ޕެރޫގެ ވެރިރަށް ލީމާގެ ވައިގެ ބަނދަރުން ފުރަން އުޅުނު މަތިންދާބޯޓެއް އަލިފާން ނިއްވާ ލޮރީއެއްގައި ޖެހި ހިނގި ހާދިސާއެއްގައި ދެ މީހުން މަރުވެއްޖެއެވެ. މި ހާދިސާ ހިނގާފައި ވަނީ ރަންވޭއިން މަތިންދާބޯޓު އުދުއްސައިލަން އުޅުމުގެ ތެރޭގައެވެ. ބޯޓާއި އަލިފާން ނިއްވާ ލޮރީ ވެސް އެ ވަގުތު ދުއްވާފައި ގޮސްފައި ވަނީ އެންމެ ބާރު ދުވެލީގައެވެ.
އަލިފާން ނިއްވާ ލޮރީގައި މަތިންދާބޯޓުގެ ބައެއް ޖެހި، ބޯޓު ވަނީ ރަންވޭ މައްޗަށް ވެއްޓިފައެވެ. މި ހާދިސާގައި މަރުވީ އަލިފާން ނިއްވާ ލޮރީގައި ތިބި ދެ މީހުންނެވެ. މި ހާދިސާގައި އަލިފާން ނިއްވާ ލޮރީގައި ޖެހިފައި ވަނީ އެއަރބަސް އޭ320 މަރުކާގެ މަތިންދާބޯޓެކެވެ.
މި ހާދިސާ ހިނގި ވަގުތު، އެލް.އޭ.ޓީ.އޭ.އެމް. އެއަރލައިނުން އޮޕަރޭޓް ކުރާ މި މަތިންދާބޯޓުގައި 102 ފަސިންޖަރުން ތިއްބެވެ. އެއްވެސް ފަސިންޖަރެއްގެ އަދި ފަޅުވެރިއެއްގެ ފުރާނައަށް މި ހާދިސާގައި ނުރައްކާވެފައި ނުވާ ކަމުގައި އެ ކުންފުނިން ބުނެއެވެ.
މި ހާދިސާ ހިނގި ހޯހޭ ޗާވޭޒް އެއަރޕޯޓް ހިންގާ ލީމާ އެއަރޕޯޓް ޕާޓްނަރސް (އެލް.އޭ.ޕީ) ކުންފުނިން ވަނީ، މި ހާދިސާގައި އެލް.އޭ.ޕީ. އެރޮނޯޓިކްސް ފަޔަރ ބްރިގޭޑްގެ އަލިފާން ނިއްވާ ދެ މީހުން މަރުވުމާ ގުޅިގެން ހިތާމަ ކުރާ ކަމަށް ބުނެފައެވެ. އަދި، މަތިންދާބޯޓުގައި ދަތުރު ކުރި މީހުންގެ ހާލު ރަނގަޅު ކަމަށާއި، އަނިޔާވި މީހުންނަށް ފަރުވާ ދެމުންދާ ކަމުގައި އެ ކުންފުނިން ބުނެއެވެ.
ޕެރޫގެ ޕްރޮސިކިއުޓަރގެ އޮފީހުން ވަނީ މި ހާދިސާގެ ފުރިހަމަ ތަހުޤީޤެއް ހިންގާނެ ކަމުގައި ބުނެފައެވެ. އަދި، މިއީ ގަސްދުގައި ހިންގާފައިވާ އަމަލެއްތޯ ބެލުމަށް މަސައްކަތް ކުރާނެ ކަމުގައި ވެސް އެ އިދާރާއިން ބުނެއެވެ. މި ހާދިސާއާ ގުޅިގެން ހޯހޭ ޗާވޭޒް އެއަރޕޯޓްގެ އުދުހުންތައް ވަގުތީ ގޮތުން ވަނީ މެދުކަނޑައިލާފައެވެ.