ސަލާމަތާއި ރައްކާތެރިކަމާއި ގުޅޭގޮތުން މާލޭ ވިޔަފާރި ބަނދަރުގައި މިހާތަނަށް ކުރިއަށްގެންދިޔަ އެންމެ ބޮޑު ޑްރިލް ބާއްވައިފިއެވެ. މިއީ ދިމާވެދާނެ ކުއްލި ހާދިސާއަކަށް ތައްޔާރުވެ ތިބުމާއި ގުޅޭގޮތުން ކުރިއަށްގެންދިޔަ ފުލް ސްކޭލް ޑްރިލްއެކެވެ.
މޯލްޑިވްސް ޕޯޓްސް ލިމިޓެޑް އެމްޕީއެލްގެ ސޭފްޓީ ވީކްއާއި ގުޅިގެން ކުރިއަށްގެންދިޔަ ޑްރިލްގައި، ސަލާމަތާއި ރައްކާތެރިކަމުގެ ދާއިރާގައި މަސައްކަތްކުރާ ހުރިހާ ފަރާތްތަކުން ވަނީ ބައިވެރިވެފައެވެ. އެގޮތުން އެމްޕީއެލްއާއިއެކު، އެމްއެންޑީއެފްގެ ފަޔަރ އެންޑް ރެސްކިއު، ކޯސްޓް ގަރޑް، ޕޮލިސް އަދި ދިވެހި ރެޑްކްރަސަންޓާއި އޭޑީކޭއިން ބައިވެރިވެފައިވެއެވެ.
ޑްރިލްގެ މަޢުލޫމާތު ޙިއްސާކުރައްވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ، މިއީ މިހާތަނަށް ޕޯޓުގައި ކުރިއަށްގެންދިޔަ އެންމެ ބޮޑު ޑްރިލްކަމަށެވެ. މިޑްރިލް ޚާއްސަކޮށްފައިވަނީ، އެމްޕީއެލްގެ ބަނދަރުގެ މަގަތު ފާލަމުގައި އޮތް ބޯޓެއްގައި އަލިފާނުގެ ހާދިސާއެއް ހިނގައިފިނަމަ ކުއްލި ފިޔަވަޅު އަޅާނެ ގޮތާއި ގުޅޭގޮތުންނެވެ. މިޑްރިލްގައި އެމްޕީއެލްގެ މުވައްޒަފުންނާއި ޕޯޓުގައި މަސައްކަތްކުރާ ހުރިހާ މުވައްޒަފުން ބައިވެރިވެފައިވެއެވެ.
"ބޯޓެއްގައި ރޯވެއްޖެނަމަ ރިޕޯޓްކޮށް ހާދިސާއަށް އެޓެންޑްވާނެގޮތާއި، ސަރަޙައްދުން މީހުން ހުސްކުރުމާއި، މީހަކަށް އަނިޔާވާ ހާލަތުގައި އަވަސް ފަރުވާ ދީ އިތުރު ފަރުވާއަށް ހޮސްޕިޓަލަށް ގެންދާނެ ގޮތުގެ މަސައްކަތްތައް ވަނީ ޑްރިލްގައި ކޮށްފައި." ޝާހިދު އަލީ ވިދާޅުވިއެވެ.
ޝާހިދު އަލީ ވިދާޅުވީ މިފަދަ ޑްރިލްއެއްގެ އެންމެ ބޮޑު ބޭނުމަކީ، ކުއްލި ހާލަތަކަށް ވިޔަފާރި ބަނދަރު ތައްޔާރުވެފައި އޮތް މިންވަރު ދެނެގަތުންކަމަށެވެ. އަދި އެފަދަ ހާދިސާއެއް ކުރިމަތިވާ ހާލަތުގައި އެމްޕީއެލްގެ ފަޔަރ ސްކޮޑްގެ މަސައްކަތްތައް ރޭވިފައިވާ ގޮތްތައް ދެނެގަތުމާއި، މުވައްޒަފުން މިކަންކަމަށް ހޭލުންތެރިކޮށް، ބޭނުންވާ މަޢުލޫމާތުތައް ފޯރުކޮށްދިނުމަކީވެސް މިޑްރިލް ބޭއްވުމުގެ ބޭނުމެކެވެ.
މި ޑްރިލްގައި، އެވަގުތު މަސައްކަތުގައި ހަރަކާތްތެރިވި އެމްޕީއެލްގެ 100އަށްވުރެ ގިނަ މުވައްޒަފުން ބައިވެރިވިއެވެ.
2019އިން ފެށިގެން އެމްޕީއެލްއިން އަންނަނީ، "ސޭފްޓީ ވީކް" ފާހަގަކުރަމުންނެވެ. ސެފްޓީ ވީކް ފާހަގަކުރަނީ ކޮންމެ އަހަރެއްގެ ޑިސެމްބަރު މަހުއެވެ. އެމްޕީއެލްގެ ސީއީއޯ ޝާހިދު ވިދާޅުވީ، ސެފްޓީ ވީކް ކުރިއަށްގެންދަން ފެށިފަހުން، ޕޯޓުގެ ސަލާމަތާއި ރައްކާތެރިކަމުގެ ކަންކަމަށް މުވައްޒަފުން ވަރަށް ބޮޑަށް ހޭލުންތެރިވެފައިވާކަމަށެވެ. އަދި މިއީ ޕޯޓުގައި ޙާދިސާތައް ހިނގުން މަދުކުރުމަށްވެސް އެޅުނު ވަރަށް މުހިންމު ފިޔަވަޅެއްކަމަށް ޝާހިދު ވިދާޅުވިއެވެ.
މިއަހަރަކީ ސޭފްޓީ ވީކް ފާހަގަކުރާ 3ވަނަ އަހަރެވެ.