ފަތުރުވެރިކަމުގެ ދާއިރާއިން ދަރިވަރުންނަށް މަޢުލޫމާތު ހިއްސާ ކުރުމަށް "ޖުބިލީ ވޯކް"ގެ ނަމުގައި ހިނގާލުމެއް ބޭއްވުމަށް ހަމަޖައްސައިފިއެވެ.
ޓޫރިޒަމް މިނިސްޓްރީއާއި މޯލްޑިވްސް ހޮސްޕިޓޭލިޓީ އެންޑް ޓޫރިޒަމް ސްޓަޑީޒް، އެފް.އެޗް.ޓީ.އެސްގެ ގުޅިގެން ބޭއްވުމަށް ހަމަޖެހިފައިވާ މި ހިނގާލުން ބާއްވަނީ މިމަހުގެ 19 ވަނަ ދުވަހުގެ ހަވީރު 4:00 އިން 6:00 އަށެވެ.
މޯލްޑިވްސް ހޮސްޕިޓޭލިޓީ އެންޑް ޓޫރިޒަމް ސްޓަޑީޒް، އެފް.އެޗް.ޓީ.އެސްގެ ޑީން ޒީނަތު ޞާލިޙް ވިދާޅުވީ "ޖުބިލީ ވޯކް" ގެ ނަމުގައި ބާއްވާ ހިނގާލުމަކީ ފަތުރުވެރިކަމަށް 50 އަހަރު ފުރުން ފާހަގަކުރުމުގެ ގޮތުން ކުރިއަށް ގެންދާ ހަރަކާތެއްކަމަށެވެ. އަދި މި ހިނގާލުމުގެ މަޤްސަދަކީ ދަރިވަރުން ފަތުރުވެރިކަމުގެ ދާއިރާއަށް އިތުރަށް ހޭލުންތެރިކޮށް އެދާއިރާގެ މާހިރުންގެ ތަޖުރިބާ ހިއްސާކޮށް ވީހާވެސް ގިނަ ދަރިވަރުން މި ދާއިރާއަށް ޝައުގުވެރިކުރުންކަމަށެވެ.
މި ހިނގާލުމުގައި 21 ސުކޫލެއްގެ ސާނަވީ އަދި މަތީ ސާނަވީ ތަޢުލީމު ހާސިލްކުރާ ދަރިވަރުން ބައިވެރިވާއިރު، ކޮލެޖުތަކާއި ރެސްޓޯރެންޓްތަކުގައި މަސައްކަތްކުރާ ފަރާތްތަކުންވެސް ބައިވެރިވާނެކަމަށް ޒީނަތު ވިދާޅުވިއެވެ. އަދި އާންމުންނަށްވެސް މި ހިނގާލުމުގައި ބައިވެރިވުމަށް ފުރުސަތު ހުޅުވާލެވިފައިވާކަމަށްވެސް ޒީނަތު މަޢުލޫމާތުދެއެވެ.
މާލެ އާޓިފިޝަލް ބީޗް ސަރަހައްދުން ފެށޭ މި ހިނގާލުން ނިންމާލަނީ ސޯޝަލް ސެންޓަރ ސަރަހައްދަށްކަމަށް އެފް.އެޗް.ޓީ.އެސް އިންނެވެ.