މޯލްޑިވްސް ޗައިނާ ފްރެންޑްޝިޕް ރަންގެ ނަމުގައި ބޭއްވި ހަރަކާތާއެކު ދިވެހިރާއްޖެއާ ޗައިނާއާ ދެމެދު ސިޔާސީ ގުޅުން ޤާއިމުކުރިތާ 50 އަހަރުފުރޭ މުނާޞަބާ ފާހަގަކުރުމަށް މުޅި އަހަރުދުވަހަށް ބަހާލައިގެން ބޭއްވި ހަރަކާތްތައް ކާމިޔާބުކަމާއެކު ނިންމާލައިފިއެވެ.
މި ދުވުމަކީ މޯލްޑިވްސް މޯލްޑިވްސް ޗައިނާ ޓްރޭޑް އެންޑް ކަލްޗަރަލް އޮގަނައިޒޭޝަނުން އިންތިޒާމުކޮށް ޗައިނާ އެމްބަސީއާއި ބައެއް މުއައްސަސާތައް ގުޅިގެން ބޭއްވި ދުވުމުގެ ހަރަކާތެވެ.
އެގޮތުން ބައިކް މޯލްޑިވްސްގެ 100 އަށްވުރެ ގިނަ މީހުން މި ހަރަކާތުގައި ބައިވެރިވިއިރު، މޯލްޑިވްސް އިން ލައިން ސްކޭޓް އެސޯސިއޭޝަނުގެ ފަރާތުންވެސް ގިނަ އަދަދެއްގެ މީހުން ބައިވެރިވެފައިވެއެވެ. އަދި ހާއްސަ އެހީއަށް ބޭނުންވާ ފަރާތްތަކަށް ހިދުމަތްކޮށްދެމުން އަންނަ ދެ ޖަމްއިއްޔާ ކަމަށްވާ މޯލްޑިވްސް އެސޯސިއޭޝަން ފޯ ފިޒިކަލް ޑިސެބިލިޓީ (އެމްއޭޕީޑީ) އާއި ވިލިޖޯލި މޫވްމަންޓްގެ ބައިވެރިންގެ އިތުރުން މޯލްޑިވްސް ނެޝަނަލް ޔުނިވާސިޓީގެ ސްޓޫޑަންޓް ޔޫނިއަނުން ބައިވެރިވިއެވެ.
މީގެއިތުރުން ޗައިނާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ވަން ލިޒިން އާއި ރައްޔިތުންގެ މަޖިލީހުގެ ބައެއް މެމްބަރުންނާއި މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވާމަންޓް އަހުމަދު މަހްލޫފުގެ އިތުރުން ބައެއް ސިޔާސީ ޕާޓީތަކުގެ އިސްވެރިން ބައިވެރިވެވަޑައިގެންނެވި އެވެ. އަދި މާލޭ ސިޓީ ކައުންސިލްގެ ބައެއް މެމްބަރުންނާ އާންމުންގެ ގިނަ އަދަދެއްގެ ބަޔަކު މި ދުވުމުގައި ބައިވެރިވިއެވެ.
މި ދުވުން ކުރިޔަށްދިޔައީ ސިނަމާލޭ ބްރިޖުގައެވެ. ބްރިޖުގެ އެއްފަޅި މި ދުވުމަށް ވަގުތީގޮތުން ބަންދުކޮށްފައިވެއެވެ. ދުވުން ކުރިޔަށްދިޔަ ވަގުތު އާންމުންގެ މޫނުމަތިން ފެނިގެންދިޔައީ އުފާވެރިކަމެވެ.
މި ދުވުމަށްފަހު ޕީއެސްއެމްއަށް މައުލޫމާތުދެއްވަމުން ޗައިނާ ސަފީރު ވަން ލިޒިން ވިދާޅުވީ މި ދުވުމާއެކު ބޮޑު އުފާވެރިކަމެއް ލިބިގެންދިޔަ ކަމަށާއި ރާއްޖެއާއި ޗައިނާ އާއި ދެމެދު އޮތް ގުޅުމަކީ ހާއްސަ ގުޅުމެއްކަން ހާމަވެގެންދާ ކަމަށެވެ.
މި ދުވުން އިންތިޒާމުކުރި މޯލްޑިވްސް ޗައިނާ ޓްރޭޑް އެންޑް ކަލްޗަރަލް އޮގަނައިޒޭޝަންގެ ރައީސް މިދުއާމް ސައުދު ވިދާޅުވީ މިއީ ކުޅިވަރު މިފަދަ ހަރަކާތެއް ބޭއްވި ފުރަތަމަ ފަހަރު ކަމަށާއި ކާމިޔާބުކަމާއެކު މި ހަރަކާތް ނިންމާލީ ގިނަ ބައެއްގެ ބައިވެރިވުމާއެކު ކަމަށެވެ. އަދި ބްރިޖު ހުޅުވި ދުވަސް ފަހުން މިއީ އާންމުންނަށް ދުވުމުގެ ހަރަކާތެއް ބޭއްވުނު ފުރަތަމަ ފަހަރުކަން ފާހަގަކުރައްވަމުން މިދުއާމް ވަނީ މިކަން ފަހިކޮށްދިން ފަރާތްތަކަށް ޝުކުރުއަދާކުރައްވާފައެވެ.
ދިވެހިރާއްޖެއާ ޗައިނާއާއި ދެމެދު ސިޔާސީ ގުޅުން ޤާއިމުކުރީ 14 އޮކްޓޫބަރ 1972 ގައެވެ.