އަލް ޖަޒީރާގެ ނޫސްވެރިއެއް ކަމުގައިވާ ޝީރީން އަބޫ އަކްލަޙް މަރައިލި ހާދިސާގެ ތަހުޤީޤު ފަށާފައިވާ އެމެރިކާގެ ތަހުޤީޤީ އިދާރާ ފެޑެރަލް ބިޔުރޯ އޮފް އިންވެސްޓިގޭޝަން (އެފް.ބީ.އައި)ގެ އޮފިޝަލުންނަށް ޔަހޫދީ އިސްރާޢީލުގެ ސިފައިންނާ ސުވާލު ކުރުމުގެ ފުރުޞަތު ނުދޭނެ ކަމަށް އިސްރާޢީލުގެ ބޮޑުވަޒީރު ޔައިރު ލަޕިދު ވިދާޅުވެއްޖެއެވެ. ޝީރީން މަރައިލާފައި ވަނީ ޔަހޫދީ އިސްރާޢީލުން ވެރިވެގަނެފައިވާ ހުޅަނގު އައްސޭރީގެ ޖެނިންނަށް އަރައި ހިންގަމުން ދިޔަ އުދުވާންތަކެއް ރިޕޯޓު ކުރަމުން ދަނިކޮށް، މޭ މަހުގެ 11 ވަނަ ދުވަހުއެވެ.
ޝީރީން މަރައިލާފައި ވަނީ ޔަހޫދީ ސިފައިން ބަޑިޖަހައި ދިން ހަމަލާތަކެއްގައި ކަމަށް ފަލަސްތީނުން އެންމެ ފުރަތަމަ ދުވަހުން ފެށިގެން ވެސް ދިޔައީ ބުނަމުންނެވެ. ނަމަވެސް، ޔަހޫދީ އިސްރާޢީލުން ދިޔައީ މި ކަމާ ދެކޮޅު ހަދަމުންނެވެ. އަދި، ވަނީ ޝީރީން މަރުވީ ޔަހޫދީންގެ ބަޑީގެ ހަމަލާއެއްގައި ކަމަށް ބުނާ ރިޕޯޓުތައް ދޮގު ކުރަމުންނެވެ.
ޝީރީން މަރުވީ ކޮން ބަޔަކު ދިން ބަޑީގެ ހަމަލާއެއްގައި ކަން ކަށަވަރު ކުރުމަށް ފަލަސްތީނުގެ އިތުރުން އެމެރިކާއިން ވަނީ ތަހުޤީޤު ކޮށްފައެވެ. ޝީރީންގެ ހަށިގަނޑަށް އަރާފައިވާ ވަޒަން ތަހުޤީޤު ކުރުމަށް ފަހު އެމެރިކާއިން ވެސް ވަނީ، އޭނާ މަރުވީ ޔަހޫދީ އިސްރާޢީލުގެ ސިފައިން ދިން ހަމަލާއެއްގައި ކަމަށް ބެލެވޭ ކަމުގައި ބުނެފައެވެ.
ޝީރީން މަރައިލި ހާދިސާގެ ފުރިހަމަ ތަހުޤީޤެއް އެފް.ބީ.އައި.އިން ފަށާފައިވާ ކަމަށް ދާދި ފަހުން ވަނީ ރިޕޯޓު ކޮށްފައެވެ. އެ ރިޕޯޓުތަކާ ގުޅުވައި ޔަހޫދީންގެ ދަޢުލަތުގެ ބޮޑުވަޒީރު ލަޕިދު ވިދާޅުވީ އެފް.ބީ.އައި.އިން ހިންގާ ތަހުޤީޤަށް އެ ޤައުމުން އެއްބާރުލުން ނުދޭނެ ކަމުގައެވެ.
"އެފް.ބީ.އައި. އެކަންޏެއް ނޫން، އެހެން ޤައުމަކުން ވެސް އިސްރާޢީލުގެ ސިފައިންނާ ސުވާލު ކުރުމަށް އެއްވެސް ފުރުޞަތެއް ނުދޭނަން. އެއީ ކިތަންމެ ގާތް އެކުވެރިއެއް ކަމަށް ވިޔަސް ހެޔޮ،" މިކަމާ ގުޅޭ ގޮތުން ވާހަކަ ދައްކަވަމުން ލަޕިދު ވިދާޅުވިއެވެ. އޭނާ މިކަމާ ގުޅޭ ގޮތުން ވާހަކަފުޅު ދައްކަވާފައި ވަނީ އިސްރާޢީލުގެ ޤާނޫނު ހަދާ މަޖިލީހަށް އަލަށް އިންތިޚާބުވި މެންބަރުން ހުވާ ކުރުމަށް ބޭއްވި ރަސްމިއްޔާތުގައެވެ.
ޝީރީން މަރުވީ ޔަހޫދީ ސިފައިން ދިން ބަޑީގެ ހަމަލާތަކެއް ކަމުގައި އ.ދ.ގެ އިންސާނީ ޙައްޤުތަކާ ބެހޭ އިދާރާއިން ވެސް ވަނީ ބުނެފައެވެ. ޝީރީން މަރައިލުމުގެ އިތުރުން ޔަހޫދީ ސިފައިން ވަނީ އޭނާގެ ޖަނާޒާ ކުރިއަށްދިޔަ ވަގުތު، ޖަނާޒާގައި ބައިވެރިވި މީހުންނަށް ވެސް ހަމަލާދީ އުދުވާން ހިންގާފައެވެ.
ޝީރީންގެ މަރާ ގުޅިގެން އެމެރިކާގެ ނޫހެއް ކަމުގައިވާ ނިއުޔޯކް ޓައިމްސްއިން ވެސް ވަނީ މިނިވަން ތަޙުޤީޤެއް ހިންގާފައެވެ. އެ ނޫހުން ވެސް ބުނީ، ޝީރީން މަރުވީ ޔަހޫދީ ސިފައިން ދިން ހަމަލާތަކެއްގައި ކަމުގައެވެ. އަދި، ޝީރީން މަރުވި ހާދިސާ ހިނގާފައިވާ ސަރަޙައްދުގައި ފަލަސްތީނުގެ ހަތިޔާރު އެޅި އެއްވެސް ޖަމާޢަތަކުން ހަރަކާތްތެރިވެފައި ނުވާ ކަމަށް ވެސް އެ ނޫހުން ބުނެފައިވެއެވެ.
ނަމަވެސް، ޝީރީން މަރައިލާފައި ވަނީ ޔަހޫދީ އިސްރާޢީލުގެ ސިފައިންގެ މީހަކު ބަޑިޖަހައި ދިން ހަމަލާއެއްގައި ކަން އެ ޤައުމުން އަމިއްލައަށް ކުރި ތަހުޤީޤަށް ވެސް ވަނީ ހާމަވެފައެވެ. ނަމަވެސް، ޔަހޫދީންގެ އަސްކަރިއްޔާއިން އަދިވެސް މަސައްކަތް ކުރަމުންދަނީ މި ކަމުން ބަރީއަވުމަށެވެ. ބުނީ، ޝީރީންގެ ހަށިގަނޑަށް ވަޒަން އަރާފައި ވަނީ "އޮޅުމަކުން" ކަމުގައެވެ.
ޝީރީން މަރައިލާފައި ވަނީ، މޭ 11 ވަނަ ދުވަހު ޔަހޫދީ ސިފައިން ޖެނީންގައި ހިންގަމުންދިޔަ އިންސާނިއްޔަތާ ޚީލާފު ޖަރީމާތަކެއް ރިޕޯޓު ކުރަމުން ދަނިކޮށެވެ. މަންޒަރު ދުށް މީހުން ބުނީ، ޔަހޫދީ ސިފައިން ޝީރީނަށް ހަމަލާދީފައި ވަނީ އެއްވެސް އިންޒާރެއް ދިނުމަކާ ނުލައި ކަމުގައެވެ. ފަލަސްތީނުގައި ޔަހޫދީންގެ އިސްތިއުމާރީ ބާރުން ހިންގަމުންދާ އިންސާނިއްޔަތާ ޚިލާފު ޖަރީމާތައް ކަވަރު ކުރުމުގެ މަސައްކަތް ޝީރީން ފަށާފައި ވަނީ މީގެ 25 އަހަރު ކުރިންނެވެ.