ހުޅުމާލޭ ބްރިޖަށް އަރާ ސަރަޙައްދުގައި ވަސް ނުބައިވެގެން އުޅެނީ އެސަރަހައްދުގައި ހުރި ސިނާޢީ މަސައްކަތްކުރާ ފެކްޓްރީއަކުން ކަމަށް ހައުސިން ޑިވެލޮޕްމަންޓް ކޯޕަރޭޝަން އެޗްޑީސީން ވިދާޅުވެއްޖެއެވެ.
ބްރިޖަށް އަރާ ސަރަޙައްދުން ކުނިވާ ޒާތުގެ ވަހެއް ދުވާތީ އެކަމުގެ ޝަކުވާ އެޗްޑީސީއަށްވެސް ލިބެމުންދާ ކަމަށް އެކޯޕަރޭޝަނުން ވިދާޅުވެއެވެ. ވަސް ދުވާ ކަމަށް ރިޕޯޓް ކުރަނީ ހުޅުމާލޭގެ ސައިމާ ހިނގުމާ ނިރޮޅުމަގު ގުޅޭ ސަރަޙައްދުންނެވެ. އެއީ ހުޅުމާލޭގެ ސިނާޢީ ސަރަޙައްދެވެ.
އެޗްޑީސީން ޕީއެސްއެމް ނިއުސްއަށް މަޢުލޫމާތު ދެމުން ބުނީ ނުބައި ވަސް ދުވަނީ ހުޅުމާލޭ އިންޑަސްޓްރިއަލް ސަރަޙައްދުގައި ހުރި ގަސް ކާނާ އުފައްދާ ފެކްޓްރީއަކުންކަމަށެވެ. އެއީ މަސް ޕްރޮސެސްކޮށް ބާކީވާ ބައިން ގަސް ކާނާ ހެދުމުގެ މަސައްކަތް ކުރާ ތަނެކެވެ. ވަސް ދުވަނީ، ގަސް ކާނާ ހެދުމަށް ނަގާފައި ހުރި މަހުގެ އުކާލާ ބައިތައް، ގިނަ ދުވަސްވަންދެން ހާމަޔަށް ބަހައްޓާފައި ހުރުމުން ކަމަށާއި އަދި ފެކްޓްރީން ވަސް ބޭރުކުރާ ހޮޅި މައްޗަށް ނަގާފައި ހުރިގޮތުންވެސް، މަގަށް ނުބައި ވަސް ދާކަމަށް އެޗްޑީސީން ހާމަކުރެއެވެ.
އެޗްޑީސީއަށް ލިބުނު ޝަކުވާތަކާ ގުޅިގެން އެޗްޑީސީގެ މުވައްޒަފުން އެ ފެކްޓްރީ ބަލާ، ކަނޑައަޅާފައިވާ އުސޫލުން ރައްކާތެރިކަމާއެކު މަސައްކަތްތައް ކުރިއަށްގެންދިއުމަށް އަންގާފައިވާ ކަމަށްވެސް އެޗްޑީސީން ބުނެއެވެ. އަދި ކުނިވާ ޒާތުގެ ތަކެއްޗާއި، ނުބައި ވަސް ދުވާގޮތަށް ހުންނަ ތަކެތި، ރައްކާތެރިކަމާއެކު ސްޓޯ ކުރުމާއި، އުކާލާ ބާވަތްތައްވެސް ރައްކާތެރިކަމާއެކު ނައްތާލުމަށްވަނީ އަންގާފައެވެ.
އަދި މިނޫންވެސް އާއްމުނަށް އުނދަގޫވާ ގޮތަށް ހުރި ކަންކަން ހައްލުކުރުމަށް މިހާރުވަނީ އަންގާފައެވެ.
ހުޅުމާލޭ ނިރޮޅުމަގުގެ ހައިވޭއާ ދިމާލުން ނުބައިވަސް ދުވާތީ، ފުލުހުންވެސް އެ ސަރަޙައްދު ބެލިކަމަށް މަޢުލޫމާތު ލިބެއެވެ.
އެ ސަރަޙައްދަކީ ދާދިފަހުން، މަރުވެފައި އޮއްވާ ފެނުނު އަޒްހާނުގެ ހަށިގަނޑު އޮތް ސަރަޙައްދެވެ.