އެމެރިކާގެ ކެލިފޯނިޔާ ސްޓޭޓްގެ އިރުމަތީ އައްސޭރިފަށުގެ ސަރަޙައްދަށް އައި ބާރުގަދަ ބިންހެލުމެއްގައި ދެ މީހުން މަރުވެއްޖެއެވެ. ކެލިފޯނިޔާގެ ހަމްބޮލްޓް ކައުންޓީއަށް އައި މި ބިންހެލުން ރެކޯޑު ކުރެވިފައި ވަނީ ރިކްޓަރ މިންގަނޑުން 6.4ގައެވެ. މި ބިންހެލުމާ އެކު އެ ސަރަޙައްދަށް އައި ލޮޅުންތަކުގައި ގިނަ އަދަދެއްގެ ޢިމާރާތްތަކަށް އެކިވަރުގެ ގެއްލުންތައް ލިބުނެއެވެ.
މި ބިންހެލުމާ ގުޅިގެން ކުރިމަތިވި ހާދިސާތަކުގައި 12 ވަރަކަށް މީހުންނަށް އަނިޔާވި ކަމުގައި ހަމްބޮލްޓް ކައުންޓީއިން ބުނެއެވެ. އަދި، ދެ މީހަކު ވަރުވެފައިވާ ކަން ކަށަވަރު ކޮށްދީފައިވީ ނަމަވެސް، އެ މީހުން މަރުވާން މެދުވެރިވި ސަބަބު ހާމަކޮށްފައެއް ނުވެއެވެ. ބުނެފައި ވަނީ، ބިންހެލުން އައި ވަގުތު ޞިއްޙި އެމަރޖެންސީއެއް ކުރިމަތިވެ، ދެ މީހަކު މަރުވެފައިވާ ކަމުގައެވެ.
ބިންހެލުމާ ގުޅިގެން ހަމްބޮލްޓް ކައުންޓީގެ ބައެއް ސަރަޙައްދުތަކުން ކަރަންޓުގެ ޚިދުމަތް ވެސް ވަނީ މެދުކެނޑިފައެވެ. އަދި، މަގުތަކާއި ޢިމާރާތްތަކުގެ އިތުރުން ފެނުގެ ނިޒާމަށް ވެސް ގެއްލުންވެ، ބައެއް ސަރަޙައްދުތަކުން ފެނުގެ ޚިދުމަތް ވެސް ވަނީ މެދުކެނޑިފައެވެ.
ބިންހެލުމާ އެކު އެ ސަރަޙައްދަށް 80 އަށްވުރެ ގިނަ ލޮޅުންތައް އަރާފައިވާ ކަމުގައި އޮފިޝަލުން ބުނެއެވެ. މި ބިންހެލުން އައިސްފައި ވަނީ ސެން ފްރެންސިސްކޯގެ އުތުރުން 350 ކިލޯމީޓަރު ދުރުގައި އޮންނަ ސަރަޙައްދަކަށެވެ. މި ބިންހެލުން އައިސްފައިވާ ހަމްބޮލްޓް ކައުންޓީ އޮންނަ ސަރަޙައްދަކީ، ދޭތެރެދޭތެރެއިން ލޮޅުންތައް އަންނަ ހިސާބެކެވެ.
ބިންހެލުމާ އެކު އެ ސަރަޙައްދުގައި ގޭހުގެ ޚިދުމަތް ފޯރުކޮށްދޭ ހޮޅުތަކަށް ވެސް ގެއްލުން ލިބުނެވެ. އަދި، އެއް ޢިމާރާތުގައި ރޯވެ، އިތުރު ދެ ޢިމާރާތް ވެއްޓުނެވެ. ގިނަ އިރުތަކެއް ނުވެ، ރޯވެފައިވާ އަލިފާންގަނޑު ނިއްވައިލާ، ވެއްޓުނު ޢިމާރާތްތަކުގެ ދަށުގައި ތާށިވި މީހުން ވަނީ ސަލާމަތް ކޮށްފައެވެ. މި ބިންހެލުމާ ގުޅިގެން 24އަށްވުރެ ގިނަ ޢިމާރާތަށް އެކިވަރުގެ ގެއްލުންތައް ލުބުނު ކަމުގައި ހަމްބޮލްޓް ކައުންޓީގެ އޮފިޝަލުން ބުނެއެވެ.
ކަރަންޓުގެ ޚިދުމަތް މެދުކެނޑިފައިވާ 79,000 ގެއަކާއި، ފެނުގެ ޚިދުމަތް ކެނޑިފައިވާ ގެދޮރަށް އެ ޚިދުމަތްތައް އަލުން ގުޅަދިނުމަށް މިހާރު ދަނީ މަސައްކަތް ކުރަމުންނެވެ. ގެދޮރަށް ލިބުނު ގެއްލުމާ ގުޅިގެން 150އެއްހާ ޢާއިލާއަށް ވަގުތީ ހިޔާވަހިކަން ހޯދައިދޭން ޖެހުނު ކަމުގައި ވެސް އެ ކައުންޓީގެ އޮފިޝަލުން ބުނެއެވެ.
ބިންހެލުން އައުމުގެ 10 ވަރަކަށް ސިކުންތު ކުރިން، ކެލިފޯނިޔާގެ ބިންހެލުންތަކާ ގުޅޭ އިންޒާރުދޭ ނިޒާމުން ވަނީ، އެ ސަރަޙައްދުގައި ދިރިއުޅޭ 3 މިލިޔަނަށްވުރެ ގިނަ މީހުންނަށް އިންޒާރުގެ ނޯޓިސް ފޮނުވާފައެވެ. ފާއިތުވި 100 ވަރަކަށް އަހަރުގެ ތެރޭގައި އެ ސަރަޙައްދަށް ރިކްޓަރ މިންގަނޑުން 6އާއި 7އާ ދެމެދުގެ ބާރުމިނުގެ 40 އަށްވުރެ ބިންހެލުން އައިސްފައިވާ ކަމަށް ރެކޯޑު ކުރެވިފައިވެއެވެ.