އިނގިރޭސިވިލާތުގެ ބޮޑުވަޒީރު ރިޝީ ސުނަކް ޔޫކްރެއިނުގެ ވެރިރަށް ކީވްއަށް ޒިޔާރަތް ކުރައްވައި، އެ ޤައުމުގެ ރައީސް ވޮލޮޑޮމީރް ޒެލެންސްކީއާ ބައްދަލު ކުރައްވައިފިއެވެ. މިއީ، އިނގިރޭސިވިލާތުގެ ވެރިކަމާ ހަވާލުވެ ވަޑައިގެންނެވި ފަހުން ސުނަކް ޔޫކްރެއިނަށް ކުރައްވާ ފުރަތަމަ ދަތުރުފުޅެވެ.
ޒެލެންސްކީއާ އެކު ބޭއްވެވި ބައްދަލުވުމުގައި ސުނަކް ވަނީ ޔޫކްރެއިނާ އެކު އިނގިރޭސި ވިލާތުން ދެމި އޮންނާނެ ކަމުގެ ޔަގީން ކަން ދެއްވާފައެވެ. އަދި، އަސްކަރީ ގޮތުން ޔޫކްރެއިނަށް އިތުރު އެހީތެރިކަން ފޯރުކޮށްދޭނެ ކަން ވެސް އޭނާ އިޢުލާނު ކުރެއްވިއެވެ.
"ހަނގުރާމައިގައި ޔޫކްރެއިނަށް ކާމިޔާބީ ލިބެންދެން، އަދި ޔޫކްރެއިނުގެ ރައްޔިތުންނަށް ހައްޤު ސަލާމަތާއި ރައްކާތެރިކަން ކަށަވަރު ކުރެވެންދެން އިނގިރޭސިވިލާތުން ޔޫކްރެއިނާ އެކު ދެމި އޮންނާނެ ކަމުގެ ޔަގީން ކަން އަރުވަން،" ޒެލެންސްކީއާ އެކު ބޭއްވެވި ބައްދަލުވުމާ ގުޅޭ ގޮތުން ނޫސްވެރިންނަށް މަޢުލޫމާތު ދެއްވަމުން ސުނަކް ވިދާޅުވިއެވެ.
އިނގިރޭސިވިލާތުން ޔޫކްރެއިނަށް އަސްކަރީ އެހީގެ ގޮތުގައި 60 މިލިޔަން ޑޮލަރުގެ ޕެކޭޖެއް ދޭނެ ކަން، ސުނަކްގެ ދަތުރުފުޅާ ގުޅުވައި، އޭނާގެ އޮފީހުން ވަނީ ހާމަކޮށްފައެވެ. މި ޕެކޭޖުގައި ހިމެނެނީ ވައިގެ ދިފާޢީ ނިޒާމާ ގުޅުން ހުރި ހަތިޔާރެވެ. މީގެ ތެރޭގައި އަސްކަރީ މަތިންދާބޯޓުތަކަށް ހަމަލާދޭން ބޭނުން ކުރާ 120 ބަޑިއާއި، ރާޑަރާއި، ޑްރޯނަށް ހަމަލާ ދިނުމަށް ބޭނުން ކުރާ ހަތިޔާރު ހިމެނެއެވެ.
"ރަޝިޔާގެ ކުރިމަތީގައި ޔޫކްރެއިނުގެ ރައްޔިތުން ދައްކަމުންދާ ހިތްވަރާއި ސާބިތުކަމާ މެދު އަޅުގަނޑު ފަޚުރުވެރިވޭ. ޔޫކްރެއިން ރައްޔިތުންގެ ހިތްވަރާއި ނުގުޑާ ޢަޒުމުގެ ވާހަކައަކީ އެތަކެއް ޖީލަކަށް އަޅުގަނޑުމެން ކިޔައިދޭނެ ވާހަކަތަކެއް،" ސުނަކް ވިދާޅުވިއެވެ.
މި ދަތުރުފުޅާ ގުޅިގެން ޒެލެންސްކީ ވަނީ ސުނަކްއަށް ޝުކުރު އަދާ ކުރައްވާފައެވެ. އަދި، މިއީ ދެ ޤައުމަށް ވެސް ފައިދާ ކުރާނެ ދަތުރުފުޅެއް ކަމުގައި އޭނާ ވިދާޅުވިއެވެ. ހަނގުރާމައާއި ދިފާޢީ ކަންކަމުގެ އިތުރުން، ހަކަތައިގެ ރައްކާތެރި ކަން ކަށަވަރު ކުރުމަށް ޔޫކްރެއިނާއި ވިލާތުގެ ޤައުމުތަކުން ގުޅިގެން މަސައްކަތް ކުރުމާ ގުޅޭ ގޮތުން ވެސް ދެ ބޭފުޅުން ވަނީ މަޝްވަރާ ކުރައްވާފައެވެ.
ރަޝިޔާއިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުވަރީ މަހުގެ 24ވަނަ ދުވަހުއެވެ. ހަނގުރާމައިގެ ކުރީކޮޅު ރަޝިޔާ ސިފައިން ބޮޑެތި ކާމިޔާބީތަކެއް ހޯދި ނަމަވެސް، ހަނގުރާމައަށް ނުވަ މަސް ފުރެން ގާތްވެފައި ވާއިރު، ރަޝިޔާ ސިފައިންނަށް މިހާރު ދަނީ ބޮޑެތި ނާކާމިޔާބީތަކާ ކުރިމަތިވަމުންނެވެ.
ރަޝިޔާއިން ހަނގުރާމައިގައި އަތްގަދަ ކޮށްފައިވާ ހަތަރު ސަރަޙައްދެއް މިނިވަން ކުރުމަށް ޔޫކްރެއިނުން ވަނީ ސެޕްޓެންބަރު މަހުގެ 1 ވަނަ ދުވަހު އަސްކަރީ ކެމްޕޭނެއް ފަށާފައެވެ. އަދި، ރަޝިޔާއިން އަތްގަދަ ކޮށްފައިވާ އެއް ސަރަޙައްދު ކަމުގައިވާ އެ ޤައުމުގެ ދެކުނުގައިވާ ޚާރްސަން މި މަހުގެ ތެރޭގައި ވަނީ މިނިވަން ކޮށްފައެވެ. އަދި، އެ ސަރަޙައްދުގައި ތިބި ރަޝިޔާ ސިފައިން ފައްސައިލާފައެވެ.
މި ނާކާމިޔާބީއާ ގުޅިގެން ރަޝިޔާއިން ވަނީ ޔޫކްރެއިނުގެ ވެރިރަށް ކީވްއާއި ބޮޑެތި އެހެން ރަށްތަކަށް މިސައިލް ހަމަލާތައް އަމާޒު ކުރަން ފަށާފައެވެ. މި ހަމަލާތަކާ ގުޅިގެން ޔޫކްރެއިނުގެ ގިނަ ސަރަޙައްދުތަކުން ކަރަންޓުގެ ޚިދުމަތް ވަނީ މެދުކެނޑިފައެވެ. ޒެލެންސްކީ ވިދާޅުވީ، ޔޫކްރެއިނުގެ 10 މިލިޔަނަށް ވުރެ ގިނަ މީހުން މި ވަގުތު ދިރިއުޅެމުން ދަނީ ކަރަންޓުގެ ޚިދުމަތާއި ނުލައި ކަމުގައެވެ.