އަލްބޭނިޔާގެ ހުޅަނގުއުތުރުގައިވާ ސަރަޙައްދުތަކަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި އެކި ހާދިސާތަކުގައި ދެ މީހަކު މަރުވެއްޖެއެވެ. ފެންބޮޑުމުގެ އަސަރު އެންމެ ބޮޑަށް ކޮށްފައި ވަނީ އެ ޤައުމުގެ ހުޅަނގުއުތުރުގައިވާ ޝްކޮޑްރާ ސަރަޙައްދަށެވެ.
އެ ސަރަޙައްދުގައި ފެންބޮޑުވުމާ ގުޅިގެން މަރުވެފައި ވަނީ ފަރުބަދަތީ މަގެއްގައި ދުއްވާފައި ދިޔަ އުޅަނދެއްގައި ދަތުރު ކުރަމުން ދިޔަ ދެބަފައިން ކަމުގައި އަލްބޭނިޔާގެ ފުލުހުން ބުނެއެވެ. މަރުވެފައި ވަނީ 50 އަހަރުގެ ފިރިހެނަކާއި އޭނާގެ 18 އަހަރުގެ ފިރިހެން ދަރިފުޅެވެ.
މި ހާދިސާ ހިނގި ވަގުތު އެ ޢާއިލާގެ 14 އަހަރުގެ އަންހެން ކުއްޖަކު ވެސް އުޅަނދުގައި ދަތުރު ކުރިއެވެ. އެ ކުއްޖާ ވަނީ ފެންގަނޑުގެ ތެރެއިން އޮޔާ ދަނިކޮށް ސަލާމަތް ކޮށްފައެވެ. ނަމަވެސް، އެ ކުއްޖާގެ ބައްޕައާއި ބޭބެގެ ހަށިގަނޑު އަދި ފެނިފައި ނުވާ ކަމަށް ފުލުހުން ބުނެއެވެ.
ޝްކޮޑްރާގައި ހިނގި ފެންބޮޑުވުމުގެ ހާދިސާއާ ގުޅިގެން ހަތް ޢާއިލާއެއް ވަނީ ރައްކާތެރި ހިސާބުތަކަށް ބަދަލު ކޮށްފައެވެ. އަދި، ބޯކޮށް ވާރޭވެހުމާ ގުޅިގެން ބިންގަނޑު ކަނޑައިގެން ދިޔުމުގެ ހާދިސާތައް ހިނގާފާނެ ކަމަށް ބެލެވޭ ސަރަޙައްދުތަކުގައި ދިރިއުޅޭ އެހެން ރައްޔިތުން ރައްކާތެރި ހިސާބުތަކަށް ބަދަލު ކުރަން އޮފިޝަލުން ދަނީ މަސައްކަތް ކުރަމުންނެވެ.
ބޯކޮށް ވާރޭވެހުމުގެ ސަބަބުން ޝްކޮޑްރާގެ އިތުރުން އެ ސަރަޙައްދާ އިންވެގެން އޮންނަ ލޭޒާގެ ބޮޑު ސަރަޙައްދެއްގައި ވެސް ވަނީ ފެން ބޮޑުވެފައެވެ. އަދި، އެ ސަރަޙައްދުތަކުގައިވާ ކޯރުތަކާއި ފެންގަނޑުތައް ބޮޑުވެ، ބަންޑުން ވާން ކައިރިވެފައިވާ ކަމުގައި އެ ސަރަޙައްދުތަކުގެ ރައްޔިތުން ބުނެއެވެ.