ހުޅުމާލޭ ބީޗް ކްލަބަށްވަދެ ދަބަހުގައި ބޮމެއް އޮތްކަމަށް ބުނި މީހާ ފުލުހުން ހައްޔަރުކޮށްފިއެވެ.
ފުލުހުން ވިދާޅުވި، ހުޅުމާލޭ ބީޗް ކްލަބްގައި ހުރި މީހެއްގެ ދަބަހުގައި ގޮވާޒާތުގެ އެއްޗެއް އޮތްކަމަށް ބުނެ މީހަކު އިންޒާރުދީފައިވާ މައްސަލައެއް ބަލަމުން އަންނަކަމަށެވެ. އެގޮތުން އާންމުން މީހަކު ފުލުހުންނަށް އެ މައްސަލަ ރޭ ރިޕޯޓްކުރުމާއި ގުޅިގެން 38 އަހަރުގެ ދިވެހި ފިރިހެނަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުން ވިދާޅުވިއެވެ. އަދި މިކަމާއި ގުޅިގެން ބަލަންޖެހޭ ކަންކަން ބަލަމުން އަންނަކަމަށް ފުލުހުން ވިދާޅުވިއެވެ.
ދަބަހުގައި ބޮމެއް އޮތްކަމަށް ބުނި މީހަކު ހައްޔަރުކޮށްފައި މިވަނީ، ޓެރަރިޒަމާއި ދެކޮޅަށް ފުލުހުން ޚާއްޞަ އޮޕަރޭޝަނެއް ހިންގައި 14 މީހަކު މިމަހު ހައްޔަރުކޮށްފައި ވަނިކޮށެވެ.
ފުލުހުން ވިދާޅުވިގޮތުގައި އެމީހުން އުޅުނީ ބާރުގަދަ ގޮއްވުމެއް ގޮއްވާލާށެވެ. އަދި ރާވާފައިވާ ހަމަލާއަކީ އެތައް ބައެއްގެ ފުރާނަ ގެއްލިދާނެ ވަރުގެ ބޮޑު ހަމަލާއެއްކަމަށާއި، އޭގެތެރެއިން އެކެއްގެ ގެއިން ގޮވާޒާތު ކެމިކަލްވެސް ފެނިފައިވާކަން ހާމަކޮށްފައިވެއެވެ.
މި އޮޕަރޭޝަން ހުއްޓާނުލައި އައްޑޫގައި ފުލުހުން އަންނަނީ ހިންގަމުންނެވެ.