ބާރުގަދަ ތޫފާނެއް ކަމުގައިވާ ނަލްގޭ ފިލިޕީންސްގެ ސަރަޙައްދުތަކަށް އަރުމުގެ ސަބަބުން ކުރިމަތިވި އެކި ހާދިސާތަކުގައި މަރުވި މީހުންގެ އަދަދު 72އަށް އަރައިފިއެވެ. މި ތޫފާނާ އެކު ބޯކޮށް ވާރޭވެހި ފިލިޕީންސްގެ ބައެއް ސަރަޙައްދުތަކުގައި ވަނީ ފެންބޮޑުވެފައެވެ. އަދި، ބައެއް ހިސާބުތަކުގެ ބިންގަނޑު ކަނޑައިގެން ދިޔައެވެ.
މި ތޫފާނާ ގުޅިގެން ގިނަ އަދަދެއްގެ ބަޔަކު. މަރުވެފައި ވަނީ ފެންބޮޑުވުމާއި ބިންގަނޑު ކަނޑައިގެން ގޮސް ކިސަޑު ފޭބުމުގެ ހާދިސާތަކުގައި ކަމުގައި ފިލިޕީންސްގެ އޮފިޝަލުން ބުނެއެވެ. ތޫފާން ފުރަތަމަ އަރާފައި ވަނީ ފިލިޕީންސްގެ މައި ރަށް ކަމުގައިވާ ލުޒޯންއަށެވެ.
މު ތޫފާނާ އެކު ގަޑިއަކު 95 ކިލޯމީޓަރަށް ވައި ބާރުވެ، ބޯކޮށް ވާރޭ ވެހެމުންދާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. ތޫފާނުގެ އަސަރު އެންމެ ބޮޑަށް ކޮށްފައި ވަނީ އެ ޤައުމުގެ ދެކުނުގައިވާ މިންޑަނާއޯއަށެވެ.
ތޫފާނާ ގުޅިގެން ކުރިމަތިވި ފެންބޮޑުވުމުގެ ހާދިސާތަކުގައި އިތުރު 14 މީހަކު ގެއްލިފައިވާ ކަމަށާއި، 33 މީހަކަށް އަނިޔާވި ކަމުގައި ފިލިޕީންސްގެ ސިވިލް ޑިފެންސް ޑިރެކްޓަރ ރަފަޔަލީޓޯ އަލެހާންދްރޯ ވިދާޅުވިއެވެ. ގެއްލިފައިވާ ކަމަށް ބެލެވޭ މީހުން ހޯދުމަށާއި، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އެ ޤައުމުގެ އޮފިޝަލުން މިހާރު ދަނީ މަސައްކަތް ކުރަމުންނެވެ.
ވެރިރަށް މެނީލާއަށް ވެސް ތޫފާން އަރާނެ ކަމުގެ އިންޒާރު އެ ޤައުމުގެ މޫސުމާ ބެހޭ އިދާރާއިން ވަނީ ކޮށްފައެވެ. އަދި، 13 މިލިޔަން މީހުންގެ އާބާދީއެއް އޮންނަ މެނީލާގެ ރައްޔިތުން ދަނީ ރައްކާތެރި ކަމުގެ ފިޔަވަޅުތައް އަޅަމުންނެވެ. މެނީލާއަށް ވެސް ބޯކޮށް ވާރޭވެހި، ފެންބޮޑުވެ، ބިންގަނޑު ކަނޑައިގެން ދިޔުމުގެ ހާދިސާތައް ހިނގާނެ ކަމުގެ އިންޒާރު ވަނީ ކޮށްފައެވެ.
ތޫފާން އެންމެ ފުރަތަމަ އަރާފައިވާ ލުޒޯންއިން ވެސް 7,000 އަށްވުރެ ގިނަ ރައްޔިތުން ވަނީ ރައްކާތެރި ހިސާބުތަކަށް ބަދަލު ކޮށްފައެވެ. އަދި، ފެރީ ދަތުރުތައް މެދުކަނޑައިލުމާ ގުޅިގެން ގިނަ އަދަދެއްގެ ބަޔަކަށް އެ ކަމުގެ އަސަރު ކުރިއެވެ. ބައެއް ސަރަޙައްދުތަކުގައި ވައިގެ އުދުހުންތައް ވެސް ވަނީ މެދުކަނޑައިލާފައެވެ.