ރަޝިޔާއިން ޔޫކްރެއިނުގެ ދެކުނުގައިވާ ޚާރްސަން ސިޓީއަށް ދިން ވަރުގަދަ މިސައިލް ހަމަލާތަކެއްގައި ޢާންމުންގެ ފަސް މީހުން މަރުވެއްޖެއެވެ. މިއީ ޓެރެރިސްޓް ހަމަލާތަކެއްގެ ގޮތުގައި ސިފަ ކުރައްވާ ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވީ، ހަމަލާތަކުގައި ޢާންމުންގެ އިތުރު 20 މީހުން ޒަޚަމުވި ކަމުގައެވެ.
ރަޝިޔާއިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުވަރީ މަހުގެ 24 ވަނަ ދުވަހުއެވެ. ޚާރްސަން ސިޓީއަށް ރަޝިޔާއިން ވަރުގަދަ ހަމަލާތަކެއް ދީފައި މި ވަނީ ހަނގުރާމައަށް 10 މަސް ފުރުނު ދުވަހުއެވެ. މި ހަމަލާތަކުގައި ޢާންމުން ދިރިއުޅޭ ޢިމާރާތްތަކަށް ބޮޑެތި ގެއްލުންތަކެއް ލިބުނު ކަމުގައި ޔޫކްރެއިނުން ބުނެއެވެ.
"މި ފަދަ ހަމަލާތަކުން ދޭހަވަނީ ޢާންމު ރައްޔިތުން މެރުމަކީ ރަޝިޔާއަށް ލިބޭ ހިތްހަމަޖެހުމެއް ކަން. އަދި، އުފަލެއް ކަން. މިއީ، އަޅުގަނޑުމެން ދިރިއުޅެމުން މިދާ ބިރުވެރި ހާލަކީ. ރަޝިޔާގެ ނުބައިނުލަފާ ކަން މުޅި ދުނިޔެއިން ވެސް ދަންނަން ޖެހޭ،" ޒެލެންސްކީ ވިދާޅުވިއެވެ.
ޚާރްސަން ސިޓީ ހިމެނޭ ޚާރްސަން ސަރަޙައްދަކީ މީގެ ކުރިން ރަޝިޔާއިން އަތްގަދަ ކޮށްފައިވާ ސަރަޙައްދެކެވެ. ނަމަވެސް، ޔޫކްރެއިނުގެ ފައުޖުތަކުން ދިން ވަރުގަދަ ހަމަލާތަކަށް ފަހު، ރަޝިޔާ ސިފައިން ވަނީ ޚާރްސަންއިން ފައިބާފައެވެ. ނަމަވެސް، އެ ރަށަށް އަމާޒުކޮށް ރަޝިޔާއިން ދެމުންދާ ހަމަލާތަކަށް ނިމުމެއް ގެނެސްފައެއް ނުވެއެވެ.
ޑިސެންބަރު 15 ވަނަ ދުވަހު ރަޝިޔާއިން ޚާރްސަން ސިޓީއަށް ދިން ވަރުގަދަ ހަމަލާތަކެއްގައި ވެސް ދެ މީހަކު ވަނީ މަރުވެފައެވެ. މީގެ ތެރޭގައި، ރެޑް ކްރޮސްގެ ދަރުމަވެރިޔަކު ވެސް ހިމެނެއެވެ. އެ ހަމަލާތަކުގައި އެ ރަށުގެ ކަރަންޓު ވިއުގައަށް ބޮޑެތި ގެއްލުންތަކެއް ލިބި، ބޮޑު ސަރަޙައްދަކުން ކަރަންޓުގެ ޚިދުމަތް ވަނީ މެދުކެނޑިފައެވެ.
ޚާރްސަންއިން ރަޝިޔާ ސިފައިން ފޭބި ނަމަވެސް، ރަޝިޔާ ސިފައިން އަދި ވެސް ދަނީ ޔޫކްރެއިނުގެ އިތުރު ތިން ސަރަޙައްދަކަށް އަތްގަދަ ކުރަމުންނެވެ. އެއީ، ޚާރްސަންއާއި އިންވެގެން އޮންނަ ޒަޕޮރީޜިޔާއާއި އިރުމަތީގައިވާ ޑޮނެޓްސްކްގެ އިތުރުން ލުހާންސްކެވެ. އިރުމަތީގައި ރަށެއް ކަމުގައިވާ ބަޚްމުތް ހިފުމަށް ރަޝިޔާ ސިފައިން މިހާރު ދަނީ މަސައްކަތް ކުރަމުންނެވެ.
ޚާރްސަންއިން ރަޝިޔާ ސިފައިންނަށް ފައިބަން ޖެހުމުން، ރަޝިޔާއިން ވަނީ ޔޫކްރެއިނުގެ ވެރިރަށް ކީވްގެ އިތުރުން މައި އެހެން ރަށްތަކަށް ވަރުގަދަ މިސައިލް ހަމަލާތަކެއް ދޭން ފަށާފައެވެ. އަދި، އީރާނުން ފޯރުކޮށްދީފައިވާ ޑްރޯން ބޭނުން ކޮށްގެން ވެސް ދަނީ ހަމަލާތައް ދެމުންނެވެ.
ނަމަވެސް، ޒެލެންސްކީ ދާދިފަހުން އެމެރިކާއަށް ކުރެއްވި ދަތުރުފުޅަކާ އެކު، ރަޝިޔާގެ މިސައިލް ހަމަލާތަކަށް ނިމުމެއް ގެނައުމަށް އެހީތެރިކަން ލިބިފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. އެ ދަތުރުފުޅުގައި އެމެރިކާގެ ރައީސް ޖޯ ބައިޑަން ވަނީ، ޔޫކްރެއިނަށް "ޕޭޓްރިއަޓް" މަރުކާގެ ދިފާޢީ ނިޒާމުތައް ފޮނުވާނެ ކަމަށް ވިދާޅުވެފައެވެ.
ޕޭޓްރިއަޓް މިސައިލަކީ އަސްކަރީ މަތިންދާބޯޓުތަކާއި މިސައިލް ފަދަ ހަތިޔާރަށް ހަމަލާދިނުމަށް ބޭނުން ކުރާ މިސައިލެކެވެ. ޒެލެންސްކީގެ ދަތުރުފުޅުގައި އެމެރިކާއިން ވަނީ 1.8 ބިލިޔަން ޑޮލަރުގެ އަސްކަރީ އެހީ އެ ޤައުމަށް ފޮނުވާނެ ކަން އިޢުލާނު ކޮށްފައެވެ.