ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ބައިނަލްއަގްވާމީ ފެންވަރުގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑް ޖެހިޖެހިގެން 3 ވަނަ ފަހަރު ދިވެހިރާއްޖެއިން ހޯދައިފިއެވެ.
ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑު ރާއްޖެއަށް ލިބުނުކަން އިއުލާންކުރެއްވީ އޮމާންގެ މަސްކަޓްގައި ބޭއްވި ވޯލްޑް ޓްރެވަލް އެވޯޑްސްގެ ގާލާ ނައިޓްގައެވެ.
ރާއްޖެއިން މި އެވޯޑް ޖެހިޖެހިގެން 3 ވަނަ ފަހަރު ހޯދާފައިވާއިރު، މި އެވޯޑް ރާއްޖެއަށް ލިބިފައިވަނީ ވަރަށް ވާދަވެރި މަންޒިލްތަކާއި ވާދަކުރުމަށްފަހުކަމަށެވެ.
ޑަބްލިޔުޓީއޭގެ ވޯލްޑްސް ލީޑިން ޑެސްޓިނޭޝަންގެ އެވޯޑަކީ، މި އެ އެވޯޑް ރަސްމިއްޔާތުގެ އެންމެ ޝަރަފުވެރި އެވޯޑެވެ.
"ވޯލްޑްސް ލީޑިންގް ޑެސްޓިނޭޝަން"ގެ އެވޯޑް ރާއްޖެއިން މިފަހަރު ކާމިޔާބުކުރިއިރު، މިއަހަރަކީ ރާއްޖޭގެ ފަތުރުވެރިކަމަށް 50 އަހަރުވެސް ފުރޭ މުނާސަބާ ފާހަގަކުރަމުންދާ އަހަރެވެ.
އެމްއެމްޕީއާރުސީއިން ބުނީ ފަތުރުވެރިކަމުގެ ރަން އަހަރު ފާހަގަކުރާއިރު ތިންވަނަ ފަހަރަށް މި އެވޯޑް ލިބުމަކީ ފަތުރުވެރިކަމުގެ މަޝްހޫރު މަންޒިލެއްގެ ގޮތުގައި ދިވެހިރާއްޖޭގެ ނަން އިތުރަށް ވަރުގަދަވެގެންދާނެ ކަމެއްކަމަށެވެ. އަދި މި އެވޯޑާއިއެކު، ދަތުރުފަތުރުގެ ވިޔަފާރީގައި ދުނިޔޭގެ ލީޑަރެއްގެ ގޮތުގައި ރާއްޖޭގެ ނަން އިތުރަށް އުޖާލާކުރުމުގެ ފުރުސަތު ތަނަވަސް ވެގެންދާނެކަމަށްވެސް އެމްއެމްޕީއާރުސީން ބުނެއެވެ.
މި އަހަރުގެ ޑަބްލިއުޓީއޭގެ އެންމެ ޝަރަފުވެރި އެވޯޑުގެ އިތުރުންވެސް ގިނަ އެވޯޑްތަކެއް ރާއްޖެއަށް ވަނީ ލިބިފައެވެ.
ކޯވިޑްގެ ބަލިމަޑުކަމާއިއެކުވެސް، ވޭތުވެދިޔަ 3 އަހަރު ރާއްޖެއިން މި ޝަރަފު ހޯދާފައި މިވަނީ ރާއްޖޭގެ ފަތުރުވެރިކަމުގެ ސިނާޢަތުގައި މަސްއަކަތްކުރާ ހުރިހާ ފަރާތްތަކުގެ މަސައްކަތުގެ ފުރިހަމަކަމުންކަމަށް އެމްއެމްޕީއާރުސީން ފާހަގަކުރެއެވެ..