ފުލުހުންގެ އިސް މަގާމުތަކުގައި ތިއްބެވި ފަސް އޮފިސަރަކު ވަޒީފާއިން ވަކިކުރުމަށް ޕޮލިސް ބޯޑުން ނިންމާފައިވަނީ ގޯސްކޮށްކަމަށް ކަނޑައަޅައި ސިވިލް ކޯޓުން ކުރި ހުކުމް އިސްތިއުނާފްކުރުމަށް ބަންޑާރަ ނާއިބުގެ އޮފީހުން ނިންމަވައިފިއެވެ.
ޕޮލިސް ބޯޑުގެ ލަފައާއެކު މިދިޔަ އަހަރު އޮކްޓޯބަރުމަހު 7 އޮފިސަރަކު ވަނީ ވަޒީފާއިން ވަކިކުރުމުން އޭގެ ތެރެއިން 5 އޮފިސަރަކު ވަނީ ސިވިލް ކޯޓަށް މައްސަލަ ހުށަހަޅާފައެވެ.
ފަސް އޮފިސަރަކު ވަޒީފާއިން ވަކިކުރުމަށް ޕޮލިސް ބޯޑުން ނިންމާފައިވަނީ ގޯސްކޮށްކަމަށް ކަނޑައަޅައި ސިވިލް ކޯޓުން ހުކުމްކުރި މައްސަލައިގައި ބަންޑާރަ ނާއިބުގެ އޮފީހުން ވިދާޅުވީ އެ މައްސަލަ ހައިކޯޓުގައި އިސްތިއުނާފްކުރުމަށް ނިންމާފައިވާކަމަށެވެ. އަދި ސިވިލް ކޯޓުގެ ނިންމުން އިސްތިއުނާފުކުރުމަށް ނިންމާފައިވަނީ، އެ ނިންމުމުގައި ދިވެހި ފުލުހުންގެ ޚިދުމަތުގެ ޤާނޫނު މާނަކޮށް ތަންފީޛުކޮށްފައިވަނީ ރަނގަޅަށް ކަމަށް ނުފެންނާތީކަމަށްވެސް ބަންޑާރަ ނާއިބުގެ އޮފީހުން ވިދާޅުވެއެވެ.
މި މައްސަލާގައި ސިވިލް ކޯޓުން ކުރި ހުކުމުގައިވަނީ ދައުވާކުރި ފަސް އޮފިސަރުން ފުލުހުންގެ ވަޒީފާއިން ވަކިކުރަން ނިންމުމުގެ ބާރު ޕޮލިސް ބޯޑަށް ލިބިފައިނުވާ ކަމަށެވެ. އެގޮތުން ފުލުހުންގެ ގާނޫނަށް އަމަލުކުރަން ފަށާއިރު، ސުޕްރިޓެންޑެންޓް ރޭންކުން ފެށިގެން މަތީގެ އޮފިސަރުންނަށް ތުހުމަތު ކުރެވޭ ކަންކަމާއި އެ މީހުންގެ ތައުލީމީ ފެންވަރަށް ބަލަން ޖެހޭނެކަމަށް ގާނޫނުގައި ބުނެފައި އޮތަސް، އެއީ އެފަދަ އޮފިސަރުން ވަކިކުރުމުގެ ބާރު ލިބިދޭ މާއްދާއެއް ނޫން ކަމަށް ހުކުމުގައިވެއެވެ.
މީގެ އިތުރަށް މި މައްސަލާގައި ދައުލަތުން ޕޮލިސް ބޯޑުގެ ނިންމުން ކަމަށް ބުނެ ކޯޓަށް ހުށަހެޅި ދެ ރިޕޯޓަކީ ވެސް އެ ފަސް އޮފިސަރުންނަށް ނިސްބަތްވާ ގޮތަށް ކަމެއް ނިންމާފައިވާ ރިޕޯޓެއް ނޫން ކަމަށާއި އެ ފަސް އޮފިސަރުންނަށް ނިސްބަތްވާ ގޮތަށް ޕޮލިސް ބޯޑުން އެފަދަ ނިންމުމެއް ނިންމާފައިވާކަން އެނގެން ނެތްކަމަށް ހުކުމުގައިވެއެވެ.