ފަރަންސޭސި ވިލާތުގެ ވެރިރަށް ޕެރިސްގައި ދިން ބަޑީގެ ހަމަލާތަކެއްގައި ތިން މީހަކު މަރައިލާ، އިތުރު ތިން މީހަކު ޒަޚަމުކޮށްލައިފިއެވެ. މި ހަމަލާ ދީފައި ވަނީ ޕެރިސްގެ ކާރޫބާރޫ ބޮޑު ސަރަޙައްދެއްގައި ހުންނަ ކުރުދީންގެ ސަޤާފީ މަރުކަޒެއް ކައިރީގައެވެ. ބެލެވޭ ގޮތުގައި ހަމަލާ ދީފައި ވަނީ ކުރުދީ ދަރިކޮޅުގެ މީހުންނަށް އަމާޒުކޮށެވެ.
މި ހާދިސާގައި ޒިންމާވާ މީހާ މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ހައްޔަރުކޮށްފައި ވަނީ އުމުރުން 69 އަހަރުގެ ފިރިހެނެކެވެ. އޭނާއަކީ، ފަރަންސޭސި ވިލާތަށް ހިޖުރަކޮށްފައިވާ މީހުން ދިރިއުޅޭ ކޭމްޕަކަށް މީގެ އަހަރެއްހާ ދުވަސް ކުރިން ހަމަލާ ދިނުމުގެ ކުށުގައި ހައްޔަރުކޮށްފައި ހުރި މީހެކެވެ. އޭނާ ދޫކޮށްލިތާ އަދި ގިނަ ދުވަސްތަކެއް ފާއިތު ނުވާ ކަމަށް ޕެރިސްގެ އޮފިޝަލުން ބުނެއެވެ.
މަންޒަރު ފެނުނު މީހުން ބުނީ ހަތިޔާރު އެޅި މީހާ ފުރަތަމަ ބަޑި ޖަހައި ހަމަލާދީފައި ވަނީ ސަޤާފީ މަރުކަޒުގެ ކުރިމަތީގައި ހުންނަ ބޯކޮށާ ތަނެއްގެ ތެރޭގައި ތިބި މީހުންނަށް އަމާޒުކޮށް ކަމުގައެވެ. އަދި، އޭނާ ގެންގުޅު ހަތިޔާރުން ވަޒަން ހުސްވި ވަގުތު، އެ ތަނުގައި ތިބި ޢާންމުން އޭނާ ހިފަހައްޓާފައިވާ ކަމުގައި ވެސް މަންޒަރު ފެނުނު މީހުން ބުންޏެވެ.
މިއީ ވަރަށް ހިތާމަވެރި ހާދިސާއެއްގެ ގޮތުގައި އެ ސަރަޙައްދުގެ މޭޔަރު އެލެގްޒެންޑްރާ ކޮރްޑެބާރޑް ސިފަކުރެއްވިއެވެ. މި ހަމަލާގައި ޒަޚަމުވި މީހުންގެ ތެރެއިން އެކެއްގެ ހާލު ސީރިޔަސް ކަމުގައި ވެސް އޭނާ ވިދާޅުވިއެވެ. މި ހާދިސާއާ ގުޅިގެން ފުލުހުން ވަނީ އެ ސަރަޙައްދުގައި ސަލާމަތީ ފިޔަވަޅުތައް ވަރުގަދަ ކޮށްފައެވެ.
މި ހާދިސާ ތަހުޤީޤު ކުރުމުގެ މަސައްކަތް ޕެރިސްގެ ފުލުހުން ފަށާފައިވާއިރު، މި ހާދިސާގައި މަރުވި މީހުންގެ ތެރޭގައި 26 އަހަރުގެ އަންހެނެއް ހިމެނޭ ކަމުގައި ފުލުހުން ބުނެއެވެ. އޭނާއަކީ ކުރުދީ ދަރިފަސްކޮޅަށް ނިސްބަތްވާ މީހެއް ކަމަށާއި، އެއީ ދާދިފަހުން ޕެރިސްއަށް ހިޖުރަ ކުރި މީހެއް ކަމުގައި އެ ސަރަޙައްދުގައި ދިރިއުޅޭ ކުރުދީ ދަރިކޮޅުގެ މީހުން ބުނެއެވެ.