އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ޓުވިޓަރ އެކައުންޓް އަލުން އެކްޓިވޭޓްކޮށްފިއެވެ. މި ކަން އިޢުލާނު ކޮށްފައި ވަނީ ޓުވިޓަރ ކުންފުނީގެ އައު ވެރިޔާ އިލޮން މަސްކެވެ. ޓްރަމްޕްގެ ސަސްޕެންޑު ކޮށްފައިވާ ޓުވިޓަރ އެކައުންޓް އަލުން އެކްޓިވޭޓް ކުރުމަށް މަސްކް ނިންމީ، އެ ކަމާ ގުޅޭ ގޮތުން ޓުވިޓަރ މެދުވެރިކޮށް ނެގި ޚިޔާލު ހޯދުމުގެ ވޯޓަކަށް ފަހުއެވެ.
މި ވޯޓުގައި 15 މިލިޔަނަށް ވުރެ ގިނަ މީހުން ބައިވެރިވިއެވެ. އަދި، މީގެ ތެރެއިން 51.8 އިންސައްތަ މީހުން ވަނީ، ޓްރަމްޕުގެ ޓުވިޓަރ އެކައުންޓް އަލުން އެކްޓިވޭޓް ކުރުމަށް ތާޢީދު ކުރާ ކަން ހާމަކޮށްފައެވެ. "ރައްޔިތުން ބަސް ބުނެފި. ޓްރަމްޕްގެ އެކައުންޓް އަލުން އެކްޓިވޭޓް ކުރާނަން،" ވޯޓަށް ފަހު މަސްކް ކުރި ޓުވީޓެއްގައި ބުންޏެވެ.
ޓްރަމްޕުގެ އެކައުންޓް ސަސްޕެންޑު ކޮށްފައި ވަނީ، 2021ވަނަ އަހަރުގެ ޖަނަވަރީ މަހުގެ 6ވަނަ ދުވަހު އޭނާއަށް ތާޢީދު ކުރާ ބަޔަކު އެމެރިކާގެ ޤާނޫނު ހަދާ މަޖިލީހުގެ އިދާރާއަށް ދިން ހަމަލާތަކާ ގުޅިގެންނެވެ.
ޓްރަމްޕްގެ ޓުވިޓަރ އެކައުންޓް އަލުން އެކްޓިވޭޓް ކުރި ނަމަވެސް، މި ކަމަށް އޭނާގެ ފަރާތުން ލިބިފައި ވަނީ ފިނި ތަރުހީބެކެވެ. މި ކަމާ ގުޅޭ ގޮތުން ވާހަކަފުޅު ދައްކަވަމުން ޓްރަމްޕް ވިދާޅުވީ، ޓުވިޓަރގައި ހަރަކާތްތެރިވުމުގެ ބޭނުމެއް ފެނިވަޑައި ނުގަންނަވާ ކަމުގައެވެ.
ޓްރަމްޕްގެ ޓުވިޓަރ އެކައުންޓް ސަސްޕެންޑް ކޮށްފައި ވަނީ 2021ވަނަ އަހަރުގެ ޖަނަވަރީ މަހުގެ 8ވަނަ ދުވަހުއެވެ. އެއިރު، އޭނާގެ ފޮލޮވަރުންގެ އަދަދު 88 މިލިޔަނަށް އަރައެވެ. އަދި، އެކައުންޓް އަލުން އެކްޓިވޭޓް ކުރާނެ ކަން މަސްކް ހާމަ ކުރިން ފަހުން އިތުރު 100,000 އަށްވުރެ ގިނަ މީހުން ވަނީ އޭނާގެ އެކައުންޓް ފޮލޯ ކޮށްފައެވެ.
ޓުވިޓަރއިން ވަކި ކުރުމާ ގުޅިގެން ޓްރަމްޕް ވަނީ އޭނާގެ އަމިއްލަ ސޯޝަލް މީޑިޔާ އެޕްލިކޭޝަންއެއް އުފައްފަވާފައެވެ. "ޓްރުތް ސޯޝަލް"ގެ ނަން ދީފައިވާ މި އެޕްލިކޭޝަން އުފައްދާފައި ވަނީ ޓްރަމްޕް މީޑިޔާ އެންޑް ޓެކްނޮލޮޖީ ގްރޫޕުންނެވެ. މިއީ، ޓުވިޓަރއާ އަޅައިބަލާއިރު މާ ރަނގަޅު އެޕްލިކޭޝަނެއްގެ ގޮތުގައި ޓްރަމްޕް ސިފަ ކުރައްވައެވެ.
ޓްރަމްޕްގެ ޓުވިޓަރ އެކައުންޓް އެލުން އެކްޓިވޭޓް ކޮށްފައި މި ވަނީ، 2024ވަނަ އަހަރު ބާއްވާ ރިޔާސީ އިންތިޚާބުގައި ވާދަ ކުރައްވާނެ ކަން އޭނާ އިޢުލާނު ކުރައްވާފައިވާ ދަނޑިވަޅެއްގައެވެ. ނަމަވެސް، އޭނާގެ ރިޕަބްލިކަން ޕާޓީގެ ރިޔާސީ ކެނިޑޭޓަކު ކަނޑައެޅުމުގެ މަސައްކަތް އެ ޕާޓީން އަދި ފަށާފައެއް ނުވެއެވެ. އެ މަސައްކަތް ފެށުމަށް ހަމަޖެހިފައި އޮތީ 2023ވަނަ އަހަރުއެވެ.
ޕްރައިމަރީގައި ޓްރަމްޕަށް ކުރިމަތިލައްވަން ޖެހިވަޑައިގަންނަވާނެ ކަމަށް ބެލެވޭ ބައެއް ބޭފުޅުންގެ ތެރޭގައި ފްލޮރިޑާ ސްޓޭޓްގެ ގަވަރުނަރު ރޮން ޑިސެންޓިސްއާއި، ޓްރަމްޕްގެ ވެރިކަމުގައި ނައިބު ރައީސް ކަމުގެ މަޤާމު ފުރުއްވި މައިކް ޕެންސްއާއި، ވަރޖިނިޔާ ސްޓޭޓްގެ ގަވަރުނަރު ގްލެން ޔަންގްކިންއާއި، ޓެކްސަސްގެ ގަވަރުނަރު ގްރެގް އެބޮޓްގެ އިތުރުން ދެކުނު ކޮރެލައިނާގެ ކުރީގެ ގަވަރުނަރު ނިކީ ހެއިލީއާއި ކުރީގެ ޚާރިޖީ ވަޒީރު މައިކް ޕޮމްޕިޔޯ ހިމެނެއެވެ.