެ ކަން އިޢުލާނުކޮށްފައެވެ. އަދި، ފަރަންސޭސިވިލާތުން ވަނީ "އޭ.އެމް.އެކްސް-10 އާރް.ސީ" މަރުކާރުގެ އަސްކަރީ އުޅަނދުތައް ޔޫކްރެއިނަށް ފޮނުވާނެ ކަމަށް ބުނެފައެވެ. މި ފަދަ ހަތިޔާރުތައް ޔޫކްރެއިނަށް ފޮނުވަން ހުޅަނގުގެ ޤައުމުތަކުން މީގެ ކުރިން ވަނީ ދެކޮޅު ހަދާފައެވެ.
ރަޝިޔާ ސިފައިން ޔޫކްރެއިނަށް ފޮނުވައި ހަނގުރާމަ ފަށާފައި ވަނީ 2022 ފެބުރުވަރީ 24 ވަނަ ދުވަހުއެވެ. ޒެލެންސްކީ ވިދާޅުވަނީ، ޒަމާނީ ހަތިޔާރާ ނުލައި ހަނގުރާމަ ކާމިޔާބު ކުރުމަކީ އެ ޤައުމުގެ އަސްކަރިއްޔާއަށް ކުޅަދާނަ ކަމެއް ނޫން ކަމުގައެވެ. އަދި، އެ ޤައުމަށް އަރާފައިވާ ރަޝިޔާ ސިފައިން ފަހަތަށް ޖައްސަން ބާރުގަދަ ހަތިޔާރު ބޭނުންވާނެ ކަމަށް މަސްރަޙު ދިރާސާކުރާ ފަރާތްތަކުން ވެސް ދަނީ ބުނަމުންނެވެ.
"ހުޅަނގުގެ މިނިވަން ޤައުމުތަކުން ވިސްނަން ހޭދަކުރާ މުއްދަތުގެ ތެރޭގައި ރަޝިޔާގެ ޓެރެރިސްޓު ސިފައިން ދަނީ ޔޫކްރެއިނުގެ ރައްޔިތުން މަރަމުން. ޖަނަވަރީ 14 ވަނަ ދުވަހު މިސައިލް ހަމަލާތަކެއްދީ، ޑްނިޕްރޯގައި ދިރިއުޅޭ ޢާންމުންގެ 45 މީހުން މަރައިލަން ރަޝިޔާއަށް ބޭނުންވީ އެންމެ ތިން މިނެޓު،" ޑާވޯސްގައި ކުރިއަށްދިޔަ ދުނިޔޭގެ އިޤުތިޞާދާ ބެހޭ ސަމިޓުގައި ވާހަކަފުޅު ދައްކަވަމުން ޒެލެންސްކީ ވިދާޅުވިއެވެ.
މި ގޮވައިލުމަށް އިޖާބަދީ، ޔޫކްރެއިނަށް "ލެޕަރޑް" މަރުކާރުގެ ޒަމާނީ ޓޭންކުތައް ފޯރުކޮށްދޭން ޖަރުމަނުވިލާތުން ވެސް ދަނީ ވިސްނަމުންނެވެ. ޑްނިޕްރޯއަށް ދިން ހަމަލާތަކުގައި ޢާންމުން ދިރިއުޅޭ ޢިމާރާތްތަކަށް ގެއްލުންވެ، ވެއްޓުނު ޢިމާރާތްތަކުގެ ދަށުގެ 20 މީހަކު ގެއްލިފައިވާ ކަމަށް ޔޫކްރެއިނުން ބުނެއެވެ.
ޔޫކްރެއިން ދިފާޢުކުރަން އެ ޤައުމުގެ ސިފައިން ކުރަމުންދާ ހަނގުރާމައިގައި އެ ޤައުމަށް އެންމެ ބޮޑަށް އަސްކަރީ ގޮތުން އެހީތެރިކަން ފޯރުކޮށްދެމުންދާ ޤައުމަކީ އެމެރިކާއެވެ. ދެވަނައަށް އޮތީ އިނގިރޭސިވިލާތެވެ. އަދި، ޖަރުމަނުވިލާތުން ވަނީ އެ ޤައުމަކީ، ޔޫކްރެއިނަށް އަސްކަރީ ގޮތުން އެންމެ ބޮޑަށް އެހީތެރިކަން ފޯރުކޮށްދެމުންދާ ޤައުމުތަކުގެ ތެރެއިން ތިންވަނައަށް އޮތް ޤައުމު ކަމުގައި ބުނެފައެވެ.
"ޖަރުމަނުވިލާތުން ޔޫކްރެއިނަށް ހަތިޔާރު ފޯރުކޮށްދިން ނަމަވެސް، މިއީ ރަޝިޔާއާއި ނޭޓޯއާ ދެމެދު ހިނގާ ހަނގުރާމައަކަށް ބަދަލުވާން ޖަރުމަނުން ބޭނުމެއް ނޫން،" ޖަރުމަނުވިލާތުގެ ޗާންސެލަރ އޯލާފް ޝޮލްޒް ވިދާޅުވިއެވެ. ޖަރުމަނުން ފޮނުވާފައިވާ "އައިރިސް-ޓީ" މަރުކާގެ މިސައިލް ޑިފެންސް ސިސްޓަމްތައް ޔޫކްރެއިނުގައި މިހާރުވެސް ދަނީ ބޭނުން ކުރަމުންނެވެ.