ރަޝިޔާއިން ޔޫކްރެއިނުގެ ދެކުނުގައިވާ ބަނދަރުމަތީ ރަށެއް ކަމުގައިވާ އޮޑެސާއަށް ދެމުންދާ ވަރުގަދަ މިސައިލް ހަމަލާތަކުގެ ސަބަބުން އެ ސަރަޙައްދުން ކަރަންޓުގެ ޚިދުމަތް ކެނޑިއްޖެއެވެ. ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވީ އޮޑެސާގައި 1.5 މިލިޔަނަށްވުރެ ގިނަ މީހުން މި ވަގުތު ދިރިއުޅެމުން ދަނީ ކަރަންޓާ ނުލައި ކަމުގައެވެ.
އޮޑެސާގެ ރައްޔިތުންނަށް ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށް ރަޝިޔާއިން ހަމަލާދީފައި ވަނީ ކަމިކާޒީ ޑްރޯން ބޭނުންކޮށްގެން ކަމުގައި ޔޫކްރެއިނުން ބުނެއެވެ. އަދި، އެންމެ ވަރުގަދަކޮށް ހަމަލާތައް ދީފައި ވަނީ ދަންވަރުގެ ވަގުތުގައި ކަމަށް ވެސް އޮޑެސާގެ އޮފިޝަލުން ބުނެއެވެ.
"މިއަދު ކުރިމަތިވެފައި މި އޮތީ ކަރަންޓުގެ ދަތިކަން. އޮޑެސާގެ ރައްޔިތުން ތިބީ ވަރަށް ނިކަމެތި ހާލުގައި. ރަޝިޔާއިން ހަމަލާދީފައި ވަނީ އީރާނުގައި އުފައްދާފައިވާ ޑްރޯންތަކެއް ބޭނުންކޮށްގެން. އޮޑެސާގެ އިތުރުން ގިނަ އެހެން ސަރަޙައްދުތަކެއް މި ވަގުތު އޮތީ ކަނުއަނދިރީގައި،" ޒެލެންސްކީ ވިދާޅުވިއެވެ.
އޮޑެސާގައި މި ވަގުތު ކަރަންޓުގެ ޚިދުމަތް ލިބޭ ހަމައެކަނި ތަންތަނަކީ ހޮސްޕިޓަލްތަކާއި މާބަންޑު މީހުންނަށް ފަރުވާދޭ ކުލިނިކުތަކެވެ. ކަރަންޓުގެ ޚިދުމަތާ ނުލައި އޮޑެސާގެ ރައްޔިތުން މި ވަގުތު ދިރިއުޅެމުން ދަނީ ވަރަށް ދަތި ހާލުގައި ކަމަށް ވެސް އެ ރަށުގެ އޮފިޝަލުން ބުނެއެވެ.
"އޮޑެސާ ސަރަޙައްދުގައި އެކަނިވެސް ކަރަންޓުގެ ޚިދުމަތާ ނުލައި ދިރިއުޅެމުންދާ މީހުންގެ އަދަދު 1.5 މިލިޔަނަށްވުރެ މައްޗަށް އަރާ. ކަރަންޓުގެ ޚިދުމަތް ގުޅާފައި ވަނީ އެންމެ މުހިންމު ޢިމާރާތްތަކަށް އެކަނި. އެހެން ތަންތަނަށް ވެސް ކަރަންޓު ގުޅައިދޭން މި ދަނީ މަސައްކަތް ކުރަމުން،" ޒެލެންސްކީ ވިދާޅުވިއެވެ.
ރަޝިޔާގެ ޑްރާންއާއި މިސައިލް ހަމަލާތައް އަމާޒު ކުރަމުން ދަނީ ކަރަންޓު ފަދަ ޒަރޫރީ ޚިދުމަތް ދިނުމަށް ބޭނުންވާ ވަސީލަތްތަކަށެވެ. އިންޖީނުގެތަކާއި އެހެނިހެން ވަސީލަތްތަކަށެވެ. ބޭނުމަކީ، މިހާރު ފިނިމޫސުމުގައި ޔޫކްރެއިނުގެ ރައްޔިތުން ބިކަ ހާލުގައި ޖެއްސުމެވެ.
ރަޝިޔާއިން ޔޫކްރެއިނުގެ ރަށްތަކަށް މިސައިލް ހަމަލާތައް އަމާޒުކުރަން ފަށާފައި ވަނީ ހަނގުރާމައިގައި ބޮޑެތި ނާކާމިޔާބީތަކަކާ ކުރިމަތިލާން ޖެހުމުންނެވެ. މީގެ ތެރޭގައި ރަޝިޔާ ސިފައިން އަތްގަދަ ކޮށްފައިވާ ބައެއް ސަރަޙައްދުތަކުން ފައިބަން ޖެހުމަކީ އެއް ސަބަބަވެ. ޔޫކްރެއިނުގެ ސިފައިން ވަނީ، ރަޝިޔާ ސިފައިން އަތްގަދަކޮށްފައިވާ ހަތަރު ސަރަޙައްދުގެ ތެރެއިން ދެކުނުގައިވާ ޚާރްސަން މިނިވަން ކޮށްފައެވެ.
ފެބުރުވަރީ 24ވަނަ ދުވަހު ޔޫކްރެއިނަށް އަރައި ރަޝިޔާ ސިފައިން ފެށި މި ހަނގުރާމަ ދިގުލައިގެން ދާނެ ކަމަށް ބެލެވޭ ކަމުގައި ރަޝިޔާގެ ރައީސް ވްލަޑިމިޔަރ ޕުޓިން ވަނީ ވިދާޅުވެފައެވެ. އަދި، ޔޫކްރެއިނުން ރަޝިޔާ ސިފައިން ފައިބާނީ، ހަނގުރާމައިގެ ލަނޑުދަނޑިތައް ހާސިލުވުން ކަމުގައި ވެސް އޭނާ ވިދާޅުވިއެވެ. މީގެތެރޭގައި ޒެލެންސްކީގެ ސަރުކާރު ވައްޓައިލުމާއި، ޔޫކްރެއިނުގެ މައި ހަތަރު ސަރަޙައްދެއް ހިފުން ހިމެނެއެވެ.