ރަޝިޔާގެ ދިފާޢީ ވަޒީރު ސަރްގެއި ޝޮއިގޫ ޔޫކްރެއިން ހަނގުރާމައިގެ ކުރީސަފަށް ޒިޔާރަތް ކުރައްވައި، ރަޝިޔާގެ ސިފައިންގެ ފައުޖުތަކާ ބައްދަލު ކުރައްވާފައިވާ ކަމަށް އެ ޤައުމުގެ ދިފާޢީ ވުޒާރާއިން ބުނެފިއެވެ. ރަޝިޔާގެ ދިފާޢީ ވުޒާރާއިން ވަނީ ޝޮއިގޫގެ ދަތުރުފުޅުގެ ވީޑިޔޯތައް ޢާންމުކޮށްފައެވެ. ނަމަވެސް، އޭނާ ޔޫކްރެއިނަށް ވަޑައިގެންނެވިކަން ކަށަވަރު ކޮށްދީފައެއް ނުވެއެވެ.
އޭނާ ޔޫކްރެއިނަށް ވަޑައިގަންނަވާފައި މި ވަނީ އެ ޤައުމުގެ ރައީސް ވޮލޮޑޮމީރް ޒެލެންސްކީ އެމެރިކާއަށް ކުރެއްވި ދަތުރުފުޅުގެ ކުރިންނެވެ. ޒެލެންސްކީގެ ދަތުރުފުޅަކީ ސަލާމަތީ ސަބަބުތަކަށް ޓަކައި ސިއްރިޔާތުގައި ކުރައްވާފައިވާ ދަތުރުފުޅެކެވެ. އޭނާގެ ދަތުރުފުޅާ ގުޅޭ މަޢުލޫމާތު ޢާންމުކޮށްފައި ވަނީ، ޔޫކްރެއިނު ދޫކޮށް އެމެރިކާގެ މަތިންދާބޯޓެއްގައި ފުރާވަޑައިގެންނެވި ފަހުންނެވެ.
ޝޮއިގޫ ވެސް ޔޫކްރެއިނުގެ ސަރަޙައްދަށް ވަޑައިގަންނަވާފައި ވަނީ ސިއްރިޔާތުގައި ކަމަށް ރަޝިޔާއިން ދިފާޢީ ވުޒާރާއިން ބުނެއެވެ. މި ދަތުރުފުޅުގައި އޭނާ ވަނީ ހަނގުރާމައިގެ ކުރީ ސަފުގައި ހަރަކާތްތެރިވަމުންދާ ރަޝިޔާގެ ފައުޖުތަކާ ބައްދަލު ކުރައްވައި، ރަޝިޔާގެ އަސްކަރީ މަރުކަޒުތައް ބައްލަވައިލައްވާފައެވެ. ބެލެވޭ ގޮތުގައި އޭނާ ވަޑައިގަންނަވާފައި ވަނީ އެންމެ ވަރުގަދައަށް ހަނގުރާމަ ހިނގަމުންދާ ބަޚްމުތް ސަރަޙައްދަށެވެ.
އެ ސަރަޙައްދުގައި ހަރަކާތްތެރިވާ ރަޝިޔާގެ ފައުޖުތައް އެކުލެވިގެން ވަނީ ކުލީ ސިފައިންނާއި، ކުށްވެރިންނާއި، އެ ޤައުމުގެ އަސްކަރިއްޔާއާ އަލަށް ގުޅުނު ސިފައިންގެ މައްޗަށް ކަމުގައި ރިޕޯޓުތައް ބުނެއެވެ. ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައަކީ އަސްކަރީ އޮޕަރޭޝަނެއްގެ ގޮތުގައި ރަޝިޔާއިން ސިފަ ކުރެއެވެ. މި އޮޕަރޭޝަންގެ މައިގަނޑު އަމާޒަކީ ޒެލެންސްކީގެ ސަރުކާރު ވައްޓައިލުމެވެ. ނަމަވެސް، އެ ކަން ކާމިޔާބުކުރެވޭ ގޮތް އަދި ވަނީ ނުވެފައެވެ.
ހަނގުރާމައިގެ ކުރީކޮޅު ރަޝިޔާގެ ފައުޖުތަކުން ވަނީ ޔޫކްރެއިނުގެ ހަތަރު ސަރަޙައްދަކަށް އަތްގަދަކޮށްފައެވެ. އެއީ، އެ ޤައުމުގެ އިރުމަތީގައިވާ ޑޮނެޓްސްކާއި ލުހާންސްކްގެ އިތުރުން ދެކުގައިވާ ޚާރްސަންއާއި ޒަޕޮރީޜިޔާއެވެ. ނަމަވެސް، ޔޫކްރެއިނުގެ ފައުޖުތަކުން ވަނީ ރަޝިޔާ ސިފައިންގެ އަތްދަށުން ޚާރްސަން މިނިވަންކޮށްފައެވެ. މިއީ، ރަޝިޔާ ސިފައިންނަށް ލިބުނު ވަރަށް ބޮޑު ނާކާމިޔާބީއެއްގެ ގޮތުގައި ސިފަ ކުރެވެއެވެ.
އެ ނާކާމިޔާބީއާ ގުޅިގެން ރަޝިޔާއިން ވަނީ ޔޫކްރެއިނުގެ ވެރިރަށް ކީވްގެ އިތުރުން އެހެން ބޮޑެތި ރަށްތަކަށް ވަރުގަދަ މިސައިލް ހަމަލާތަކެއް ދޭން ފަށާފައެވެ. އަދި، ޔޫކްރެއިނުގެ އަމާޒުތަކަށް ހަމަލާދިނުމަށް އީރާނުން ފޯރުކޮށްދީފައިވާ ޑްރޯންތަކެއް ވެސް ބޭނުން ކުރަން ފަށާފައެވެ. ހަމަލާތައް އަމާޒުކުރަމުން ދަނީ ކަރަންޓާއި ފެން ފަދަ ޒަރޫރީ ޚިދުމަތްތައް ދިނުމަށް ބޭނުންކުރާ ވަސީލަތްތަކަށެވެ.
ނަމަވެސް، ޒެލެންސްކީ އެމެރިކާއަށް ކުރެއްވި ދަތުރުފުޅާ ގުޅިގެން ރަޝިޔާގެ މިސައިލް ހަމަލާތަކަށް ކޮންމެ ވެސް ވަރެއްގެ ގޮންޖެހުންތަކަކާ ކުރިމަތިވާނެ ކަމަށް މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. ސަބަބަކީ، މި ދަތުރުފުޅާ ގުޅުވައި، އެމެރިކާއިން ވަނީ އެ ޤައުމުގައި އުފައްދާ "ޕޭޓްރިއަޓް" މިސައިލް ޑިފެންސް ސިސްޓަމްތަކެއް ޔޫކްރެއިނަށް ފޯރުކޮށްދިނުމަށް ނިންމައި، އެ ކަން އިޢުލާނު ކޮށްފައެވެ.
ޕޭޓްރިއަޓް މިސައިލްތައް ޔޫކްރެއިނަށް ފޮނުވަން އެމެރިކާއިން ނިންމުމުން ރަޝިޔާއިން ވަނީ އެ ކަމާ މެދު ކަންބޮޑުވުން ފާޅުކޮށްފައެވެ. އަދި، މިއީ އެމެރިކާއިން ހަނގުރާމައިގައި އަމަލީ ގޮތުން ބައިވެރިވުމުގެ ގޮތުގައި ދެކޭ ކަމަށް ބުނެ، ރަޝިޔާއިން ވަނީ އެމެރިކާއަށް އިންޒާރު ދީފައެވެ.