އަފްޣާނިސްތާނުގެ އަންހެނުންނަށް ޔުނިވަރިސިޓީތަކުގައި މަތީ ތަޢުލީމު އުނގެނުމަށް އޮތް ފުރުޞަތަށް، އެ ޤައުމުގައި ވެރިކަން ކުރަމުންދާ ތާލިބާނުން ހުރަސް އަޅައިފިއެވެ. އެ ޤައުމުގެ ވެރިކަމާ ތާލިބާނުން އަމިއްލައަށް ހަވާލުވި ފަހުން އެ ޖަމާޢަތުން ދަނީ އަންހެނުންގެ ހައްޤުތަކާއި މިނިވަންކަމަށް ހުރަސް އަޅަމުންނެވެ. ތާލިބާނުން އެންމެ ފަހުން މި ވަނީ ޔުނިވަރސިޓީތަކުގައި މަތީ ތަޢުލީމު ހާސިލު ކުރުން ވެސް އަންހެނުންނަށް މަނާކޮށްފައެވެ.
ތާލިބާނުން މި ކަން އިޢުލާނު ކޮށްފައި ވަނީ ސަރުކާރާއި އަމިއްލަ ޔުނިވަރިސިޓީތަކަށް އެ ޤައުމުގެ މަތީ ތަޢުލީމާ ބެހޭ ވަޒީރު ނިދާ މުޙައްމަދު ނަދީމް ފޮނުވި ސިޓީއެއްގައެވެ. އޭގައި އޮތީ، އިތުރު ގޮތެއް އަންގަންދެން، އަންހެނުންނަށް އެ ތަންތަނުގައި ކިޔެވުމުގެ ފުރުޞަތު ނުދިނުމަށް އަމުރުކުރާ ކަމުގައެވެ. އަދި، އެ އަމުރު ތަންފީޒު ކުރުމަށް އެ ތަންތަނަށް ވަނީ އަންގާފައެވެ.
އަފްޣާނިސްތާނުގެ އިންތިޚާބީ ސަރުކާރު ވައްޓައިލާ ތާލިބާނުން ވެރިކަމާ ހަވާލުވުމަށް ފަހު، އަންހެނުންގެ ހައްޤުތައް ހިމާޔަތް ކޮށްދިނުމަށް ވަޢުދުވިއެވެ. ނަމަވެސް، ފެނިގެން ދަނީ އެ ވަޢުދާ ޚިލާފުވަމުންދާ މަންޒަރެވެ. އަދި، އަންހެނުންގެ ހައްޤުތައް ހަނިކޮށް، މިނިވަންކަމަށް އަރައިގަންނަމުންދާ މަންޒަރެވެ.
ޔުނިވަރސިޓީތަކުގައި އަންހެނުންނަށް ތަޢުލީމު ހާސިލު ކުރުމުގެ ފުރުޞަތު ބަންދުކޮށްފައި މި ވަނީ، ޔުނިވަރސިޓީތަކާ ގުޅުމުގެ ކުރިން ހަދަން ޖެހޭ އެންޓްރެންސް ޓެސްޓު އެތަކެއް ހާސް ދަރިވަރުންނެއް ހަދާފައިވާ ދަނޑިވަޅެއްގައެވެ. ފިނިމޫސުމަށް ކިޔަވައިދިނުނަށް މެދުކަނޑައިލުމަށް ފަހު، ޔުނިވަރސިޓީތައް ދެން ހުޅުވާނީ އަންނަ އަހަރުގެ މާރިޗު މަހުއެވެ.
ބައިނަލްއަޤުވާމީ މުޖުތަމަޢުން ވަނީ ތާލިބާނުންގެ ނިންމުމަށް ވަރަށް ބޮޑަށް ފާޑުކިޔާފައެވެ. މި ނިންމުމާ މެދު ކަންބޮޑުވުން ފާޅުކުރައްވަމުން އެމެރިކާގެ ޚާރިޖީ ވުޒާރާގެ ތަރުޖަމާނު ނެޑް ޕްރައިސް ވިދާޅުވީ، ތާލިބާނުން އަމަލު ކުރަމުން ދަނީ އެ ޤައުމުގެ ރައްޔިތުންނަށް އެ ޖަމާޢަތުން ވެފައިވާ ވަޢުދުތަކާ ޚިލާފަށް ކަމުގައެވެ. އަދި، މި ފަދަ އަމަލުތަކުގެ ނަތީޖާ ފަހުން ހިތިވާނެ ކަމުގައި ވެސް އޭނާ ވިދާޅުވިއެވެ.
ވެރިކަމާ ހަވާލުވުމަށް ފަހު ތާލިބާނުން ވަނީ ޔުނިވަރސިޓީތަކުގެ ޤާވާޢިދުތަކާ ބޮޑެތި ބަދަލުތަކެއް ގެނެސްފައެވެ. އަދި، އަންހެން ދަރިވަރުންނަށް މަތީ ސާނަވީ ތަޢުލީމު އުނގެނުމުގެ ފުރުޞަތު ވެސް ތާލިބާނުން ވަނީ ހަނިކޮށްފައެވެ. އެ ނިންމުމާ އެކު ވެސް ޔުނިވަރސިޓީތަކަށް ވަނުމުގެ ޝަރުޠު ހަމަވާ ކުދިންގެ އަދަދު އެތަކެއް ގުނައަކަށް މަދުވާނެއެވެ.
ތާލިބާނުންގެ މި ނިންމުންތަކަށް އ.ދ.އިން ވެސް ވަނީ ފާޑުކިޔާފައެވެ. އަފްޣާނިސްތާނުގައި ހުންނަވާ އ.ދ.ގެ ސަފީރުގެ ނައިބު ރާމިޒު އަލަކްބަރޮފް ވިދާޅުވީ އުނގެނުމަކީ ކޮންމެ މީހަކަށް ވެސް ލިބިދޭންޖެހޭ ހައްޤެއް ކަމުގައެވެ. އަދި، ތަޢުލީމު ހާސިލު ކުރުމުގެ ދޮރުތައް އަފްޣާނިސްތާނުގެ އަންހެނުންނަށް ބަންދު ކުރުމަކީ، އެ ޤައުމުގެ ކުރިމަގަށް އޭގެ ނޭދެވޭ އަސަރު ކުރާނެ ކަމެއް ކަމުގައި ވެސް އޭނާ ވިދާޅުވިއެވެ.
އަންހެނުންނަށް އުނގެނުމުގެ ފުރުޞަތު ދިނުމާ މެދު ތާލިބާނުންގެ ވެރިންގެ މެދުގައި ވެސް ވަނީ ޚިޔާލު ތަފާތުވުންތައް އުފެދިފައެވެ. ތާލިބާނުންގެ އިސް ލީޑަރު ހިބާތުالله އަޚުންދްޒާދާ އަކީ އަންހެނުންނަށް އެ ފުރުޞަތު ދިނުމާ ދެކޮޅު މީހެކެވެ. ނަމަވެސް، ތާލިބާނުންގެ ބައެއް ކޮމާންޑަރުން އޭނާގެ ނިންމުންތަކާ ދެކޮޅު ހަދައެވެ. ތާލިބާނުން ބުނީ، ޔުނިވަރސިޓީތަކަށް އަންހެނުން ދިޔުން މަނާކޮށްފައި ވަނީ ވަގުތީ ގޮތުން ކަމުގައެވެ.