ކޮރަޕްޝަނާއި ބެހޭގޮތުން ހޭލުންތެރިކަން އިތުރުކުރުމުގެ ގޮތުން އެންޓި-ކޮރަޕްޝަން ކޮމިޝަނުންތައްޔާރު ކުރައްވާފައިވާ "ބިތުފަންގި ޑްރާމާސިލްސިލާ 2" މިމަހުގެ 22 ވަނަދުވަހު އޮލިމްޕަހުގައި ޕްރިމިއަރ ކުރެއްވުމަށް ހަމަޖެހިފައިވާކަމަށް އޭސީސީން ހާމަކުރައްވައިފިއެވެ. ބިތުފަންގި ސިލްސިލާ 2 ރާއްޖޭގެ 6 ޓީވީ ޗެނަލަކުން ދެއްކުމަށް އޭސީސީއާ އެ 6 ޗެނަލާއެކު އެއްބަސްވުންތަކުގައި ސޮއިކުރެއްވުމަށް މިއަދު ބޭއްވެވި ރަސްމިއްޔާތުގައި ވާހަކަ ދައްކަވަމުން އޭސީސީގެ ރައީސް ޙަސަން ލުޠުފީ ވިދާޅުވީ 13 އެޕިސޯޑްގެ މިޑްރާމާ ސިލްސިލާ މީޑިޔާތަކުން ދައްކަންފެށުމުން އޭގެ ހެޔޮއަސަރު މުޖްމަތަޢުން ފެނިގެންދާނެކަމަށް އުންމީދުކުރައްވާކަމަށެވެ.ބިތުފަންގި ޑްރާމާ ސިލްސިލާ ދެއްކުމަށް މިއަދުގެ ރަސްމިއްޔާތުގައި ސޮއިކުރި 6 މީޑިޔާއަކީ ޕަބްލިކް ސަރވިސް މީޑިއާ، އައިސްޓީވީ، ދިޓީވީ، ވީޓީވީ، ސަންޓީވީ އަދި ޗެނަލް ތޭރައެވެ. މި ޑްރާމާ ސިލްސިލާގެ 13 އެޕިސޯޑްވެސް ތައްޔާރުކޮށްފައިވަނީ "ކޮރަޕްޝަންގެ ނޭދެވޭ އަސަރު" މި މަޢުޟޫޢުގެ ދަށުންނެވެ. އެޓާރނަލް ޕިކްޗަރސްއާ އޭސީސީއާ ގުޅިގެން އުފައްދާފައިވާ މި ޑްރާމާ ސިލްސިލާ މިޑިޔާތަކުން ދެއްކުމަށް އެއްބަސްވެފައިވަނީ އެއްވެސް އަގެއް ނުނަގާގޮތަށްކަމަށް އޭސީސީން މަޢުލޫމާތުދެއްވައެވެ.