އެމެރިކާގެ އެކި ކަންކޮޅުތަކަށް މިހާރު ކުރިމަތިވެފައިވާ ފިނީގެ ތޫފާނުގައި މިހާތަނަށް މަރުވެފައިވާ މީހުންގެ އަދަދު 55 އިން މައްޗަށް އަރާފައިވާ ކަމުގައި އެން.ބީ.ސީ.އިން ރިޕޯޓުކޮށްފިއެވެ. މި ތޫފާނާ އެކު އެމެރިކާގެ އެކި ހިސާބުތަކުގައި ފިނިހޫނުމިން ވަނީ ދަށަށް ގޮސްފައެވެ. އަދި، ގިނަ ސަރަޙައްދުތަކަށް ދަނީ ބޯކޮށް ސްނޯ ފައިބަމުންނެވެ.
މި ތޫފާނުގެ އަސަރު އެންމެ ބޮޑަށް ކުރަމުން ދަނީ ނިއު ޔޯކް ސްޓޭޓަށެވެ. މި ތޫފާނާ އެކު ކުރިމަތިވި އެކި ހާދިސާތަކުގައި އެ ސްޓޭޓުން މަރުވި މީހުންގެ އަދަދު 25 އަށް އަރެއެވެ. މީގެ ތެރެއިން 12 މީހުންނަކީ، އެ ސްޓޭޓްގެ ހުޅަނގު ފަރާތުގައި އޮންނަ އީރީ ކައުންޓީގެ ރައްޔިތުންނެވެ. އަދި، އެ ސްޓޭޓްގެ ރަށެއް ކަމުގައިވާ ބަފަލޯއަށް ވެސް ބޯކޮށް ސްނޯ ފައިބަމުންދާ ކަމުގައި އެ ސަރަޙައްދުގެ އޮފިޝަލުން ބުނެއެވެ.
އީރީ ކައުންޓީގެ އޮޝަލެއް ކަމުގައިވާ މާކް ޕޮލޮންކަރޒް ވިދާޅުވީ، އީރީ ކައުންޓީގައި އޮންނަ ފެންގަނޑެއް ކަމުގައިވާ އީރީ ލޭކްގެ ކައިރީގައި މަރުވެފައިވާ ބަޔެއް މީހުންގެ ހަށިތައް ފެނިފައިވާ ކަމުގައެވެ. އަދި، އިތުރު ބަޔަކު މަރުވެފައި ތިއްބާ ފެނުނީ ދުއްވާ އުޅަނދުތަކެއްގެ ތެރޭގައެވެ. ބައެއް މީހުން މަރުވީ، ފައިބާފައިވާ ސްނޯ އެއް ފަރާތްކުރަން މަސައްކަތް ކުރަން އުޅުމުގެ ތެރޭގައި ކުރިމަތިވި ޞިއްޙީ މައްސަލަތަކެއްގައި ކަމަށް ބެލޭ ކަމުގައި އޭނާ ވިދާޅުވިއެވެ.
އީރީ ކައުންޓީގައި މަރުވި މީހުންގެ އަދަދު 12 އަށްވުރެ އިތުރުވާނެ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ. އަދި، ފާއިތުވި ހަފުތާ ބަންދުގައި މަރުވި މީހުންނާއި ފިނީގެ ތޫފާނާ ގުޅުމެއް ވޭތޯ ބެލުމަށް އޮފިޝަލުން މިހާރު ދަނީ މަސައްކަތް ކުރަމުންނެވެ. މިއީ ފާއިތުވި 45 ވަރަކަށް އަހަރުގެ ތެރޭގައި ނިއު ޔޯކް ސްޓޭޓަށް ކުރިމަތިވި އެންމެ ނުރައްކާތެރި ފިނީގެ ތޫފާނެވެ.
ބޯކޮށް ސްނޯ ފޭބުމާ ގުޅިގެން ބައެއް ސަރަޙައްދުތަކުން ކަރަންޓުގެ ޚިދުމަތް މެދުކެނޑިފައިވާއިރު، އެތަކެއް ހާސް ބަޔަކު އެ މީހުންގެ ގެދޮރުގައި ބަންދުވެފައިވާ ކަމަށް އޮފިޝަލުން ބުނެއެވެ. ބައެއް މީހުން އެންގަމު އުޅަނދުފަހަރުގައި ތާށިވެފައިވާ ކަމަށް ވެސް ރިޕޯޓުތައް ބުނެއެވެ. އެ މީހުންނަށް ކާބޯތަކެތި ފޯރުކޮށްދީ، އެހީތެރިވުމަށް އެމެރިކާގެ ނޭޝަނަލް ގާޑުގެ ސިފައިން މިހާރު ދަނީ ހަރަކާތްތެރިވަމުންނެވެ. ބޯކޮށް ސްނޯ ފޭބުމުގެ ސަބަބުން އީރީ ކައުންޓީއާއި ބަފަލޯގެ މަގުތައް ވަނީ ބަންދުވެފައެވެ.
ސްނޯގެ ތޫފާން ފެށުމާ އެކު އެމެރިކާގެ އެކި ކަންކޮޅުތަކުގައި 1.8 މިލިޔަން ގޭބީސީއަކުން ކަރަންޓުގެ ޚިދުމަތް މެދުކެނޑުނެވެ. ގިނަ ގޭބީސީތަކާއި ވިޔަފާރިތަކަށް މިހާރު އެ ޚިދުމަތް ގުޅައިދީފައިވާ ކަމުގައި އޮފިޝަލުން ބުނެއެވެ. ނަމަވެސް، 150,000 ގޭބީސީއާއި ވިޔަފާރިތަކަށް އަދިވެސް ކަރަންޓުގެ ޚިދުމަތެއް ނުލިބެއެވެ. މީގެ ތެރޭގައި ބަފަލޯގެ 15,000 ގޭބީސީ ހިމެނެއެވެ.
ނިއު ޔޯކް ސްޓޭޓަށް އެންމެ ފަހުން މިހާ ބޯކޮށް ސްނޯ ފައިބާ، ގިނަ އަދަދެއްގެ ބަޔެއްގެ ފުރާނަ ގެއްލިފައި ވަނީ 1977 ވަނަ އަހަރުއެވެ. އެ އަހަރުގެ ތޫފާނާ ގުޅިގެން ކުރިމަތިވި އެކި ހާދިސާތަކުގައި 30 މީހުން މަރުވިއެވެ. ސްނޯގެ ތޫފާނާ ގުޅިގެން ނިއު ޔޯކް ސްޓޭޓްގެ ސަރަޙައްދުގައި ކުއްލި ހާލަތެއް އިޢުލާނު ކުރަން ތައްޔާރުވަމުންދާ ކަމުގައި ވެސް ރިޕޯޓުތައް ބުނެއެވެ.