ޕާކިސްތާނުގެ ހުޅަނގުގައިވާ ކުއެޓާގައި ތާލިބާނުން ދިން ނުރައްކާތެރި ބޮމުގެ ހަމަލާއެއްގައި ތިން މީހުން މަރުވެއްޖެއެވެ. އެ ޤައުމުގެ ހަރަކާތްތެރިވާ ތާލިބާނުންގެ ގޮތްޕެއް ކަމުގައިވާ ތަޙްރީކުއްތާލިބާން (ޓީ.ޕީ.ޕީ)އިން ވަނީ 23އަށްވުރެ ގިނަ މީހުން ޒަޚަމުވި މި ހަމަލާގެ ޒިންމާ އުފުލާ ކަމަށް ބުނެފައެވެ.
ޓީ.ޕީ.ޕީ.ގެ ހަމަލާ އަމާޒު ކޮށްފައި ވަނީ ފުލުހުންގެ އުޅަނދަކަށެވެ. މި ހަމަލާގައި މަރުވި މީހުންގެ ތެރޭގައި ހިމެނެނީ ފުލުހަކާއި އަންހެނެއްގެ އިތުރުން ކުޑަކުއްޖެކެވެ. މިއީ، ޓީ.ޕީ.ޕީ.ގެ ހަނގުރާމަވެރިއަކު އަމިއްލަ ފުރާނަ ނަގައިލައިގެން ދީފައިވާ ބޮމުގެ ހަމަލާއެއް ކަމުގައި ޕާކިސްތާނުގެ ފުލުހުން ހާމަކުރެއެވެ.
ޕާކިސްތާނުގެ ސަރުކާރާއި ޓީ.ޕީ.ޕީ.އާ ދެމެދު ހަމަލާ ބަދަލުކުރުން ހުއްޓައިލުމަށް ޖޫން މަހު ހަދާފައިވާ އެއްބަސްވުން އެ ޖަމާޢަތުން މި ހަފުތާގެ ތެރޭގައި ވަނީ އުވައިލާފައެވެ. އަދި، ޕާކިސްތާނުގެ ސަރުކާރާ ދެކޮޅަށް ފާޅުގައި ހަނގުރާމަ އިޢުލާނު ކޮށްފައެވެ. އަދި، ސަރުކާރާ ދެކޮޅަށް ހަމަލާ ދިނުމަށް އެ ޖަމާޢަތުގެ ހަނގުރާމަވެރިންނަށް އިރުޝާދު ދީފައެވެ.
ކުއެޓާގެ ފުލުހުންގެ އިސް އޮފިޝަލެއް ކަމުގައިވާ އަޒްހަރު މެހެސާރު ވިދާޅުވީ ޓީ.ޕީ.ޕީ.އިން ދިން ބޮމުގެ ހަމަލާ އަމާޒުކޮށްފައި ވަނީ، ކުޑަކުދިންނަށް ވެކްސިން ޖަހައިދިނުމުގެ މަސައްކަތުގައި ހަރަކާތްތެރިވަމުންދިޔަ މީހުންގެ ސަލާމަތީ ކަންކަން ބެލެހެއްޓުމުގައި އުޅުނު ފުލުހުންނަށް ކަމުގައެވެ.
ޓީ.ޕީ.ޕީ.އިން ބުނީ ފުލުހުންނަށް އަމާޒުކޮށް ހަމަލާ ދީފައި ވަނީ ކާރުބޮމެއް ގޮއްވައިލައިގެން ކަމުގައެވެ. އަދި، މިއީ އެ ޖަމާޢަތުގެ އެއް ބާނީ ކަމުގައިވާ އުމަރު ޚާލިދު ޚުރަސާނީ މަރައިލުމާ ގުޅިގެން، އެ ކަމުގެ ބަދަލު ހިފުމުގެ ގޮތުން ދީފައިވާ ހަމަލާއެއް ކަމުގައި ވެސް އެ ޖަމާޢަތުން ބުނެއެވެ.
ޓީ.ޕީ.ޕީ.އިން ޕާކިސްތާނުގެ ސަރުކާރާ އެކު ސްލްޙައިގެ އެއްބަސްވުމެއް އެކުލަވައިލާފައި ވަނީ، އަފްޣާނިސްތާނުގެ އިންތިޚާބީ ސަރުކާރު ވައްޓައިލާ ތާލިބާނުން އެ ޤައުމުގެ ވެރިކަމާ ހަވާލުވުމަށް ފަހުއެވެ. ޓީ.ޕީ.ޕީ. އުފެދުމުގެ އަޑީގައި ތިބީ 90ގެ އަހަރުތަކުގެ ތެރޭގައި އަފްޣާނިސްތާނުގައި ހިނގި ހަނގުރާމައިގައި ބައިވެރިވި ޕާކިސްތާނުގެ ހަނގުރާމަވެރިންނެވެ.
2014ވަނަ އަހަރު ޓީ.ޕީ.ޕީ.އިން ދިން ޓެރެރިސްޓް ހަމަލާއަކާ ގުޅިގެން ޕާކިސްތާނުގެ އަސްކަރިއްޔާއިން ވަނީ އެ ޖަމާޢަތާ ދެކޮލަށް ވަރުގަދަ އަސްކަރީ ކެމްޕޭނެއް ފަށާފައެވެ. އެ ހާދިސާގައި ޓެރެރިސްޓުންގެ ޖަމާޢަތުން ވަނީ ސްކޫލަކަށް ހަމަލާދީ 150އަށްވުރެ ގިނަ މީހުން މަރައިލާފައެވެ. މަރުވި މީހުންގެ ތެރޭގައި ގިނައީ ސްކޫލްގެ ދަރިވަރުންނެވެ.
އަފްޣާނިސްތާނުގެ ވެރިކަމާ ތާލިބާނުން ހަވާލުވި ފަހުން ޓީ.ޕީ.ޕީ.ގެ ޓެރެރިސްޓް ހަމަލާތަކުގެ ޢަދަދު 50 އިންސައްތަ އިތުރުވެފައިވާ ކަމުގައި ޕާކިސްތާނުގެ އިންސްޓިޓިއުޓް އޮފް ޕީސް ސްޓަޑީޒްއިން ބުނެއެވެ. މީގެ ތެރެއިން ގިނަ ހަމަލާތައް ދީފައި ވަނީ އެ ޤައުމުގެ ހުޅަނގުގައިވާ ޚައިބަރ ޕަޚްތުންޚްވާއާއި ބަލޮޗިސްތާން ސަރަޙައްދުގައެވެ.