ރަޙުމްކުޑަގޮތަކަށް މަރާލާފައި އޮއްވާ ފެނުނު އުމުރުން 22 އަހަރުގެ ޝިއާއު މުހައްމަދު ސައީދު (ޝިއާ) މަރުގެ މައްސަލާގައި އޭނާގެ ގާތިލް އަލީ ޝާހިލްގެ މައްޗަށް މަރުގެ ދައުވާކޮށްފިއެވެ.
މިދިޔަ އޯގަސްޓު މަހުގެ 7 ވަނަ ދުވަހު ހ. ޝީރީންވިލާގައި މަރާލާފައި އޮއްވާ ޝިއާއުގެ ހަށިގަނޑު ފެނުނު އިރު އޭނާގެ ހަށިގަނޑުން ބޮޑެތި އަނިޔާތަކެއް ދީފައިވާކަމަށް ފުލުހުން ވިދާޅުވެފައިވެއެވެ. އެރޭ އެތަނުން އޭނާގެ ހަށިގަނޑު ބޮޑީ ބޭގުގައި ފުލުހުން ގެންދިޔައީ ދެ ކޮތަޅަކަށް އަޅައިގެންނެވެ. މި މައްސަލާގައި ހައްޔަރުކޮށްފައި ވަނީ ފ. ނިލަންދޫ، ފިނިފެންމާގޭ، ޢުމުރުން 23 އަލީ ޝާހިލްއެވެ.
ޢަލީ ސާހިލްގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އެވެ. މީގެ އިތުރުން އިތުރު ހަތަރު ދައުވާއެއް ވެސް ވަނީ އެނާގެ މައްޗަށް އުފުލާފައެވެ. އެހެންނަމަވެސް, އެ ދައުވާތަކުގެ ތަފްސީލެއް ޕީޖީ އޮފީހަކުން ހާމައެއް ނުކުރެ އެވެ.
ޝިއާއުގެ މަރުގެ މައްސަލައަށް ޝާހިލްގެ އެއްބާރުލުން އެކަށީގެންވާ ވަރަށް ލިބިފައި ނުވާކަމަށް ފުލުހުންވަނީ ވިދާޅުވެފައެވެ. އެހެންނަމަވެސް އޭނާގެ ފޯނު ހުޅުވާ، އޭގެ ޑާޓާތައް ފުލުހުންް ނަގާފައިވާކަންވެސް ފުލުހުން ކުރިންވަނީ ހާމަކޮށްފައެވެ. ފުލުހުން ކުރިން ވިދާޅުވީ ޝާހިލް، ޝިއާއު މަރާލިކަން ސާބިތުވާނެ ވަރަށް އެކަށީގެންވާ ހެކި ހުރިނަމަވެސް މައްސަލާގައި އޭރު ދައުވާ ނުއުފުލައި މަޑުކުރީ ހަމަލާގެ މޯޓިވް ދެނެގަތުމަށްކަމަށެވެ.
މި މައްސަލާގައި ފުލުހުން ބެލި ބެލުމުން މިކަމުގައި އިތުރު އެއްވެސް މީހެއްގެ ބައިވެރިވުމެއް އޮތްކަން އަދި ތަހުގީގަށް އެނގިފައި ނުވާކަމަށާ، މިއީ ކުރިން ރޭވިގެން ހިންގާފައިވާ އަމަލެއްކަމަށް ނުބެލެވޭ ކަމަށްވެސް ފުލުހުން ވަނީ ވިދާޅުވެފައެވެ.
މި މައްސަލާގައި 45އަށްވުރެ ގިނަ މީހުންނާ ސުވާލުކޮށް، މައްސަލައާއި ގުޅުންހުރި އެކިއެކި ތަންތަނުގެ ސީސީޓީވީ ފުޓޭޖު ބަލައި ދިރާސާކޮށްފައިވާ ކަމަށްވެސް ފުލުހުން ވަނީ ވިދާޅުވެފައެވެ.
އަނިޔާވެރިގޮތަކަށް ޝިއާއު މަރާލާފައި އޮއްވާ ފެނުނީ އޭރު ޝާހިލް ދިރިއުޅެމުން ދިޔަ ގޭ ތެރެއިންނެވެ. ފުލުހުން ވިދާޅުވިގޮތުގައި އޭނާއަށް ދީފައިވާ ބައެއް އަނިޔާތަކަކީ އޭނާ މަރުވިފަހުން ދީފައިވާ އަނިޔާތަކެކެވެ.