އެމެރިކާގެ އެކި ކަންކޮޅުތަކަށް މިހާރު ކުރިމަތިވެފައިވާ ފިނީގެ ތޫފާނުގައި އެތަކެއް ހާސް ބަޔަކު ހާލުގައި ޖެހިއްޖެއެވެ. މި ތޫފާނުގެ އަސަރު އެންމެ ބޮޑަށް ކުރަމުން ދަނީ ނިއު ޔޯކް ސްޓޭޓްގެ ސަރަޙައްދުތަކަށެވެ. އެ ސްޓޭޓްގެ ގިނަ ސަރަޙައްދުތަކަށް ދަނީ ބޯކޮށް ސްނޯ ފައިބަމުންނެވެ. އެންމެ ބޮޑުވަރުވެފައި ވަނީ އެ ސްޓޭޓްގެ އީރީ ކައުންޓީއާއި ބަފަލޯއަށެވެ.
މި ތޫފާނާ ގުޅިގެން ހިނގާފައިވާ އެކި ހާދިސާތަކުގައި މަރުވެފައިވާ މީހުންގެ އަދަދު މިހާރު ވަނީ 59 އަށް އަރާފައެވެ. އެންމެ ގިނަ މީހުން މަރުވެފައި ވަނީ އީރީ ކައުންޓީގައި ކަމަށް އެ ޤައުމުގެ މީޑިޔާތަކުން ރިޕޯޓު ކުރެއެވެ. އެ ރަށުގައި މަރުވެފައިވާ މީހުންގެ އަދަދު 37 އަށް އަރައެވެ.
ބޯކޮށް ސްނޯ ފޭބުމާއި ބާރު ވަޔާ އެކު އެ ސަރަޙައްދުގެ ވައިގެ އުދުހުންތަކަށް ވެސް ވަނީ ބުރޫއަރާފައެވެ. ތޫފާނާ ގުޅިގެން ހާހުން ވައިގެ ދަތުރުތައް ކެންސަލް ކޮށްފައިވާއިރު، އެތަކެއް ހާސް ބަޔަކު ވަނީ ވައިގެ ބަނދަރުތަކުގައި ތާށިވެ، ހާލުގައި ޖެހިފައެވެ. މީގެ ތެރޭގައި ފަސިންޖަރުންނާއި ޕައިލެޓުންނާއި ފްލައިޓް އެޓެންޑެންޓުންގެ އިތުރުން އެއަރޕޯޓުތަކުގައި މަސައްކަތް ކުރާ މުވައްޒަފުން ވެސް ހިމެނެއެވެ.
މި ތޫފާނުގެ ސަބަބުން އެންމެ ބޮޑު ގެއްލުމެއް ލިބިފައި ވަނީ ސައުތްވެސްޓް އެއަރލައިންސްއަށެވެ. އެ އެއަރލައިންގެ 2,500 އަށްވުރެ ގިނަ ފްލައިޓް ކެންސަލްކޮށްފައިވާއިރު، އެތަކެއް ހާސް ފަސިންޖަރުންނެއް އަދި ވެސް ތިބީ ވައިގެ ބަނދަރުތަކުގައި ތާށިވެފައެވެ. މި ކަމާ ގުޅިގެން އެއަރލައިންގެ ހުރިހާ ނިޒާމުތަކަކަށް ހުއްޓުން އައިސްފައިވާ ކަމުގައި ރިޕޯޓުތައް ބުނެއެވެ. ބައެއް ފަސިންޖަރުން ވަނީ، އެ އެއަރލައިނާ ދެކޮޅަށް ދަޢުވާ ކުރަން ވެސް ނިންމާފައެވެ.
ތޫފާނާ އެކު ކަރަންޓު ވިއުގައަށް ވެސް ބޮޑެތި ގެއްލުންތަކެއް ލިބި، ބަފަލޯގެ ގިނަ ސަރަޙައްދުތަކުން ކަރަންޓުގެ ޚިދުމަތް ވަނީ މެދުކެނޑިފައެވެ. އަދި، އެ ސަރަޙައްދުތަކަށް އެ ޚިދުމަތް އަލުން ގުޅައިދިނުމަށް އޮފިޝަލުން ދަނީ މަސައްކަތް ކުރަމުންނެވެ.
މި ތޫފާނުގެ އަސަރު ނިއު ޔޯކް ސްޓޭޓްގެ އިތުރުން ޓެކްސަސް އަދި ފްލޮރިޑާގެ ސަރަޙައްދުތަކަށް ވެސް ދަނީ ކުރަމުންނެވެ. އަދި، ކަރަންޓުގެ ޚިދުމަތް ކެނޑުމުގެ ސަބަބުން ގެދޮރުގެ ފިނިހޫނުމިން މަތިކުރުމަށް ދަތިވެ، މަގުތަކަށް ނިކުތް ގިނަ އަދަދެއްގެ ބަޔަކު އެ މީހުންގެ ދުއްވާ އުޅަނދުފަހަރުގައި ބަންދުވެފައިވާ ކަމުގައި ރިޕޯޓުތައް ބުނެއެވެ.
ހައިވޭތަކާއި އެހެން މަގުތަކުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އެމެރިކާގެ ނޭޝަނަލް ގާޑުގެ ސިފައިން މިހާރު ދަނީ މަސައްކަތް ކުރަމުންނެވެ. އަދި، އެ މީހުން ދަނީ، ގެއިންގެޔަށް ހިނގައި، ގެދޮރުގައި ތާށިވެފައިވާ މީހުންނަށް އެހީތެރިކަން ފޯރުކޮށްދެމުންނެވެ. ސްނޯ ފައިބަމުންދާތީ ބަފަލޯގެ މަގުތަކުގައި ދުއްވުން ވެސް މިހާރު ވަނީ މަނާކޮށްފައެވެ.
ނަމަވެސް، ނިއު ޔޯކް ސްޓޭޓްގެ ބައެއް ސަރަޙައްދުތަކުގެ ފިނިހޫނުމިން މިހާރު ވަނީ އުފުލެން ފަށާފައެވެ. އަދި މިއާއެކު އިތުރު ބިރުވެރިކަމެއް މި ވަނީ އުފެދިފައެވެ. ފައިބާފައިވާ ސްނޯތައް ވިރި، ރަށްތަކުގައި ފެންބޮޑުވާނެ ކަމުގެ ބިރު ވަނީ ހީވެފައެވެ. މި ކަމަށް ތައްޔާރުވުމުގެ ގޮތުން އެ ސްޓޭޓްގެ ގަވަރުނަރު ކެތީ ހޯޗަލް ވަނީ ރައްކާތެރިކަމުގެ ފިޔަވަޅުތައް އެޅުމަށް ގޮވައިލައްވާފައެވެ.