ނުރައްކާތެރި ބައްޔެއް ކަމުގައިވާ އިބޯލާއަށް ފަރުވާ ކުރުމަށް އުފައްދާފައިވާ އައު ވެކްސިންތަކެއް ޓެސްޓު ކުރުމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ތައްޔާރުވެއްޖެއެވެ. ވެކްސިންތައް ޓެސްޓު ކުރުމަށް ހަމަޖެހިފައި ވަނީ އިރުމަތީ އެފްރިކާގެ ޤައުމެއް ކަމުގައިވާ ޔުގާންޑާގައެވެ. ޓެސްޓުތައް ހެދުމަށް ތައްޔާރުވެފައި މި ވަނީ އެ ޤައުމުގައި ހަލުވިކަމާ އެކު އިބޯލާ ފެތުރެމުންދާ ދަނޑިވަޅެއްގައެވެ.
އިބޯލާ ފެތުރެމުންދާ ކަން ޔުގާންޑާއިން އިޢުލާނު ކޮށްފައި ވަނީ ސެޕްޓެންބަރު މަހުގެ 20ވަނަ ދުވަހުއެވެ. މި ބަލި ޖެހިފައިވާ މީހުން ޔުގާންޑާގެ އެކި ސަރަޙައްދުތަކުން ފެނިފައިވާއިރު، އޭގެ ތެރޭގައި ވެރިރަށް ކަމްޕާލާ ވެސް ހިމެނެއެވެ. ޔުގާންޑާގައި މިހާތަނަށް 55 މީހުން ވަނީ މި ބަލީގައި މަރުވެފައެވެ. އަދި، މި ބަލީގައި އިތުރު 22 މީހަކު މަރުވެފައިވާ ކަމަށް ޝައްކު ކުރެވޭތީ، އެ ކަން ކަށަވަރު ކުރުމަށް ޓެސްޓުތައް ހެދުމުގެ މަސައްކަތް ދަނީ ކުރަމުންނެވެ.
މި ބަލި ފެތުރުން ކޮންޓްރޯލް ކުރުމަށް ޔުގާންޑާ ވަނީ ނުކުޅެދިފައެވެ. އެ ޤައުމުގައި ފެތުރެމުން ދަނީ އިބޯލާގެ ވޭރިއެންޓެއް ކަމުގައިވާ "ސޫދާން ސްޓްރެއިން"އެވެ. މިއީ އަދި މިހާތަނަށް ފަރުވާއެއް ހޯދިފައި ނުވާ ވޭރިއެންޓެކެވެ. ނަމަވެސް، މި ވޭރިއެންޓަށް ޚާއްޞަކޮށްގެން ތިން ވެކްސިނެއް މިހާރު ވަނީ އުފައްދާފައެވެ. އަދި، ޑަބްލިޔު.އެޗް.އޯ.އިން ބުނީ އަންނަ ހަފުތާގެ ތެރޭގައި އެ ތިން ވެކްސިންގެ ޑޯޒްތައް ޔުގާންޑާއަށް ފޮނުވާނެ ކަމުގައެވެ.
ޑަބްލިޔު.އެޗް.އޯ.ގެ ޑިރެކްޓަރ-ޖެނެރަލް ޓެޑްރޮސް އަދަނޮމް ގެބްރިއޭސޮސް ވިދާޅުވީ، ވެކްސިންތައް ޔުގާންޑާއަށް ފޮނުވުމާ އެކު، ވެކްސިން ޓެސްޓު ކުރުމުގެ މަސައްކަތް ފެށޭނެ ކަމުގައެވެ. އަދި، މި ތިން ވެކްސިނަކީ ޑަބްލިޔު.އެޗް.އޯ.އިން ކަނޑައަޅާފައިވާ މާހިރުންގެ ޓީމަކުން އިވެލުއޭޓް ކޮށްފައިވާ ވެކްސިންތަކެއް ކަމުގައި ވެސް އޭނާ ވިދާޅުވިއެވެ.
"ޔުގާންޑާގައި އިބޯލާ ފެތުރެން ފެށި ހިސާބުން ފެށިގެން ގިނަ ބަޔަކު ގުޅިގެން ވަނީ ސޫދާން ވޭރިއެންޓަށް ޚާއްޞަކޮށްފައިވާ ވެކްސިނެއް އުފެއްދުމުގެ މަސައްކަތް ފަށާފައި. މި ކަމަށް ޔުގާންޑާގެ ސަރުކާރުގެ އިތުރުން ދިރާސާ ކުރާ ފަރާތްތަކާއި، ސައިންޓިސްޓުންނާއި، އެހީދޭ ޖަމުޢިއްޔާތަކުގެ އިތުރުން ހެޔޮއެދޭ ކުންފުނިތަކުން ވެސް ވަނީ ބައިވެރިވެފައި،" ޓެޑްރޮސް ވިދާޅުވިއެވެ.
ޑަބްލިޔު.އެޗް.އޯ.އިން ޓެސްޓު ކުރުމަށް ތައްޔާރުވެފައިވާ އެއް ވެކްސިނަކީ އޮކްސްފަރޑް ޔުނިވަރސިޓީއާއި އިނގިރޭސި ވިލާތުގެ ޖެނަރ އިންސްޓިޓިއުޓް ގުޅިގެން އުފައްދާފައިވާ ވެކްސިނެކެވެ. ދެވަނަ ވެކްސިން އުފައްދާފައި ވަނީ އެމެރިކާގެ ކުންފުންޏެއް ކަމުގައިވާ ސެބިން ވެކްސިން އިންސްޓިޓިއުޓްއިންނެވެ. ތިންވަނަ ވެކްސިނަކީ އިންޓަރނޭޝަނަލް އެއިޑްސް ވެކްސިން އިންސްޓިޓިއުޓްއިން އުފައްދާފައިވާ ވެކްސިނެކެވެ.
މި ވެކްސިންތައް ޓެސްޓު ކުރުމުގެ ގޮތުން ބަލި ޖެހިފައިވާ މީހުންނާއި، އެ މީހުންނާއި އެއްތަންވެފައިވާ މީހުންގެ އިތުރުން، ސެކަންޑްރީ ކޮންޓެކްޓުންގެ ގޮތުގައި ފާހަގަކުރެވިފައިވާ މީހުންނާއި ބަލި ޖެހިފައިވާ މީހުންނަށް ފަރުވާ ދިނުމަށް ހަރަކާތްތެރިވާ ޑޮކްޓަރުންނާއި ޞިއްޙީ ޚިދުމަތްތެރިންނަށް ވެކްސިން ދެވޭނެއެވެ.