ދުނިޔޭގެ ފުޓުބޯޅައިގެ އެންމެ ބޮޑު ޢީދު ވާރލްޑް ކަޕް ފެށެން ތައްޔާރުވެފައިވަނިކޮށް އިންޓަރނެޓް ގުގުމާލީ މުޅިން ތަފާތު ފޮޓޯއަކުންނެވެ. މި ފޮޓޯއަކީ ފެޝަންގެ ދާއިރާގެ މަޝްހޫރު ކުންފުންޏެއް ކަމުގައިވާ ލުއީ ވުޓާންއިން އާންމުކުރި ފޮޓޯއެކެވެ.
މި ފޮޓޯއިން ފެންނަނީ މިވަގުތު ދުނިޔޭގައި ތިބި އެންމެ މޮޅު އަދި އެންމެ ގިނަ ބައެއްގެ ސަޕޯޓު ލިބިފައިވާ ދެ ކުޅުންތެރިން ކަމުގައިވާ ލިއޮނެލް މެސީއާއި ކްރިސްޓިއާނޯ ރޮނަލްޑޯއެވެ. ދެ ފޮޓޯއިންވެސް ފެންނަނީ ދެކުޅުންތެރިންވެސް ވަރަށް ވިސްނުންތެރިކަމާއެކު ރާޒުވާގަނޑެއްގެ ތެރެއަށް ގެއްލިފައިތިއްބައެވެ.
ފޮޓޯ އެންމެ ފުރަތަމަ ޝާއިޢު ކުރީ މެސީއެވެ. މި ފޮޓޯ އިންސްޓަގްރާމަށް މެސީ ދޫކޮށްލުމާއެކު އެންމެންގެ ބޮޑު ސަމާލުކަމެއް ފޮޓޯއަށް ހުއްޓިގެން ދިޔައެވެ. ރޮނާލްޑޯވެސް ވަނީ ހަމަ އެ ފޮޓޯ ޝާއިޢުކޮށްފައެވެ. އެންމެ 19 ވަރަކަށް ގަޑިއިރުގެ ތެރޭގައި މި ފޮޓޯއަށް "ލައިކް" ކޮށްފައިވާ މީހުންގެ އަދަދު ވަނީ 31.2 މިލިޔަނަށް އަރާފައެވެ. އަދި، މެސީ ޝާއިޢު ކުރި ފޮޓޯއަށް، އެ ވަގުތުގެ ތެރޭގައި 23.3 މިލިޔަން "ލައިކް" ވަނީ ލިބިފައެވެ.
ދާދި އެކުއެކުގައި މި ތަރިން ފޮޓޯ ދޫކޮށްލިނަމަވެސް ދެމީހުންވެސް އެކަކު އަނެއްކަކު ޓެގްކޮށްފައެއް ނުވެއެވެ.
Victory is a State of Mind. A long tradition of crafting trunks photographed by @annieleibovitz for @LouisVuitton pic.twitter.com/0TsieZP40P
— Cristiano Ronaldo (@Cristiano) November 19, 2022
ފޮޓޯއިން ފެންނަނީ ރާޒުވާ ގޮނޑިއެއް ނޫނެވެ. ނަމަވެސް، ލުއީ ވުޓާންގެ ފޮށްޓެއްގައި މަތީގައި ރާޅުވާ ކުޅިބައި އަތުރާފައިވާ މަންޒަރެވެ. އެ ފޮށި ބާއްވާފައި އޮތީވެސް ލުއީ ވުޓޯންގެ ބޮޑު ފޮށްޓެއްގެ މަތީގައެވެ.
ފެންނަނީ މެސީއާއި ރޮނާލްޑޯ ރާޒުވާ ގަނޑާއި މެދު ފުންކޮށް ވިސްނަން ތިބޭ މަންޒަރެވެ. މި ފޮޓޯ ނަގާފައި ވަނީ މަޝްހޫރު ފޮޓޯގްރާފަރު އެނީ ލީބޮވިޓްޒްއެވެ.
Yeah so they weren’t actually in the same room. Still goated ad fair play to Louis Vuitton ?pic.twitter.com/8FkEO04y9A
— ? WB ? (@WalidBusquets) November 20, 2022
މި ފޮޓޯއަށް ލިބުނު ތަރުހީބާއެކު ލުއީ ވުޓާންއިން ވަނީ، މި ފޮޓޯ ނެގުމަށް ކުރި މަސައްކަތް ދައްކުވައިދޭ ވީޑިޔޯއެއް ޢާންމުކޮށްފައެވެ.
ވީޑިޔޯއިން އެނގިގެން ދިޔައީ ތަފާތު އެހެން ކަމެކެވެ. ފޮޓޯއިން މެސީއާއި ރޮނާލްޑޯ އެކުގައި ރާޒުވާ ކުޅެން ތިބި މަންޒަރު ފެނުނު ނަމަވެސް، މިއީ ދެ މީހުން އެކުގައި، އެއް ތަނެއްގައި ނަގާފައިވާ ފޮޓޯއެއް ނޫނެވެ. މިއީ، ދެ ތަނެއްގައި ނަގާފައިވާ ދެ ފޮޓޯއެއް އެއްކޮށްގެން ތައްޔާރުކޮށްފައިވާ "އެޑިޓް"އެކެވެ.
ފޮޓޯއިން ދެން ފާހަގަކުރެވުނީ ރާޒުވާ ކުޅިބައި އަތުރާފައި ހުރި ގޮތެވެ. މިއީ "ރެންޑަމް"ކޮށް، ނުވަތަ އެއްވެސް ވިސްނުމެއް ނެތި އަތުރާފައިވާ ކުޅިބައެއް ނޫނެވެ. ކުޅިބައި އަތުރާފައި ވަނީ 2017ވަނަ އަހަރު ބޭއްވި ނޯވޭގެ ރާޒުވާ މުބާރާތުގައި މަޝްހޫރު ދެ ކުޅުންތެރިން ކަމުގައިވާ މެގްނަސް ކާލްސަންއާއި ޕީޓަރ ހައިން ނީލްސަން ބައްދަލު ކުރި މެޗެއްގެ މަންޒަރާ އެއް ގޮތަށެވެ.
"މިއީ ދުނިޔޭގެ ތަށްޓަށް ކުޅެވޭ ފުޓުބޯޅަ މުބާރާތުގައި އަޅުގަނޑުގެ ޤައުމު ކަމުގައިވާ އާޖެންޓީނާ ތަމްސީލު ކުރުމުގެ ފުރުޞަތު ލިބޭ ފަސްވަނަ ފަހަރު. މިއީ އަޅުގަނޑަށް ލިބޭ ވަރަށް ބޮޑު ފަޚުރެއް. މި މުބާރާތުގެ ޓްރޮފީ އެއް ތަނުން އަނެއް ތަނަށް ގެންދަނީ ލުއީ ވުޓާންއިން ތައްޔާރު ކޮށްފައިވާ ފޮށްޓެއްގައި ކަމީ ވަރަށް ވެސް ޚާއްޞަ ކަމެއް،" ވީޑިޔޯގައި މެސީ ބުނެއެވެ.
The box under… ? pic.twitter.com/DSHRbB2Wa9
— TC (@totalcristiano) November 19, 2022
"އަޅުގަނޑުގެ ވެސް ވަރަށް ފަޚުރުވެރިވޭ. ދުނިޔޭގެ ތަށްޓަށް ކުޅެވޭ ފުޓުބޯޅަ މުބާރާތުގައި ވާދަކޮށް، އަޅުގަނޑުގެ ޤައުމު ކަމުގައިވާ ޕޯޗުގަލް ތަމްސީލު ކުރުމުގެ ފުރުޞަތު ލިބުނު ފަސް ވަނަ އަހަރު މިއީ. ވަރަށް އުންމީދީ އަހަރެއް މިއީ. ރަނގަޅު ކޯޗަކާއި ރަނގަޅު ޓީމެއް ޕޯޗުގަލްގައި އެބައޮތް،" ރޮނަލްޑޯ ވެސް ބުނެއެވެ.
މިއީ ރޮނާލްޑޯއާއި މެސީ ވެސް ވޯލްޑް ކަޕްގައި ވާދަ ކުރާނެ ކަމަށް ބެލެވޭ އެންމެ ފަހު ފަހަރެވެ. އެހެންކަމުން، ދެ ކުޅުންތެރިން ވެސް ތިބީ، އަމިއްލަ ޤައުމަށް ތަށި ކާމިޔާބު ކޮށްދިނުމުގެ ފޮނި އުންމީދާ އެކުއެވެ.