މެލޭޝިޔާގެ ޢާންމު އިންތިޚާބުގައި ވާދަކުރެއްވި ދާއިރާއިން ނާކާމިޔާބީއާ ކުރިމަތިވެ، އެ ޤައުމުގެ ކުރީގެ ބޮޑުވަޒީރު މަހާތިރު މުޙައްމަދުގެ ގޮނޑި ގެއްލިއްޖެއެވެ. 97 އަހަރުގެ މަހާތިރަކީ، މެލޭޝިޔާގެ ޤާނޫނު ހަދާ މަޖިލީހުގައި ރިސޯޓު ރަށެއް ކަމުގައިވާ ލަންގްކަވީ ތަމްސީލު ކުރައްވާ މެންބަރެވެ. އިންތިޚާބުގައި އޭނާ ވާދަކުރައްވާފައި ވަނީ ގޮނޑި ދިފާޢު ކުރެއްވުމަށެވެ.
ލަންގްކަވީގެ ގޮނޑިއަށް ފަސް ބޭފުޅުން ވާދަ ކުރެއްވިއެވެ. މީގެ ތެރެއިން އިންތިޚާބުގައި ދެވަނައަށް އެންމެ މަދުން ވޯޓު ލިބިވަޑައިގަތީ މަހާތިރަށެވެ. މިއީ، 50 އަހަރުވީ ސިޔާސީ ހަޔާތުގައި މަހާތިރަށް ނާކާމިޔާބީއާ ކުރިމަތިލަންވަން ޖެހިވަޑައިގަތް ފުރަތަމަ ފަހަރެވެ. މި ނާކާމިޔާބީއާ އެކު އޭނާގެ ސިޔާސީ ހަޔާތް ނިމުމަކަށް އައިސްފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
މަހާތިރަކީ ދުނިޔޭގެ ރެކޯޑު ފޮތުން ވެސް ޖާގައެއް ހޯއްދަވާފައިވާ ބޭފުޅެކެވެ. އޭނާއަކީ، ޤައުމެއްގެ ބޮޑުވަޒީރު ކަމުގެ މަޤާމު ފުރުއްވާފައިވާ އެންމެ އުމުރުން ދުވަސްވީ ބޭފުޅާއެވެ. 2018ވަނަ އަހަރު ބޭއްވި ޢާންމު އިންތިޚާބު ކާމިޔާބު ކުރައްވައި މެލޭޝިޔާގެ ބޮޑުވަޒީރުގެ މަޤާމާ ދެވަނަ ދައުރަކަށް ހަވާލުވެ ވަޑައިގެންނެވި އިރު އޭނާގެ އުމުރުފުޅަކީ 92 އަހަރެވެ.
މަހާތިރު އެންމެ ފުރަތަމަ މެލޭޝިޔާގެ ވެރިކަމާ ހަވާލުވެ ވަޑައިގަތީ 1981ވަނަ އަހަރުއެވެ. އަދި، 2003ވަނަ އަހަރާ ޖެހެންދެން ކުރިއަށް ދިޔަ އޭނާގެ ވެރިކަމުގައި މެލޭޝިޔާއަށް ވަނީ ޢުމްރާނީ ގޮތުންނާއި އިޤުތިޞާދީ ދާއިރާއިން ބޮޑެތި ކުރިއެރުންތަކެއް ހޯއްދަވައިދެއްވާފައެވެ. ނަމަވެސް، އޭނާއަކީ ގޮށްމުށުގެ ބާރުން ވެރިކަން ކުރެއްވި މީހެއްގެ ގޮތުގައި ގިނަ ބަޔަކު ސިފަ ކުރެއެވެ.
ނޮވެންބަރު 19ވަނަ ދުވަހު މެލޭޝިޔާގައި ބޭއްވި ޢާންމު އިންތިޚާބުގައި ކާމިޔާބީ ހޯދީ ކޮން ޕާޓީއަކުން ކަން ކަނޑައަޅަން އަދިވެސް ދައްޗެވެ. އިދިކޮޅު ލީޑަރު އަންވަރު އިބްރާހީމްގެ "އެލަޔަންސް އޮފް ހޯޕް" ޕާޓީގެ އިތުރުން ކުރީގެ ބޮޑުވަޒީރު މުޙްޔިއްދީން ޔާސީންގެ "ނޭޝަނަލް އެލަޔަންސް" ޕާޓީން ވެސް ވަނީ އިންތިޚާބުގައި ކާމިޔާބީ ލިބިފައިވާ ކަން އިޢުލާނު ކޮށްފައެވެ.
އަންވަރު ވިދާޅުވީ އިންތިޚާބުގައި ލިބުނު ކާމިޔާބީއާ އެކު ގުޅިފައިވާ ސަރުކާރެއް އެކުލަވައިލުމުގެ މަސައްކަތް ފަށާފައިވާ ކަމުގައެވެ. އަދި، ބޮޑުވަޒީރު ކަމުގެ މަޤާމާ ދެން ހަވާލުވެ ވަޑައިގަންނަވާނީ އޭނާ ކަމުގައި ވެސް އޭނާ ވިދާޅުވިއެވެ. ނަމަވެސް، ޔާސީން ވެސް ވަނީ ސަރުކާރެއް އެކުލަވައިލުމުގެ މަސައްކަތް ކުރަމުންދާ ކަން ހާމަ ކުރައްވާފައެވެ.
އިންތިޚާބުގެ ވަގުތީ ނަތީޖާއަށް ބަލާއިރު މެލޭޝިޔާގެ ޤާނޫނު ހަދާ މަޖިލީހުގެ 219 ގޮނޑީގެ ތެރެއިން އަންވަރުގެ ޕާޓީން ވަނީ 82 ގޮނޑި ކާމިޔާބު ކޮށްފައެވެ. މުޙްޔިއްދީންގެ ޕާޓީއަށް ލިބިފައި ވަނީ 73 ގޮނޑިއެވެ. އަދި، ޖަލުގައި އޮންނެވި ކުރީގެ ބޮޑުވަޒީރު ނަޖީބް ރައްޒާގުގެ ޔުނައިޓެޑް މެލޭސް ނޭޝަނަލް އޮގަނައިޒޭޝަން (ޔޫ.އެމް.އެން.އޯ)އަށް ލިބިފައި ވަނީ 30 ގޮނޑިއެވެ.