ފުލުހުންނާ އެމްއެންޑީއެފް ގުޅިގެން ހިންގާ ޓެރަރިޒަމް އޮޕަރޭޝަންގައި ފެނުނު ގޮވާ ޒާތުގެ ތަކެއްޗަކީ، އިންސާނުންގެ ފުރާނައާއި މުދަލަށް ބޮޑެތި ގެއްލުންތަކެއް ދެވޭނެފަދަ ތަކެތިކަމަށް މިހާތަނަށް ތަހުޤީގަށް ފެނިފައިވާތީ، އެތަކެތި ރާއްޖެއިން ބޭރަށް ފޮނުވާ އިތުރަށް ތަޙުޤީގުކުރުމުގެ މަސައްކަތް ކުރަމުންދާކަމަށް ފުލުހުން ވިދާޅުވެއްޖެއެވެ.
ފުލުހުންނާއި އެމްއެންޑީއެފް ގުޅިގެން މިމަހުގެ 11ވަނަ ދުވަހު އައްޑޫގައި ފެށި އޮޕަރޭޝަންގައި މިހާތަނަށް 14 މީހުން ވަނީ ހައްޔަރުކޮށްފައެވެ. ހައްޔަރުކުރި މީހުންގެ ގެތަކުންނާއި، މިފަރާތްތައް ބޭނުންކުރަމުންދާ ބައެއް ގެތަކާއި، ބައެއް ވެހިކަލްތަކާއި، ޑިންގީއެއް ބަލައިފާސްކޮށް، މައްސަލައާ ގުޅުންހުރިކަމަށް ބެލެވޭ ގިނަ އަދަދެއްގެ ތަކެތި ވަނީ ހޯދާފައެވެ.
ފުލުހުން ވިދާޅުވީ މިމައްސަލައިގައި ހައްޔަރު ކުރި މީހެއް ދިރިއުޅޭ ގެއެއް ބަލައިފާސްކޮށް ނެގި އެކްސްޕްލޯސިވް ކެމިކަލްކަމަށް ޝައްކުކުރެވޭ ތިން ބާވަތެއްގެ ސާމްޕަލް، މޯލްޑިވްސް ނޭޝަނަލް ޑިފެންސް ފޯސްގެ އެކްސްޕްލޯސިވް އޯޑްނަންސް ޑިސްޕޯސަލް (އީއޯޑީ) ގެ ފަރާތުން ޗެކްކުރުމުން، އެ ސާމްޕަލްތަކުގައި ހައި އެކްސްޕްލޯސިވްގެ މާއްދާތައް ހިމެނޭކަމަށް ވަނީ ދައްކާފައިކަމަށެވެ. މި ތަކެއްޗަކީ ވަރަށް ބާރުގަދަ ގޮވުމެއް ގޮއްވާލުމަށް ބޭނުންކުރާ ތަކެތިކަމަށް ހާމަވެފައިވާކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ ސާމްޕަލްތަކުން ފެނުނު އެކްސްޕްލޯސިވްގެ ބާވަތްތަކަކީ މައިގަނޑު ގޮތެއްގައި ބާރުގަދަ ގޮއްވުންތަކަށް ބޭނުންކުރާ ހައި އެކްސްޕްލޯސިވްގެ ވައްތަރުތަކެއްކަމާއި، މިވައްތަރުތަކުގެ އެކްސްޕްލޯސިވްސްގެ މަދު މިންވަރަކުން އިންސާނުންގެ ފުރާނައާއި، މުދަލަށް ބޮޑެތި ގެއްލުން ދެވިދާނެކަމަށް އެމްއެންޑީއެފް އީއޯޑީގެ ފަރާތުން ފާހަގަކުރާކަމަށެވެ.
މިފަދަ މާއްދާތައް ހިމެނޭކަމަށް ދެއްކި ސާމްޕަލްތައް ރާއްޖެއާއި ރާއްޖެއިން ބޭރުން އިތުރަށް ތަހުލީލުކުރުމުގެ މަސައްކަތް ދަނީ ކުރެވެމުންނެވެ.
މި މައްސަލައިގައި ހައްޔަރު މީހުން މަސައްކަތްކުރީ ބާރުގަދަ ގޮއްވާލުމެއް ގޮއްވާލުމަށްކަމަށާއި، އެމީހުން މަސައްކަތް ކުރަމުން ދިޔައީ އައިސިސް ޖަމާތާ ގުޅިގެންކަމަށް ފުލުހުން ހާމަކޮށްފައިވެއެވެ. ހައްޔަރުކުރެވުނު 14 މީހުންގެ ތެރެއިން 5 މީހަކު ވަނީ ޝަރީއަތް ނިމެންދެން ބަންދުކުރެވިފައެވެ. ހައްޔަރުކުރެވުނު މީހުންގެ ތެރެއިން 4 މީހެއްގެ ބަންދުގެ މުއްދަތު ވަނީ 30 ދުވަހަށް އިތުރުކުރެވިފައެވެ. އަދި ބާކީ 5 މީހުންގެ ބަންދުގެ މުއްދަތު ވަނީ 15 ދުވަހުގެ މުއްދަތަށް އިތުރުކުރެވިފައެވެ.
މި އޮޕަރޭޝަންގައި އައްޑޫ ސިޓީ، މާލެ އަދި މާލެ އަތޮޅު ގުރައިދޫއިންވެސް މީހުން ހައްޔަރުކުރިއެވެ. މި އެންމެންވެސް ނިސްބަތް ވަނީ އައްޑުއަށެވެ.
މި އޮަޕަރޭޝަން އަދިވެސް އައްޑޫ ސިޓީގައި ދަނީ ކުރިއަށެވެ.