ޗިލީގެ އައްސޭރިފަށުގައިވާ ރިސޯޓު ރަށެއް ކަމުގައިވާ ވީނާ ޑެލް މާރގައި އަލިފާން ރޯވެ، ދެ މީހުން މަރުވެއްޖެއެވެ. އެ ރަށުގައި ރޯވެފައިވާ އަލިފާންގަނޑު ރަށުގެ ބޮޑު ސަރަޙައްދަކަށް މިހާރު ވަނީ ފެތުރިފައެވެ. އަދި، 400 އަށްވުރެ ގިނަ ޢިމާރާތް ވަނީ އަނދާފައި ނުވަތަ ގެއްލުން ލިބިފައެވެ.
މި ހާދިސާއާ ގުޅިގެން އެ ރަށުގައި މިހާރު ވަނީ ކުއްލި ހާލަތު އިޢުލާނު ކޮށްފައެވެ. ވީނާ ޑެލް މާރއަކީ ވެރިރަށް ސެންޓިއާގޯއާ 120 ކިލޯމީޓަރު ދުރުގައި އޮންނަ، އާބާދީ ބޮޑު ރަށެކެވެ. އެ ސަރަޙައްދަށް މޫސުން ގޯސްވެ، ވައިބާރުވުމުގެ ސަބަބުން، އަލިފާންގަނޑު ކޮންޓްރޯލް ކުރުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
ވީނާ ޑެލް މާރގެ 110 ހެކްޓަރުގެ ސަރަޙައްދަކަށް އަލިފާންގަނޑު ފެތުރިފައިވާ ކަމުގައި އެ ޤައުމުގެ އިމަރޖެންސީ ހާދިސާތަކާ ބެހޭ އިދާރާއިން ހާމަކުރެއެވެ. މި ހާދިސާއާ ގުޅިގެން އެ ރަށުގެ ބައެއް ސަރަޙައްދުތަކުގައި ދިރިއުޅޭ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
"އެ ރަށުގައި އަލިފާން ރޯވުމާ އެކު އަލިފާންޑު ކޮންޓްރޯލް ކުރުމަށް ގިނަ ފިޔަވަޅުތަކެއް އެޅިން. ނަމަވެސް، މޫސުން ހުރި ގޮތުންނާއި، އަލިފާން ހިފާ ޒާތުގެ ތަކެތި ހުރުމުގެ ސަބަބުން އަލިފާންގަނޑު ވަނީ ވަރަށް ބޮޑު ސަރަޙައްދަކަށް ފެތުރިފައ،" ދާޚިލީ ވުޒާރާގެ އޮފިޝަލެއް ކަމުގައިވާ މެނުއެލް މޮންސެލްވް ވިދާޅުވިއެވެ.
ގަޑިއަކު 40އާއި 50 ކިލޯމީޓަރުގެ ބާރުމިނުގައި ވައިޖެހެމުން ދިޔުމާ ގުޅިގެން، އަލިފާން ނިއްވުމުގެ މަސައްކަތަށް ހުރަސް އެޅިފައިވާ ކަމުގައި އެ މަސައްކަތުގައި ހަރަކާތްތެރިވާ އޮފިޝަލުން ބުނެއެވެ. މި މަސައްކަތުގައި 550 އަށްވުރެ ގިނަ މީހުންގެ މައްޗަށް އެކުލެވިގެންވާ ޓީމަކުން ދަނީ ހަރަކާތްތެރިވަމުންނެވެ.