ސޫރިޔާގެ ރައީސް ބައްޝާރުލް އަސަދުގެ ސަރުކާރަށް ވަފާތެރި ސިފައިންގެ ފައުޖަކުން، ސަރުކާރާ ދެކޮޅު ހަނގުރާމަވެރި ޖަމާޢަތެއްގެ މެންބަރުންނަށް އަމާޒުކޮށް ވަރުގަދަ ހަމަލާތަކެއްދީ، ހަނގުރާމަވެރިންގެ އަށް މީހުން މަރައިލައިފިއެވެ. މި ކުރިމަތިލުންތައް ހިނގާފައި ވަނީ ސޫރިޔާގެ ހުޅަނގުއުތުރުގެ ސަރަޙައްދުގައެވެ. މަރައިލާފައިވާ ހަނގުރާމަވެރިންނަކީ، ތުރުކީ ވިލާތުން ވާގިވެރިވާ ޖަމާޢަތަކަށް ނިސްބަތްވާ ބަޔެކެވެ.
ސޫރިޔާގެ ސަރުކާރާ ދެކޮޅަށް ހަނގުރާމަ ކުރަމުންދާ ޖަމާޢަތެއް ކަމުގައިވާ ފައިލާޤް އަލްޝާމްއިން ބުނީ، އަސަދަށް ވަފާތެރި ސިފައިން ދިން ވަރުގަދަ ހަމަލާތަކެއްގައި އެ ޖަމާޢަތުގެ ހަ މީހުން މަރައިލާފައިވާ ކަމުގައެވެ. މި ހަމަލާތަކުގައި ހަނގުރާމަވެރިންގެ އިތުރު ދެ މީހަކު ޒަޚަމުވިއެވެ. އަދި، ތުރުކީ ވިލާތާ ގުޅޭ ސަރަޙައްދާ ރޮނގު ކައިރީގައި އޮންނަ އަފްރިން ޕުރޮވިންސުގައި ދިން ހަމަލާތަކެއްގައި އެ ޖަމާޢަތުގެ އިތުރު ދެ މީހަކު ވަނީ މަރައިލާފައެވެ.
ފައިލާޤް އަލްޝާމަކީ، ތުރުކީ ވިލާތުގެ ސަރުކާރަށް ތާޢީދުކުރާ، އެ ޤައުމަށް ވަފާތެރި ހަނގުރާމަވެރިންގެ ޖަމާޢަތެކެވެ. އަދި، ސޫރިޔާގެ މުސްލިމް ބްރަދަހުޑް ޖަމާޢަތާ ވެސް ގާތް ގުޅުމެއް ބާއްވާ ޖަމާޢަތެކެވެ. ސޫރިޔާގެ ދާޚިލީ ހާލަތު ދިރާސާ ކުރާ ސީރިޔަން އޮބްޒަވޭޓަރީ ފޯރ ހިޔުމަން ރައިޓްސްއިން ބުނީ، ހަނގުރާމަވެރި ޖަމާޢަތްތަކަށް ހަމަލާދިނުމުގައި، ސޫރިޔާގައި ހަރަކާތްތެރިވާ ކުރުދީންގެ ޖަމާޢަތްތަކުން ވެސް އަސަދުގެ ސިފައިންނަށް އެހީތެރިކަން ފޯރުކޮށްދީފައިވާ ކަމުގައެވެ.
މި ހަމަލާތަކަށް ފަހު، ފައިލާޤް އަލްޝާމްގެ އަތްދަށުގައިވާ ބައެއް ސަރަޙައްދުތަކަށް ސޫރިޔާގެ ސަރުކާރު ސިފައިންނާއި ކުރުދީ ހަނގުރާމަވެރިން އަތްގަދަކޮށްފައިވާ ކަމުގައި ވެސް އެ ޖަމުޢިއްޔާއިން ބުނެއެވެ. އަދި، ޑިސެންބަރު 25ގައި ފެށި އުދުވާންތައް އޭގެ އަނެއް ދުވަހުގެ އިރުއޮއްސުމާ ހަމައަށް ކުރިއަށްގެންދިޔަ ކަމުގައި ވެސް އެ ޖަމުޢިއްޔާއިން ބުނެއެވެ.
ސޫރިޔާގައި ހަރަކާތްތެރިވާ ކުރުދީންގެ ހަނގުރާމަވެރިން ޖަމާޢަތްތަކާ ދެކޮޅަށް ތުރުކީ ވިލާތުގެ އަސްކަރިއްޔާއިން ހިންގާ އަސްކަރީ ކެމްޕޭންތަކުގައި ފައިލާޤް އަލްޝާމް ޖަމާޢަތުގެ ހަނގުރާމަވެރިން ދަނީ ބައިވެރިވަމުންނެވެ. ނަމަވެސް، މި ހަފުތާގައި ހިންގާފައިވާ އުދުވާންތަކަކީ، ތުރުކީ ވިލާތުން ކުރުދީންނާ ދެކޮޅަށް ހިންގަމުންދާ އަސްކަރީ ކެމްޕޭނާ ގުޅޭ އުދުވާންތަކެއް ނޫން ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.