ކިންގް ސަލްމާން މިސްކިތުގެ އެއަރ ކޮންޑިޝަންތަކަށް ދިމާވި މައްސަލަ ޙައްލުކޮށްފިއެވެ.
ރާއްޖޭގައި ހުރި އެންމެ ބޮޑު އެއް މިސްކިތް ކަމުގައިވާ ސަލްމާން މިސްކިތުގެ އޭސީތައް ހަލާކުވެ ގިނަ ދުވަސްވުމުގެ ސަބަބުން، އާއްމުންގެ ގިނަ ޝަކުވާތަކެއް ވަނީ ލިބިފައެވެ.
މިސްކިތުގެ އޭސީތަކަށް މައްސަލަ ދިމާވުމުގެ ސަބަބުން، އެކަން ރަނގަޅުކުރުމަށް އިސްލާމިކް މިނިސްޓްރީން އެކިފަހަރުމަތިން މަސައްކަތްކޮށްފައިވެއެވެ. އެގޮތުން މިސްކިތުގެ އޭސީތަކަށް ދިމާވެފައިވާ މައްސަލަ ދެނެގަނެ، ޙައްލުކުރުމަށްޓަކައި ތުރުކީވިލާތުގެ ޓެކްނީޝަން ޓީމެއްވެސް ރާއްޖެ ގެނެސްފައިވެއެވެ.
މިމަހުގެ ކުރީކޮޅު، މިނިސްޓްރީން ވިދާޅުވީ މިމަހުގެ 25 ވަނަ ދުވަހުގެ ކުރިން މިސްކިތުގެ އެސީތައް ރަނގަޅުކުރާނެކަމަށެވެ. އެގޮތުން މަސައްކަތް ބަޔަކާއި ހަވާލުކޮށް، މިހާރުވަނީ ސަލްމާން މިސްކިތުގެ އޭސީތައް ރަނގަޅުކޮށް މިސްކިތް ފިނިކޮށްފައެވެ.
މި މަސައްކަތް ލަސްވީ، އޭސީގެ މަރާމާތަށް ބޭނުންވާ ބައެއް ސާމާނު ރާއްޖެއިން ބޭރުން ގެންނަންޖެހުމުގެ ސަބަބުންކަމަށް އިސްލާމިކް މިނިސްޓްރީއިން މީގެކުރިން ބުނެފައިވެއެވެ.
ކިންގް ސަލްމާން މިސްކިތް ހުޅުވާ، މިސްކިތުގައި ނަމާދުކުރަން ފަށާފައިވަނީ މިއަހަރުގެ އޭޕްރިލް 1 ވަނަ ދުވަހުއެވެ.
ކިންގް ސަލްމާން މިސްކިތަކީ ސަޢުދީ ޢަރަބިއްޔާގެ ރަސްގެފާނުގެ އެހީގައި އަޅާފައިވާ މިސްކިތެކެވެ. ސަލްމާން މިސްކިތުގެ ފުރަތަމަ ފަންގިފިލާ އާއި ދެވަނަ ފަންގިފިލާ ހިމެނޭހެން 4000 މީހުންނަށް ނަމާދުކުރެވެއެވެ.
މި މިސްކިތް ބިނާކޮށްފައިވަނީ އިސްލާމީ މަރުކަޒެއްގެ ކޮންސެޕްޓަށެވެ. އެގޮތުން ތިންވަނަ ފަންގިފިލާގައި 40 މީހުންގެ ޖާގައިގެ 4 ކްލާސްރޫމާއި، 5 ސެމިނަރ ރޫމް ހުރެއެވެ. އަދި ހަތަރުވަނަ ފަންގިފިލާގައި ލައިބްރަރީއަކާއި، 350 މީހުންގެ ޖާގައިގެ އޮޑިޓޯރިއަމެއްވެސް ހުރެއެވެ.