3 ނޮވެމްބަރު 1988 ވަނަ ދުވަހު ރާއްޖެއަށް އުދުވާނީ ހަމަލާ ދިން އިރު ހުންނެވީ ޓެލެވިޜަން މޯލްޑިވްސްގައި ކަމަށާއި އޭގެ އަނެއް ދުވަހު މެންދުރާ ހަމައަށް ވެސް އަވަދިނެތި އުޅުއްވީ ބޭރުގެ އެކި ފަރާތްތަކަށް ކަމާބެހޭ ފަހުގެ މަޢުލޫމާތު ފޯރުވައި ދެއްވުމުގައި ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގައި ނޫސްވެރިންނާ ބައްދަލުކުރައްވާ ވާހަކަފުޅުދައްކަވަމުންނެވެ. ރައީސުލްޖުމްހޫރިއްޔާ ވިދާޅުވީ އެހަމަލާދިން އިރު ހުންނެވީ ޓެލެވިޜަން މޯލްޑިވްސްގައި ކަމަށާއި އެވަގުތު ތަނުގައި ތިބީ އެމަނިކުފާނާއި އިތުރު އެހެން ބޭފުޅަކު އެކަނި ކަމަށެވެ. އެހެންކަމުން ވަރަށް ގިނަ ބޭރުގެ ފަރާތްތަކަށް ކަން ހިނގި ގޮތް ކިޔާ ދެއްވަމުން ގެންދެވި ކަމަށާއި ޖެހިގެން އައި ދުވަހު މެންދުރުވަންދެން މިގޮތުގައި ހުންނެވި ކަމަށެވެ.
ނަސްރުގެ ދުވަސް ފާހަގަ ކުރުމާ ގުޅޭގޮތުން ނޫސްވެރިއެއްގެ ސުވާލަށް ޖަވާބު ދެއްވަމުން ރައީސުލްޖުމްހޫރިއްޔާ ވިދާޅުވީ ނަސްރުގެ ދުވަސް މިހާތަނަށްވެސް ފާހަގަ ކުރަމުން ގެންދަނީ ކުރިންވެސް އެކަން ކުރަމުން އައިގޮތަށް ކަމަށާއި އެކަމަށް އެއްވެސް ބަދަލެއް އެމަނިކުފާނު ނުގެންނަވާ ކަމަށެވެ. އަދި މިދުވަސް ފާހަގަ ކުރަމުން އަންނަ ގޮތައް ބަދަލެއް ގެންނަން ޖެހޭ ކަމަށްވާނަމަ އެކަން ކުރާނީ ކޮންގޮތަކަށްތޯ މަޝްވަރާކޮށްގެން އެބަދަލާ އެކި ކުރެވޭނެ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ކުރިން ކުރަމުން އައި ކަމެއް ހުއްޓާ ނުލައްވާ ކަމަށާއި، އޭރު އޮތް ގޮތަކަށް ކުރިއަށް ގެންދަނީ ކަމަށެވެ. ސަރުކާރުގެ ދުވަސްތައް ފާހަގަކުރުމުގައި އުސޫލްތައް ކަނޑައެޅިފައި އޮންނަކަން ހާމަކުރައްވަމުން ރައީސުލްޖުމްހޫރިއްޔާ ވިދާޅުވީ މިހާރުވެސް އެކި ދުވަސްތައް ފާހަގަކުރަމުން ދަނީ އެކަމެއް ކުރަން އޭރު ކަނޑައަޅާފައިވާ ގޮތައް ކަމަށެވެ.