މަސްތުވާތަކެއްޗާއި ދެކޮޅަށް ފުލުހުންގެ ޚާއްސަ އޮޕަރޭޝަނެއް މާލޭގައި ފަށައިފިއެވެ. މިއޮޕަރޭޝަންގެ ތަފްސީލް ފުލުހުން ޙިއްސާކޮށްފައެއް ނުވެއެވެ.
މަޢުލޫމާތު ލިބޭގޮތުގައި މިއޮޕަރޭޝަންގެ ތެރެއިން، މާލޭގެ ސޯސަންމަގުގައި ހުރި ގެއެއް ވަނީ ބަލާ ފާސްކޮށްފައެވެ. އަދި މަސްތުވާތަކެތިކަމަށް ޝައްކުކުރެވޭ އެއްޗެތިތަކެއް ވަނީ ހޯދާފައެވެ. މިއާއި ގުޅިގެން މިހާތަނަށް މީހަކު ހައްޔަރުކުރިކަމުގެ މަޢުލޫމާތެއް ލިބިފައެއް ނުވެއެވެ.
ފުލުހުން ދަނީ މާލެ ސަރަޙައްދުގައި މިފަދަ އޮޕަރޭޝަންތައް ހިންގަމުންނެވެ. އެގޮތުން މިދިޔަ މަހުގެ 19ވަނަ ދުވަހު މާލޭގައި ކުރިއަށްގެންދިޔަ އޮޕަރޭޝަނެއްގައި ވަނީ 13 ކިލޯގެ މަސްތުވާތަކެތި އަތުލައިގެންފައެވެ. އަދި މި މައްސަލައާއި ގުޅިގެން 6 މީހުން ހައްޔަރުކޮށްފައިވެއެވެ. އަދި މިދިޔަ މަހު ހިންގި އިތުރު އޮޕަރޭޝަނެއްގައި މާލެއާއި ހުޅުމާލެ ހިމެނޭހެން 12 މީހަކު ހައްޔަރުކުރިއެވެ.