ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ޚާއްޞަ ސިޓީފުޅެއް، ޔުނައިޓެޑް ޢަރަބް އެމިރޭޓްސް، ޔޫއޭއީގެ ރައީސް ޝައިޚް މުޙައްމަދު ބިން ޒައިދު އަލް ނަޙްޔާނަށް އަރުވައިފިއެވެ. ރައީސުލްޖުމްހޫރިއްޔާގެ މި ސިޓީފުޅު ޔޫއޭއީގެ ރައީސްއަށް އެރުވީ، ރައީސުލްޖުމްހޫރިއްޔާގެ ޚާއްޞަ މަންދޫބެއްގެ ހައިސިއްޔަތުން ފޮރިން މިނިސްޓަރ ޢަބްދުﷲ ޝާހިދު، މިހާރު ޔޫއޭއީއަށް ކުރައްވަމުން ގެންދަވާ ދަތުރުފުޅުގައި އެޤައުމުގެ ފޮރިން މިނިސްޓަރ ޝައިޚް ޢަބްދުﷲ ބިން ޒައިދު އަލް ނަޙްޔާނާއި އެކު ބޭއްވެވި ބައްދަލުކުރެއްވުމުގައެވެ.
މި ބައްދަލުކުރެއްވުން އޮތީ ޔޫއޭއީގެ ފޮރިން މިނިސްޓްރީގައެވެ. މި ބައްދަލުކުރެއްވުމުގައި މިނިސްޓަރ ޢަބްދުﷲ ޝާހިދު ވަނީ ރައިސުލްޖުމްހޫރިއްޔާގެ ފަރާތްޕުޅުން ޔޫއޭއީގެ ސަރުކާރާއި، އެޤައުމުގެ ރައްޔިތުންނަށް ހެޔޮ އެދުންތައް އަރިސްކުރައްވާފައެވެ. މި ބައްދަލުކުރެއްވުމުގައި މިނިސްޓަރ ވަނީ ދެޤައުމުގެ ޒަމަންވީ ގާތް، ބަދަހި ގުޅުމުގެ މައްޗަށް އަލިއަޅުއްވާލައްވާ ޔޫއޭއީ ސަރުކާރުން ރާއްޖެއަށް ވެދެއްވާ އެހީތެރިކަމަށް ޝުކުރު އަދާކުރައްވާފައެވެ. ޚާއްޞަކޮށް އަބުދާބީ ފަންޑުން ރާއްޖޭގެ އިޖްތިމާއި، އަދި އިޤްތިޞާދީ ތަރައްޤީއަށް ވެދެއްމުން އަންނަ އެހީތެރިކަން މިނިސްޓަރ ފާހަގަކުރެއްވިއެވެ.
It was an honour to meet the distinguished Foreign Minister of #UAE H.H. @ABZayed, as Special Envoy of President @ibusolih, and handover a Letter to President of #UAE H.H @MohamedBinZayed.@MoFAICUAE @ofmuae pic.twitter.com/1oDvtCBGx2
— Abdulla Shahid (@abdulla_shahid) November 26, 2022
މި ބައްދަލުކުރެއްވުމުގައި ދެޤައުމުގެ ފޮރިން މިނިސްޓަރުން ވަނީ ދެޤައުމު ގުޅިގެން މަސައްކަތްކުރެވިދާނެ ދާއިރާތަކާއި ގުޅޭގޮތުންވެސް މަޝްވަރާކުރައްވާފައެވެ.، ޚާއްޞަކޮށް ބައިނަލްއަޤްވާމީ މައިދާނުގައި ދެޤައުމު ގުޅިގެން މަސައްކަތްކުރެއްވުމުގެ ޝަޢުޤުވެރިކަން ފާޅުކުރައްވާފައިވެއެވެ.
މި ބައްދަލުކުރެއްވުމުގައި ޔޫއޭއީގައި ހުންނަވާ ރާއްޖޭގެ ސަފީރު އާމިނަތު ޝަބީނާއާއި، ފޮރިން މިނިސްޓްރީގެ އިސް ބައެއް ބޭފުޅުން ބައިވެރިވެވަޑައިގެންނެވިއެވެ.
ފޮރިން މިނިސްޓަރ ޢަބްދުﷲ ޝާހިދު ޔޫއޭއީއަށް ކުރައްވަމުން ގެންދަވާ ރަސްމީ ދަތުރުފުޅުގައި ވަނީ އަބޫދާބީ ފަންޑު ފޮރ ޑިވެލޮޕްމަންޓްގެ ޑިރެކްޓަރ ޖެނެރަލް މުޙައްމަދު އަލް ސުވައިދީ އާއިވެސް ބައްދަލުކުރައްވާފައެވެ. މި ބައްދަލުވުމުގައި ވަނީ އާބޫދާބީ ފަންޑުގެ އެހީގައި ރާއްޖޭގައި މިވަގުތު ކުރިއަށްދާ މަޝްރޫޢުތަކާއި ގުޅޭގޮތުން މަޝްވަރާކުރައްވާފައެވެ.
އަބޫދާބީ ފަންޑުން ވަނީ ކުރިއަށް އޮތްތަނުގައިވެސް ރާއްޖޭގެ ތަރައްޤީއަށް އެހީތެރިކަން ފޯރުކޮށްދޭނެކަމުގެ ޔަޤީންކަން ފޮރިން މިނިސްޓަރ ޢަބްދުﷲ ޝާހިދަށް އަރުވާފައެވެ.