ކަސްޓަމްސްގެ ބެލުމުގެ ދަށުގައި ހުރި ރާއްޖެއަށް އެތެރެކުރުން މަނާ ސިންގަލްސް ޔޫސްޕްލާސްޓިކްގެ ބާވަތްތަކެއް ނައްތާލައިފިއެވެ.
މިތަކެތި ނައްތާލާފައިވަނީ ކުޅުދުއްފުށީ ކުނި ނައްތާލާ ސަރަހައްދުގައި މިދިޔަ ނޮވެމްބަރު މަހުގެ 24 ވަނަ ދުވަހުއެވެ. ކަސްޓަމްސްއިން ނައްތާލާފައިވާ ތަކެތީގެ ތެރޭގައި ހިމެނެނީ ޕްލާސްތަށި 50 ކާޓަން، ޕްލާސްޓިކް ސަމްސާ 10 ކާޓަން، ޕްލާސްޓިކް އޫ 10 ކާޓަންގެ އިތުރުން ޕްލާސްޓިކް ވަޅީގެ 10 ކާޓަންއެވެ.
މިތަކެއްޗަކީ ދިވެހިރާއްޖޭގެ އެކްސްޕޯޓް އިމްޕޯޓް ޤާނޫނުގެ ދަށުން ދިވެހިރާއްޖެއަށް އިމްޕޯޓްކުރުން މަނާތަކެތީގެ ގޮތުގައި ކަނޑައަޅުއްވާފައިވާ ސިންގަލްސްޔޫސް ޕްލާސްޓިކްގެ ބާވަތްތައް ކަނޑައެޅުމާބެހޭ ރައީސުލްޖުމްހޫރިއްޔާގެ ޤަރާރުގެ އިސްލާހްގެ ދަށުން ހދ.ކުޅުދުއްފުށީ ކަސްޓަމްސްއިން ހިފަހައްޓާފައިވާ ތަކެއްޗެވެ.
މިތަކެތި ނައްތާލީ ކަސްޓަމްސްގެ އާންމު ޤަވާޢިދުގެ 422 ވަނަ މާއްދާގެ ދަށުން ކަސްޓަމްސްގެ ކޮންޓްރޯލްގެ ދަށުގައި ނުގެންގޮސް ހުންނަ ތަކެއްޗާއި، ރާއްޖެއަށް އެތެރެކުރަން އުޅެނިކޮށް ހިފެހެއްޓޭ މަނާތަކެތި ނައްތާލުމުގައި ކަސްޓަމްސްއިން އަމަލުކުރާ އުސޫލުގެ ދަށުންނެވެ.
އެކިއެކި ސަބަބުތަކާހުރެ ކަސްޓަމްސްގައި ހިފެހެއްޓިފައި ހުންނަ ތަކެތި ކަނޑައެޅިފައިވާ އުސޫލުގެ ދަށުން ނައްތާލެވިދާނެ ކަމަށް ކަސްޓަމްސްގެ އާއްމު ޤަވާއިދުގައި ބަޔާންކޮށްފައިވެއެވެ.