ތައިލެންޑުގެ އަސްކަރީ މަނަވަރެއް ދިޔަވެ، ފެތުނު ހާދިސާގައި ގެއްލުނު 31 މީހުންގެ ތެރެއިން ހަ މީހެއްގެ ހަށިގަނޑު ފެނިފައިވާ ކަމުގައި އެ ޤައުމުގެ ކަނޑުގެ ސިފައިން ބުނެފިއެވެ. އެޗް.ޓީ.އެމް.އެސް. ސުކްހޮތައި ފެތުނު ހާދިސާގައި ކަނޑުވި ފަޅުވެރިން ހޯދުމަށް ކުރަމުންދާ މަސައްކަތުގައި، އެއް ފަޅުވެރިއަކު ވަނީ ސަލާމަތް ކުރެވިފައެވެ. މި ހާދިސާ ހިނގާފައި ވަނީ އެ ޤައުމުގެ ދެކުނުއިރުމަތީގައި އޮންނަ ގަލްފް އޮފް ތައިލެންޑުގައި މަނަވަރު ދަތުރު ކުރަމުން ދަނިކޮށެވެ.
މި ހާދިސާގައި ކަނޑުވި މީހުން ހޯދުމަށް ހެލިކޮޕްޓަރުތަކާއި މަތިންދާބޯޓުތަކުގެ އިތުރުން އެހެން މަނަވަރުތައް ވެސް ދަނީ ހަރަކާތްތެރިވަމުންނެވެ. މިހާތަނަށް 76 މީހަކު ސަލާމަތް ކުރެވިފައިވާއިރު، އަދިވެސް 23 ފަޅުވެރިން ނުފެންނަ ކަމުގައި އޮފިޝަލުން ބުނެއެވެ. މި ހާދިސާ ހިނގި ވަގުތު މަނަވަރުގައި ޖުމުލަ 106 ފަޅުވެރިން ތިއްބެވެ.
ތައިލެންޑުގެ އަސްކަރިއްޔާއިން ބުނީ އެޗް.ޓީ.އެމް.އެސް. ސުކްހޮތައި ދިޔަވާން ފަށާފައި ވަނީ ތައިލެންޑުގެ އައްސޭރިފަށުން 20 ނޯޓިކަލް މޭލު ބޭރުން ދަތުރުކުރަމުން ދަނިކޮށް ކަމުގައެވެ. މަނަވަރު ދިޔަވާން ފެށީ، އެ ސަރަޙައްދުގައި ނަގަންފެށި ބިޔަ ރާޅުތަކެއްގެ ސަބަބުން ކަމުގައި ވެސް އަސްކަރިއްޔާއިން ބުނެއެވެ.
ކަނޑުން ފެނުނު ހަ ފަޅުވެރިންގެ ހަށިގަނޑު މިހާރު ވަނީ އެ ސަރަޙައްދުގައިވާ އަސްކަރީ މަރުކަޒަކަށް ގެންގޮސްފައެވެ. މި ހާދިސާގައި ގެއްލުނު އެންމެން ސަލާމަތް ކުރެވެންދެން، ނުވަތަ އެންމެންގެ ހަށިތައް ފެންނަންދެން، އެ މީހުން ހޯދުމުގެ މަސައްކަތް ހުއްޓައިނުލައި ކުރިއަށްގެންދާނެ ކަމުގައި ރޯޔަލް ތައި ނޭވީގެ ކޮމާންޑަރު ޗޮންގްޗައި ޗޮމްޗޮންގްޕަތު ވިދާޅުވިއެވެ.
މި ހާދިސާ ހިނގި ވަގުތަކީ، ޢާންމުކޮށް މަނަވަރުގައި ތިބޭ ފަޅުވެރިންގެ އަދަދަށްވުރެ އިތުރަށް ސިފައިން ތިބި ވަގުތެއް ކަމަށާއި، އެ މީހުން މަނަވަރުގައި ދަތުރުކުރަމުން ގޮސްފައި ވަނީ، ތައިލެންޑުގެ ކަނޑުގެ ސިފައިންގެ އަހަރީ ދުވަސް ފާހަގަކުރުމުގެ ހަރަކާތްތަކުގައި ބައިވެރިވުމަށް ކަމުގައި ވެސް އޭނާ ވިދާޅުވިއެވެ.
މަނަވަރުގައި ދަތުރުކުރަމުންދިޔަ ފަޅުވެރިން ހޯދުމުގެ މަސައްކަތް ކުރަމުންދާއިރު، ޕްރަޗުއަޕް ކިރީ ޚާން ޕުރޮވިންސުގެ އައްސޭރިފަށުގެ ސަރަޙައްދުތަކަށް އެ މީހުންގެ ޢާއިލާތަކުން ވަނީ ޖަމާވެފައެވެ. ނަމަވެސް، އެ ސަރަޙައްދުގެ މޫސުން ގޯސްވުމުގެ ސަބަބުން، ގެއްލިފައިވާ މީހުން ހޯދުމަށް ކުރަމުންދާ މަސައްކަތްތަކަށް ވަނީ ހުރަސް އެޅިފައެވެ. މޫސުން ރަނގަޅުވުމުން، ޑައިވަރުންގެ ޓީމުތަކުން އެ ސަރަޙައްދުގެ ކަނޑުއަޑި ބަލައި ފާސްކުރަން ފަށާނެ ކަމަށް ވެސް އަސްކަރިއްޔާއިން ބުނެއެވެ.
މި ހާދިސާ ހިނގަން މެދުވެރިވީ މަނަވަރުގެ އިލެކްޓްރޯނިކް ނިޒާމަށް ގެއްލުންތަކެއް ލިބުމުގެ ސަބަބުން ކަމުގައި އެ ޤައުމުގެ އަސްކަރިއްޔާއިން ޤަބޫލު ކުރެއެވެ. އަދި، އެ ކަން ކަށަވަރު ކުރުމަށް މިހާރު ދަނީ ތަހުޤީޤު ކުރަމުންނެވެ. މަނަވަރު ދިޔަވާން ފެށުމުން، ދިޔަހިއްކަން ފަޅުވެރިން މަސައްކަތް ކުރި ކަމަށާއި، ނަމަވެސް އެ ކަން ކާމިޔާބުވެފައި ނުވާ ކަމުގައި ވެސް އަސްކަރިއްޔާއިން ބުނެއެވެ.
މި ހާދިސާ ހިނގި ސަރަޙައްދުގެ މޫސުން ކުރިއަށް އޮތް ދުވަސްތަކުގައި ވެސް ގޯސްވާނެ ކަމަށް ތައިލެންޑުގެ މުސުމާ ބެހޭ އިދާރާއިން އިންޒާރު ކުރެއެވެ. އަދި، އެ ސަރަޙައްދުން ދަތުރު ނުކުރުމަށް، އެ އިދާރާއިން ވަނީ ކުދި ބޯޓުފަހަރަށް އިލްތިމާސް ކޮށްފައެވެ. އެޗް.ޓީ.އެމް.އެސް. ސުކްހޮތައިއަކީ 1987 ވަނަ އަހަރު ބަނދެފައިވާ މަނަވަރެކެވެ.