ކެމްބޯޑިޔާގެ ހޮޓަލެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 10 މީހުން މަރުވެއްޖެއެވެ. މި ހާދިސާ ހިނގާފައިވާ އެ ޤައުމާއި ތައިލެންޑު ގުޅޭ ސަރަޙައްދީ ރޮނގު ކައިރީގައި އޮންނަ ރަށެއް ކަމުގައިވާ ޕިއޮޕެޓްގައި ހުންނަ ގްރޭންޑް ޑަޔަމަންޑް ސިޓީ ހޮޓަލުގައެވެ. އަލިފާނުގެ ހާދިސާ ހިނގާފައިވާ ހޮޓަލަކީ ފަތުރުވެރިންގެ މެދުގައި މަޤުބޫލު ތަނެކެވެ.
މި ހާދިސާގައި ހިނގި ވަގުތު ހޮޓަލުގައި 400 އަށްވުރެ ގިނަ މީހުން ތިބި ކަމުގައި ޕިއޮޕެޓްގެ ފުލުހުން ބުނެއެވެ. އަލިފާނުގެ ހާދިސާގައި އެކި ވަރުގެ އަނިޔާތައް ލިބުނު 30 މީހަކަށް ހޮސްޕިޓަލުގައި ފަރުވާދެމުންދާ ކަމުގައި ވެސް ފުލުހުން ބުނެއެވެ. ގިނަ ބަޔަކަށް އަނިޔާވީ، އަލިފާންގަނޑުން ރައްކާތެރިކަން ހޯދުމަށް، ހޮޓަލުގެ ކުޑަދޮރުތަކުން ބޭރަށް ފުންމައިލުމުގެ ސަބަބުން ކަމުގައި މަންޒަރު ފެނުނު މީހުން ބުނެއެވެ.
މި ހާދިސާ ހިނގި ވަގުތު ހޮޓަލުގައި ގިނަ އަދަދެއްގެ ފަތުރުވެރިން ތިބި ކަމުގައި ކެމްބޯޑިޔާގެ ފުލުހުން ބުނެއެވެ. އަދި، ތައިލެންޑުގެ ޚާރިޖީ ވުޒާރާއިން ވެސް ވަނީ، މި ހާދިސާގައި ޒަޚަމުވި މީހުންގެ ތެރޭގައި އެ ޤައުމުގެ ރައްޔިތުން ހިމެނޭ ކަމަށް ބެލެވޭތީ، އެ ކަން ކަށަވަރު ކުރުމަށް މަސައްކަތް ކުރަމުންދާ ކަމުގައެވެ.
ހޮޓަލުގައި ރޯވި އަލިފާންގަނޑު ނިއްވައިލުމަށް ތައިލެންޑުގެ އަލިފާން ނިއްވާ ޓީމުތަކުން ވަނީ އެހީތެރިކަން ފޯރުކޮށްދީފައެވެ. އަދި، ތައިލެންޑުން ވަނީ އަލިފާން ނިއްވާ ލޮރީތައް ޕިއޮޕެޓްއަށް ފޮނުވާފައެވެ. ހޮޓަލުގައި އަލިފާން ރޯވާން މެދުވެރިވި ސަބަބު ދެނެގަތުމަށް ތަހުޤީޤު ފަށާފައިވާއިރު، ފުރަތަމަ ރޯވެފައި ވަނީ ހޮޓަލުގެ ފުރަތަމަ ފަންގިފިލާގައި ކަމަށް ބެލެވޭ ކަމުގައި ތަހުޤީޤީ ޓީމުތަކުން ބުނެއެވެ.