އުތުރު ކޮރެޔާއިން ޓެސްޓު ކުރި އިންޓަރކޮންޓިނެންޓަލް ބެލިސްޓިކް މިސައިލެއް ޖަޕާނުގެ ކަނޑުގެ ސަރަޙައްދަށް ވެއްޓިއްޖެއެވެ. މިއީ ދެ ދުވަހުގެ ތެރޭގައި އުތުރު ކޮރެޔާއިން ހަދާފައިވާ ދެ ވަނަ މިސައިލް ޓެސްޓެވެ. ޖަޕާނު ކައިރިއަށް ވެއްޓިފައި ވަނީ ދުރު ރާސްތާގެ ބެލިސްޓިކް މިސައިލެކެވެ.
ދެކުނު ކޮރެޔާއިން ބުނީ މިސައިލް އުދުއްސައިލާފައި ވަނީ އުތުރު ކޮރެޔާގެ ވެރިރަށް ޕްޔޮންގްޔެންގްގެ ސުނާން ސަރަޙައްދުން ކަމުގައެވެ. އަދި، މިސައިލް ޓެސްޓާ ގުޅިގެން ދެކުނު ކޮރެޔާގެ ޤައުމީ ސަލާމަތާ ބެހޭ ކައުންސިލުގެ ކުއްލި ބައްދަލުވުމެއް ބާއްވާފައިވާ ކަމުގައި އެ ޤައުމުން ބުނެއެވެ.
ޖަޕާނުގެ ބޮޑުވަޒީރު ފުމިޔޯ ކިޝިޑާ ވިދާޅުވީ އުތުރު ކޮރެޔާގެ މިސައިލް ވެއްޓިފައި ވަނީ ޖަޕާނުގެ ޚާއްޞަ އިޤުތިޞާދީ ސަރަޙައްދަށް ކަމުގައެވެ. އޭނާ ވަނީ މި ކަމާ މެދު ކަންބޮޑުވުން ފާޅު ކުރައްވާފައެވެ. ހޮކައިޑޫ ކައިރިން ކަނޑަށް މިސައިލް ވެއްޓުނު ހާދިސާގައި އެއްވެސް އުޅަނދަކަށް ގެއްލުންވެފައިވާ ކަމުގެ ރިޕޯޓެއް ލިބިފައި ނުވާ ކަމުގައި ވެސް އޭނާ ވިދާޅުވިއެވެ.
އުތުރު ކޮރެޔާއިން މީގެ އެއް ދުވަސް ކުރިން ކުރު ރާސްތާގެ ބެލިސްޓިކް މިސައިލެއް ވެސް ޓެސްޓު ކޮށްފައިވެއެވެ. އަދި، އެމެރިކާއިން އެ ސަރަޙައްދުގެ ޤައުމުތަކާ އެކު އަސްކަރީ ގުޅުންތައް އިތުރަށް ބަދަހި ކުރަމުންދާ ނަމަ، އިތުރު މިސައިލް ޓެސްޓުތައް ހަދާނެ ކަމުގެ އިންޒާރު އުތުރު ކޮރެޔާގެ ޚާރިޖީ ވަޒީރު ޗޮއި ސުން ހުއި ދެއްވިއެވެ.
އުތުރު ކޮރެޔާގެ އަސްކަރީ ހަރަކާތްތަކާ ގުޅިގެން އެ ސަރަޙައްދުގެ ޤައުމުތަކަށް ކަމުގައިވާ ދެކުނު ކޮރެޔާއާއި ޖަޕާނުގެ މިނިވަންކަމާއި ސިޔާދަތަށް ނުރައްކާވާ ކަމަށް ބުނެ އެމެރިކާއިން ދަނީ އެ ޤައުމުތަކާ ގުޅިގެން އަސްކަރީ ތަމްރީނުތައް ހިންގަމުންނެވެ. މިއީ، އުތުރު ކޮރެޔާގެ މިނިވަންކަމަށް އޮތް ނުރައްކަލެއްގެ ގޮތުގައި އެ ޤައުމުން ދެކެއެވެ.
އެމެރިކާގެ ރައީސް ޖޯ ބައިޑަން ހުސްވި ހަފުތާގައި ޗައިނާގެ ރައީސް ޝީ ޖިންޕިންގްއާ އެކު ބޭއްވެވި ބައްދަލުވުމުގައި ވަނީ އުތުރު ކޮރެޔާގެ މައްސަލައާ މެދު ފުޅާ ދާއިރާއެއްގައި މަޝްވަރާ ކުރައްވާފައެވެ. އުތުރު ކޮރެޔާއިން ހަތްވަނަ ފަހަރަށް ނިއުކްލިޔަރ ޓެސްޓެއް ހެދުމަށް ތައްޔާރުވަމުންދާ ކަމުގައި އެމެރިކާއާއި ދެކުނު ކޮރެޔާއިން ތުހުމަތު ކުރެއެވެ.
ހުސްވި އޮކްޓޫބަރު މަހުގެ ތެރޭގައި ވެސް އުތުރު ކޮރެޔާއިން ވަނީ ގިނަ އަދަދެއްގެ މިސައިލް ޓެސްޓުތަކެއް ހަދާފައެވެ. އެއް މިސައިލް ވެއްޓިފައި ވަނީ ދެކުނު ކޮރެޔާގެ ކަނޑުގެ ސަރަޙައްދަށެވެ. އެއީ، 1953ވަނަ އަހަރު ކޮރެޔާ ހަނގުރާމަ ނިމުނު ފަހުން އުތުރު ކޮރެޔާއިން ދެކުނުގެ ސަރަޙައްދަކަށް މިސައިލް ހަމަލާއެއް ދިން ފުރަތަމަ ފަހަރެވެ.
ދުނިޔޭގެ މަސްރަޙުގައި މިހާރު އެންމެ ހޫނު ބަހުސެއް ހިނގަމުން ދަނީ ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގެ މައްސަލައިގައެވެ. އ.ދ.ގައި ވެސް އެންމެ އިސްކަމެއްގެ ގޮތުގައި ބަލައިގެން މަޝްވަރާ ކުރަމުންދަނީ އެ މައްސަލައާ މެދެވެ. މިއީ، އިތުރު މިސައިލް ޓެސްޓުތައް ހެދުމަށް އުތުރު ކޮރެޔާއަށް ލިބިފައިވާ ފުރުޞަތެއްގެ ގޮތުގައި އެ ޤައުމުން ދެކޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
އުތުރު ކޮރެޔާގެ އަސްކަރީ ހަރަކާތްތައް އިތުރު ކުރުމާ ގުޅިގެން އ.ދ.އިން ދާދި ފަހުން ވަނީ އެ ޤައުމާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އިތުރަށް ހަރުދަނާ ކުރަން މަސައްކަތް ކޮށްފައެވެ. ނަމަވެސް، އ.ދ.ގެ ސަލާމަތީ މަޖިލީހުގެ ދެ ބާރު ކަމުގައިވާ ރަޝިޔާއާއި ޗައިނާއިން ވަނީ ވީޓޯ ބާރުގެ ބޭނުންކޮށް، އެ މަސައްކަތް ހުއްޓުވާފައެވެ.