3 ޤާނޫނަކަށް އިޞްލާޙު ގެނައުމަށް ހުށަހަޅާ ބިލުތައް ރައްޔިތުންގެ މަޖިލީހަށް ހުށަހެޅުމަށްޓަކައި ބަންޑާރަ ނައިބުގެ އޮފީހުން ރައީސުލްޖުމްހޫރިއްޔާގެ އޮފީހަށް ފޮނުވައިފިއެވެ. މީގެތެރޭގައި ހިމެނެނީ ދިވެހިރާއްޖޭގެ ޤާނޫނުލްއުޤޫބާތު އިސްލާހުކުރުމަށް ހުށައަޅާ ބިލު، ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނަށް އިސްލާހު ގެނައުމުގެ ބިލާއި، ޖިނާއީ އިޖުރާއަތުގެ ޤާނޫނަށް އިސްލާހު ގެނައުމުގެ ބިލެވެ.
މިތިން ބިލަށް އިސްލާހް ހުށަހަޅުއްވާފައިވަނީ ސައިބަރސްޕޭސްގައި ހިންގާ ހުއްދަނޫން ޢަމަލުތައް އެއީ ކުށް ކަމުގައި ކަނޑައެޅުމަށާއި އެކުށްތަކާގުޅޭ އިޖުރާއީ އުސޫލުތައް ކަނޑައެޅުމުގެ ގޮތުން ކަމަށް ބަންޑާރަ ނައިބުގެ އޮފީހުން ވިދާޅުވެއެވެ. އަދި އެފަދަ ކުށްތައް ކުރާ ފަރާތްތަކުން އެ ކުށުގެ ޢަމަލުތައް ހިންގަމުންދާގޮތް ޓެކްނޮލޮޖީގެ ވަސީލަތްތައް ބޭނުންކޮށްގެން އިތުރަށް ފުޅާކުރަމުންދާތީ އެފަދަ ކުށްތައް ހުއްޓުވައި ފިޔަވަޅު އެޅުމުން މިއިސްލާހް ހުށަހެޅުއްވި މަޤްސަދުގެތެރޭގައި ހިމެނެއެވެ.
ދިވެހިރާއްޖޭގެ ޤާނޫނުލް އުޤޫބާތު އިސްލާހް ކުރުމަށް ހުށާހަޅާ ބިލަކީ، ސައިބަރސްޕޭސްގައި ކުރާ ކުށްތައް ދިވެހިރާއްޖޭގައި އިތުރުވަމުންދާތީއާއި އެފަދަ ކުށްތައް ކުރާ ފަރާތްތަކުން އެކުށުގެ ޢަމަލުތައް ހިންގަމުންދާ ގޮތް ޓެކްނޮލޮޖީގެ ވަސީލަތްތައް ބޭނުންކޮށްގެން އިތުރަށް ފުޅާކުރަމުންދާތީ ސައިބަރ ކްރައިމްއާ ގުޅުންހުރި ޢަމަލުތައް އެއީ ކުށްކަމުގައި ކަނޑައެޅުމަށްޓަކައި ދިވެހިރާއްޖޭގެ ޤާނޫނުލް އުޤޫބާތަށް ގެންނަންޖެހ އިސްލާހްތައް ހުށަހެޅުމުގެ ބިލެކެވެ.
ދިވެހިރާއްޖޭގެ ޤާނޫނުލްއުޤޫބާތު އިސްލާހުކުރުމަށް ހުށައަޅާ މައިގަނޑު އިސްލާހްތަ
* ހުއްދަ ނެތި ކޮމްޕިއުޓަރ ސިސްޓަމަކަށް އެކްސެސްވުން
* އިތުރު ކުށެއް ކުރުމަށް މަގުފަހިކުރުމުގެ ނިޔަތުގައި ހުއްދަނެތި ކޮމްޕިއުޓަރ ސިސްޓަމަށް އެކްސެސްވުން
* ހުއްދަނެތި ކޮމްޕިއުޓަރ ޑޭޓާ އިންޓަރސެޕްޓްކުރުން
* ހުއްދަނެތި ކޮމްޕިއުޓަރ ޑޭޓާއަށް އިންޓަފިއަކުރުން
* ހުއްދަނެތި ކޮމްޕިއުޓަރ ސިސްޓަމަކަށް އިންޓަރފިއަރކުރުން
* ނަހަމަގޮތުގައި ޑިވައިސްތައް ބޭނުންކުރުން
* ސައިބަރ ވަޔަލަންސްގެ ޢަމަލުތައް ( ކޮމްޕިއުޓަރ ސިސްޓަމް މެދުވެރިކޮށް ކުޑަކުދިންގެ އޮރިޔާން ކާޑު ޝާއިޢުކުރުން، ކޮމްޕިއުޓަރ ސިސްޓަމެއް މެދުވެރިކޮށް ޝާޢިއުކުރުމުގެ ބޭނުމަށްޓަކައި ކުޑަކުދިންގެ އޮރިޔާން ކާޑު އުފެއްދުން އަދި ކޮމޕިއުޓަރ ސިސްޓަމެއް ނުވަތަ ކޮމްޕިއުޓަރ ޑޭޓާ ސްޓޯރޭޖް މީޑިއަމެއްގައި ކުޑަކުދިންގެ އޮރިޔާން ކާޑް ބެހެއްޓުން)
* ކޮމްޕިއުޓަރާ ގުޅުންހުރި އޮޅުވާލުމުގެ އަމަލުތައް
* ކޮމްޕިއުޓަރާއި، އެއާގުޅޭ އެހެނިހެން ހައްގުތަކަށް އަރައިގަތުމުގެ އަމަލުތައް
ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނަށް އިސްލާހް ގެނައުމުގެ ބިލަކީ ސައިބަރސްޕޭސްގައި ކުރާ ކުށްތައް ދިވެހިރާއްޖޭގައި އިތުރުވަމުންދާތީއާއި އެފަދަ ކުށްތައް ކުރާ ފަރާތްތަކުން އެކުށުގެ ޢަމަލުތައް ހިންގަމުންދާ ގޮތް ޓެކްނޮލޮޖީގެ ވަސީލަތްތައް ބޭނުންކޮށްގެން އިތުރަށް ފުޅާކުރަމުންދާތީ އެފަދަ ސައިބަރކްރައިމްއާއި އެނޫންވެސް ކޮމްޕިއުޓަރ ސިސްޓަމް މެދުވެރިކޮށް ކުރާ އެހެން ކުށްތަކާއި އިލެކްޓްރޯނިކް ހެކި އެކުލެވިގެންވާ ކުށްތައް ހުއްޓުވައި ފިޔަވަޅު އެޅުމުގައި އެހެން ޤައުމުތަކާއެކު ޤާނޫނީ އެހީތެރިކަން ބަދަލުކުރުމާއި ގުޅޭގޮތުން ކަނޑައަޅަންޖެހޭ އިޖުރާއަތުތައް ކަނޑައެޅުމަށްޓަކައި ޤާނޫނަށް ގެންނަންޖެހޭ އިސްލާހް ގެނައުމަށް ހުށަހަޅާ ބިލެކެވެ.
ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނަށް ހުށަހެޅި އިސްލާހުތައް:
* އިލެކްޓްރޯނިކް ހެކި ހޯދުމާއި ގުޅޭގޮތުންނާއި، ކޮމްޕިއުޓަރ ސިސްޓަމްގައި ރައްކާކޮށްފައި ހުންނަ ޑޭޓާ އަވްސގޮތެއްގައި ޕްރިޒަރވްލުރުމާއި، ޕްރިޒަރވްކޮށްފައިވާ ޓްރެފިކް ޑޭޓާ އަވަސްގޮތެއްގައި ހާމަކުރުމާއި ގުޅޭގޮތުންނައި،، ރައްކާކޮށްފައިވާ ކޮމްޕިއުޓަރ ޑޭޓާއަށް އެކްސެސްވުމާއި ގުޅޭގޮތުން އެހީތެރިކަން ބަދަލުކުރުމާއި ގުޅޭ ގޮތުންނާއި، ޓްރެފިކް ޑޭޓާ ރިއަލް-ޓައިމްގައި ނެގުމަށްޓަކައި އެހީތެރިކަން ބަދަލުކުރުމާއި ގުޅޭގޮތުންނާއި، ކޮންޓެންޓް ޑޭޓާ އިންޓަރސެޕްޓްކުރުމާއި ގުޅޭގޮތުން ޤާނޫނީ އެހީތެރިކަން ބަދަލުކުރުމާ ގުޅޭ އުސޫލްތައް
* ކޮމްޕިއުޓަރ ސިސްޓަމް ނުވަތަ ކޮމްޕިއުޓަރ ޑޭޓާއަގުލޭ ކުށްތަކާއި، ނުވަތަ އިލެކްޓްރޯނިކް ހެކި ހޯދަންޖެހޭފަދަ ކުށްތަކާއި ގުޅިގެން ހިންގާ ޖިނާއީ ތަޙްޤިގުތަކާއި ޝަރީޢަތްތަކަށް ބޭނުންވާ އެހީތެރިކަން ދިވެހިރާއްޖެއިން ބޭރު ޤައުމުތަކަށް ވަގުތުން ފޯރުކޮށްދިނުމަށްޓަކައި އަދި ބޭރު ޤައުމުތަކުން ދިވެހިރާއްޖެއަށް ހޯދުމަށްޓަކައި 24/7 ނެޓްވަރކެއް ޤާއިމްކުރުމާގުޅޭ އުސޫލްތައް
ޖިނާޢީ އިޖުރާޢަތުގެ ޤާނޫނަށް އިސްލާހު ގެނައުމުގެ ބިލުގައި ހުށައަޅާ ކަންކަމުގެ ތެރޭގައި ޒާތީ މުޢާމަލާތް އިންޓަސެޕްޓްކުރުމުގައި މިހާރު ޢަމަލުކުރާ އުސޫލުތަކަށް ބައެއް ބަދަލުގެނައުން ހިނެމެއެވެ. އަދި ޤާނޫނު ތަންފީޒުކުރާ އިދާރާތަކަށް ބައެއް ބާރުތައް ލިބިދިނުމަށް ކަނޑައަޅަންޖެހޭ ކަނޑައެޅުމަށް އެޤާނޫނަށް ހުށަހަޅަންޖެހޭ އިސްލާހްތައް ހިމެނެއެވެ.
ޖިނާޢީ އިޖުރާޢަތުގެ ޤާނޫނަށް އިސްލާހު ގެނައުމުގެ ބިލުގައި ހުށައަޅާ ކަންކަން:
* ސަރވިސް ޕްރޮވައިޑަރުން ސަބްސްކްރައިބަރ އިންފޮމޭޝަން އަދި ކޮމިއުނިކޭޝަން ޑޭޓާ ރިޓެއިންކުރުމާއި ގުޅޭ އިޖުރާއަތު
* ރައްކާކޮށްފައިވާ ކޮމްޕިއުޓަރ ޑޭޓާ އަވަސް ގޮތެއްގައި ޕްރިޒަރވްކުރުމަށާޢި، ޓްރެފިކް ޑޭޓާ ވަކި މިންވަރަކަށް ހާމަކުރުމަށް އެންގުމާ ގުޅޭ އިޖްރާޢަތު
* ކޮމްޕިއުޓަރ ޑޭޓާއާޢި، ސަބްސްކްރައިބަރ އިންފޮމޭޝަން ހޯދުމަށް ޕްރޮޑަކްޝަން އަމުރު ހޯދުމާއި އެއަމުރު ތަންފީޒްކުރުމުގެ އިޖްރާއަތު
* ރައްކާކޮށްފައިވާ ކޮމްޕިއުޓސރ ޑޭޓާ ބަލައި ފާސްކުރުމާއި، އެޑޭޓާ ހިފެހެއްޓުމާ ގުޅޭ އިޖުރާއަތު
* ޓްރެފިކް ޑޭޓާ ރިއަލް ޓައިމްގަި ނެގުމަށް ކޯޓު އަމުރު ހޯދުމާއި އެއަމުރު ތަންފީޒްކުރުމުގެ އިޖްރާއަތު
ޖިނާޢީ އިޖުރާޢަތުގެ ޤާނޫނަށް އިސްލާހު ގެނައުމުގެ މިބިލަކީ ސައިބަރ ކްރައިމްއާއި އެނޫންވެސް ކޮމްޕިއުޓަރ ސިސްޓަމް މެދުވެރިކޮށް ކުރާ އެހެން ކުށްތަކާއި އެލިކްޓްރޯނިކް ހެކި އެކުލެވިގެންވާ ކުށްތައް ހުއްތުވައި ފިޔަވަޅު އެޅުމަށްޓަކައި ޤާނޫން ތަންފީޒްކުރާ އިދާރާތަކަށް ލިބިދޭންޖެހޭ ބާރުތައް ލިބިދީ އެފަދަ ކުށްތައް ތަޙްޤީގުކޮށް ދަޢުވާ އުފުލުމުގައި އަމަލުކުރާނެ އިޖްރާއީ އުސޫލްތައް ކަނޑައެޅުމަށްޓަކައި ޤާނޫނަށް ގެންނަންޖެހޭ އިސްލާހްތައް ގެނައުމަށް ހުށަހަޅާ ބިލެކެވެ.