ޔަހޫދީންގެ އަޅުވެތިކަމުން ފަލަސްޠީނުގެ ރައްޔިތުން މިނިވަންކޮށް، ފަލަސްޠީނުގެ މިނިވަން ދަޢުލަތެއް ޤާއިމުކުރަން ޗައިނާއިން ތާޢީދުކުރާ ކަމުގައި އެ ޤައުމުގެ ރައީސް ޝީ ޖިންޕިންގް ވިދާޅުވެއްޖެއެވެ. އޭނާ މިމޭރުމުން ވާހަކަފުޅު ދައްކަވާފައި ވަނީ ގަލްފްގެ ޤައުމުތަކާއި ޗައިނާއާ ދެމެދު ގުޅުން ބަދަހިކުރުމުގެ މަޝްވަރާތައް ކުރުމަށް ސަޢޫދީ ޢަރަބިއްޔާގައި ބޭއްވި ސަމިޓެއްގައި ތަޤުރީރު ކުރައްވަމުންނެވެ.
"އަޅުވެތިކަމުގައި ފަލަސްޠީނުގެ ރައްޔިތުން ދިރިއުޅޭތާ އެތަކެއް އަހަރެއް ވެއްޖެ. މިއީ އިންސާފެއް ނޫން. އަދި މިގޮތުގައި ކުރިއަކަށް ދެވާކަށް ނެތް،" ޝީ ވިދާޅުވިއެވެ. އަދި، ފަލަސްޠީނަށް އ.ދ.ގެ މެންބަރުކަން ދީ، 1967ވަނަ އަހަރުގެ އެއްބަސްވުމާ ގޮތަށް، ފަލަސްޠީނުގެ މިނިވަން ދަޢުލަތެއް ޤާއިމުކޮށްދިނުމަށް ވެސް ޝީ ގޮވައިލެއްވިއެވެ.
ސަޢޫދީ ޢަރަބިއްޔާއަށް ކުރައްވަމުން ގެންދަވާ ދަތުރުފުޅުގައި ޝީ ވަނީ އެ ޤައުމުގެ ރަސްގެފާނު ސަލްމާނާއި ވަލީއަޙުދު މުޙައްމަދު ބިން ސަލްމާނާ ބައްދަލުކުރައްވައި، ދެ ޤައުމުގެ ދެމެދުގައި އިޤުތިޞާދާއި ވިޔަފާރީގެ ދާއިރާއިން ގުޅުންތައް ބަދަހިކުރުމަށް ގިނަ އެއްބަސްވުންތަކެއް އެކުލަވައިލައްވާފައެވެ. މިއީ 2016ވަނަ އަހަރަށްފަހު ޝީ ސަޢޫދީ ޢަރަބިއްޔާއަށް ކުރައްވާ ފުރަތަމަ ދަތުރުފުޅެވެ.
ޔަހޫދީންގެ ފަލަސްޠީނުގެ ބިންތަކަށް ވެރިވެގަނެފައި ވަނީ 1967ވަނަ އަހަރު ކުރި މެދުއިރުމަތީގެ ހަނގުރާމައިގައެވެ. މި ހަނގުރާމައިގައި ޔަހޫދީންގެ ދަޢުލަތުން ވަނީ ހުޅަނގު އައްސޭރިއާއި އިރުމަތީ ޤުދުސްގެ އިތުރުން ޣައްޒާއަށް އަތްގަދަކޮށްފައެވެ. އިރުމަތީ ޤުދުސް ހިފާފައި ވަނީ 1980ވަނަ އަހަރުއެވެ.
އިރުމަތީ ޤުދުސްއަކީ އިސްރާޢީލުގެ ވެރިރަށުގެ ގޮތުގައި އެ ޤައުމުން ބެލި ނަމަވެސް، ބައިނަލްއަޤުވާމީ މުޖުތަމަޢުން މި ކަން ބަލައިގަނެފައެއް ނުވެއެވެ. 2005ވަނަ އަހަރު ޔަހޫދީންގެ ސިފައިން ވަނީ ޣައްޒާއިން ފައިބާފައެވެ. ނަމަވެސް، އެ ރަށް އަދިވެސް އޮތީ ޔަހޫދީ ސިފައިންގެ ބާރުގެ ދަށުގައެވެ.
ވެރިވެގަނެފައިވާ ފަލަސްޠީނުގެ ބިންތަކުގައި ޔަހޫދީން ވަޒަންވެރި ކުރުވުމަށް އިސްރާޢީލުން ދަނީ ގިނަ މަސައްކަތްތަކެއް ކުރަމުންނެވެ. އެ ބިންތަކުގައި މިހާރު ވެސް 500,000އަށްވުރެ ގިނަ ޔަހޫދީން ދަނީ ދިއިރުޅެމުންނެވެ. އަދި ހުޅަނގު އައްސޭރީގައި ދިރިއުޅޭ 3 މިލިޔަނަށްވުރެ ގިނަ ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީ ސިފައިންގެ އަޅުވެތިކަމުގެ ދަށުގައެވެ.