ސިޔާސީ ގޮތުން މީހެއްގެ ފިކުރު ހުރި ގޮތަށް ބަލައި، ވިޔަފާރިވެރިންނަށް މި ސަރުކާރުން ފިޔަވަޅު އަޅާފައި ނުވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ.
ގއ. ދާންދޫއަށް އަލަށް އިތުރުކުރެވުނު ބިން ކައުންސިލާއި ހަވާލުކުރުމަށް ހުކުރުދުވަހު ބޭއްވި ރަސްމިއްޔާތުގައި ވާހަކަދައްކަވަމުން ރައީސުލްޖުމްހޫރިއްޔާ ވަނީ ހައްގުތަކާއި މިނިވަންކަން ކަށަވަރުކުރުމުގައި މި ސަރުކާރުން ކުރައްވާ މަސައްކަތްތަކަށް އަލިއަޅުއްވާލައްވާއެވެ.
ދާންދޫގައި ވާހަކަދައްކަވަމުން ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހް ވިދާޅުވީ، މީގެ 4 އަހަރު ކުރިން، 2018 ވަނަ އަހަރު ރައްޔިތުން މި ސަރުކާރަށް ވޯޓުދިނީ ވަރަށް ގިނަ ކަންތައްތަކެއް ރައްޔިތުން ބޭނުންވެ ތިބެގެންކަމަށެވެ. ފުރަތަމަ ކަމެއްގެ ގޮތުގައި އޭރު ރާއްޖޭގައި އޮތް ހަލަބޮލިކަން ރައީސް ފާހަގަކުރެއްވިއެވެ. ޚާއްޞަކޮށް ސިޔާސީ ހަލަބޮލިކަމާއި، ނުތަނަވަސްކަމާއި، އިޖުތިމާޢީ ގޮތުން ހުރި ބިރުވެރިކަން ނައްތާލަން ރައްޔިތުން ބޭނުންވިކަން ރައީސް ފާހަގަކުރެއްވިއެވެ.
ރައީސް ވިދާޅުވީ، މި ސަރުކާރުން އިންތިހާބުކުރުމަށްފަހު އޭރު ގެއްލިފައި އޮތް ރައްޔިތުންގެ ޙައްޤުތައް ހޯދައިދޭން އެދުނުކަމަށެވެ. އަދި އެތައް ދުވަހެއް ވަންދެން ވަކިވަކި ފަރުދުންނަށާއި، ރަށްރަށަށް ބޭނުންވެފައި ހުރި އަސާސީ ޚިދުމަތްތައް ރައްޔިތުން އަވަހަށް ބޭނުންވިކަންވެސް ރައީސް ފާހަގަކުރެއްވިއެވެ.
މި ސަރުކާރުން ރައްޔިތުންނާއި ހިސާބަށް އައީ، މެނިފެސްޓޯއަކާ އެކީގައިކަމަށާއި، މުޅި ރާއްޖެއަށް ބޭނުންވާ ބަދަލުތަކަކާއި، އަތޮޅުތަކަށާއި، ރަށްރަށަށް ބޭނުންވާ ކަންތައްތަކެއް ލިޔެ ހިމަނައިގެންކަން ރައީސްގެ ވާހަކަފުޅުގައި ފާހަގަކުރެއްވިއެވެ.
ރައީސް ވަނީ މީގެކުރިން ކުރީ ސަރުކާރުތަކުގައި މިނިވަންކަމާއެކު ވިޔަފާރިކުރެވުނީ ކޮން ވިޔަފާރިވެރިއަކަށްތޯ ސުވާލުކުރައްވާފައެވެ. އަދި މީގެކުރިން ވިޔަފާރިކުރަން ބޭނުންނަމަ، ޙާއްސަކޮށް ފަތުރުވެރިކަމުގެ ސިނާއަތުގައި ބޮޑެތި އިންވެސްޓްމަންޓް ކުރަން ބޭނުންނަމަ ސިޔާސީ ވިސްނުމަށް ބެލުމަށްފަހުގައި އެކަންކަމަށް ހުރަސްއަޅާފައިވާކަމަށް ރައީސް ވިދާޅުވިއެވެ. ނަމަވެސް މި ސަރުކާރުން ވިޔަފާރިވެރިންގެ އެއްވެސް އިންވެސްޓްމަންޓަކަށް ހުރަސް އަޅާފައި ނުވާނެކަމަށް ރައީސް ވިދާޅުވިއެވެ.
"މިއަދު މިހިސާބަށް އައިއިރުގައި، މި ސަރުކާރުން ކޮށްފައި ހުރި ކަންތައްތައް ތިޔަބޭފުޅުން ބައްލަވާ. އެއްވެސް ވިޔަފާރިވެރިޔަކަށް، އެއްވެސް އިންވެސްޓަރަކަށް ހުރަސްއަޅާފައި އޮތްތޯ. މިނިވަންކަމާއެކީގައި ވިޔަފާރި ކުރެވޭނެ މާޙައުލެއް އިރާދަކުރެއްވިއްޔާ، މިއަދު އަޅުގަނޑުމެން މިވަނީ ޤާއިމުކޮށްދީފައި. ޔަޤީންކަމާއެކު އަޅުގަނޑު މި ދަންނަވަނީ، ސިޔާސީ ޚިޔާލުތަފާތުވުމުގެ ތެރޭގައި، އެއްވެސް ވިޔަފާރިވެރިޔަކަށް ހުރަސްނާޅާނެކަމުގެ. ކުރިއަށް ވަޑައިގަންނަވަންވީ. ސަރުކާރު މިއޮތީ ވިޔަފާރިވެރިންނަށް މަގުފަހިކޮށްދިނުމަށް، ފަސޭހަކޮށްދިނުމަށް، ޤާނޫނުތަކަށް ގެންނަންޖެހޭ ބަދަލުތައް ގެނެސް، އުޞޫލުތައް ހަރުދަނާކުރުމުގައި." ރައީސް ވިދާޅުވިއެވެ.
މީގެކުރީގެ ސަރުކާރުތަކުން ސިޔާސީގޮތުން އެ ސަރުކާރަކާއި ހިޔާލު ތަފާތުނަމަ ވިޔަފާރިތަކަށް ހުރަސްއަޅާ ވިޔަފާރިތަކަށް އެކި ގޮތްގޮތުން ވަނީ ދަތިކުރުމުގެ ފިޔަވަޅުތައް އަޅާފައެވެ. އެއާއިއެކު އެއިރު ވިޔަފާރީގެ ބޮޑެތި އިންވެސްޓްމަންޓްތައް ކުރުމަށް ވިޔަފާރިވެރިން ދިޔައީ ފަސްޖެހެމުންނެވެ.
ރައީސް ވިދާޅުވީ، ހައްގުތަކާއި މިނިވަންކަން ރާއްޖޭގައި ކަށަވަރުވެފައިވާއިރު، މިއަދު މިވާހަކަ ދައްކަނީ ހިތްހަމަޖެހުމާއެކީގައިކަމަށެވެ. އެގޮތުން އޭރުއޮތް ހަމަނުޖެހުން، ހަލަބޮލިކަން، އޭރު އޮތްގޮތަށް ނެތްކަމަށާއި ރައްޔިތުންގެ ކިބައިން ނިގުޅައިގެންފައި ހުރި އެތައް އަސާސީ ޙައްޤުތަކާއި، މިނިވަންކަން ހޯދައިދެވިއްޖެކަން ރައީސް ވަނީ ފާހަގަކުރައްވާފައެވެ.