މި ފަހަރުގެ ފީފާ ވޯލްޑް ކަޕުވެސް ދިވެހިންނަށް ހިލޭ ބެލޭނެ ކަމަށް ޕަބްލިކް ސަރވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރ އަލީ ޚާލިދު ވިދާޅުވެއްޖެއެވެ.
ރާއްޖޭގެ މީޑިއާ ތަކުން ވޯލްޑްކަޕް ދައްކާނެކަން އިއުލާން ކުރުމަށް ޓީވީ މޯލްޑިވްސްގައި ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުން އަލީ ޚާލިދު ވިދާޅުވީ، ދިވެހިރާއްޖޭގެ ހުރިހާ ރައްޔިތުންނަށް މިފަހަރުވެސް ބެލޭނެ ކަމަށާއި، އެގޮތުން މީޑިއާނެޓު މެދުވެރިކޮށް ޕީއެސްއެމްގެ، ޔެސް ޓީވީ، އާއި ރާއްޖެ ޓީވީ އަދި އައިސް ޓީވީން ވޯލްޑްކަޕް ބެލޭނެ ކަމަށެވެ. މީގެ އިތުރުން ދިރާގު ޓީވީ މެދުވެރިކޮށް ޔެސް ޓީވީންނާއި، ރާއްޖެ ޓީވީން ވޯލްޑްކަޕް ބެލޭނެ ކަމަށެވެ.
އަލީ ޚާލިދު ވިދާޅުވީ، ވޯލްޑްކަޕް މި ފަހަރު ދެއްކުމުގެ މަސައްކަތް ކުރެވުނީ އުނދަގޫ ހާލަތެއްގައި ކަމަށެވެ. އެހެންނަމަވެސް ދިވެހިން މި ފޯރިން މަހުރޫމުވިޔަ ނުދިނުން އެއީ އަމާޒު ކަމަށެވެ.
މީގެ އިތުރުން މި ރަސްމިއްޔާތުގައި ވާހަކަ ދައްކަވަމުން ކުރީގެ މަޝްހޫރު ފުޓުބޯޅަ ކުޅުންތެރިޔާ މުޙައްމަދު ކަލީމް ވިދާޅުވީ، ވޯލްޑް ކަޕާއެކު ބައެއް އާދަތަކަށް ސަ،މާލުކަން ދޭން ޖެހޭ ކަމަށެވެ. އެގޮތުން ކެޔުމާއި ނިދުމަށް ސަމާލުކަން ދޭންޖެހޭ ކަމަށް ކަލީމް ވިދާޅުވިއެވެ.
ޔެސްޓީވީ އައިސް ޓީވީ، އަދި ރާއްޖެ ޓީވީން ވޯލްޑް ކަޕުގެ މެޗުތައް ދައްކާނެކަން އިއުލާން ކުރެއްވީ ތިން ކުންފުނީގެ އިސްވެރިންނެވެ. އެގޮތުން ޕީއެސްއެމްގެ ފަރާތުން މެނޭޖިންގ ޑިރެކްޓާ އަލީ ޚާލިދު، ރާއްޖެ ޓީވީގެ ފަރާތުން ޗީފް އޮޕަރޭޓިންގ އޮފިސަރ ނާޒްމީ ސައީދު އަދި އައިސް ޓީވީގެ ފަރާތުން މީޑިއާނެޓުގެ ޗީފް މާކެޓިންގ އޮފިސަރ ރިއާޔަތު އަބްދުލް މަޖީދެވެ.
މި ރަސްމިއްޔާތުގައި ވަނީ ވޯލްޑްކަޕް ދެއްކުމަށް އެހީތެރިވެދެއްވި ކުންފުނިތަކަށް އެކަމުގެ އަގު ވަޒަންކޮށް ހާއްސަ އެވޯޑެއް ދީފައެވެ. އެގޮތުން ޓައިޓަލް ސްޕޮންސަރ އުރީދޫ މޯލްޑިވްސް އަށާއި، ބޭންކިންގ ޕާޓްނަރ، ބޭންކް އޮފް މޯލްޑިވްސް، ކަވަރޭޖް އެސޯސިއޭޓް ސްޕޮންސަރ، އިސްލާމިކް ބޭންކާއި، ނިއު އެޑިޝަން، އެލް މޯބައިލް އަދި ވިލާ ކޮޖަށް ވަނީ ހާއްސަ އެވޯޑެއް ދީފައެވެ.